Rasija vykarystoŭvaje pałonnych bajcoŭ USU jak žyvy ščyt? Zjavilisia videadokazy z-pad Rabocina
Radyjo Svaboda atrymała ad ukrainskich vajskoŭcaŭ videa ź bieśpiłotnika, na jakim zafiksavana, jak rasijskija sałdaty viaduć pałonnych bajcoŭ USU pad rulami aŭtamataŭ u bok ukrainskich pazicyj, prykryvajučysia imi. Žurnalisty praanalizavali videa i paprasili prakamientavać jaho jurystaŭ. Na ich dumku, heta čarhovaje vajennaje złačynstva rasijskaj armii suprać ukrainskich bajcoŭ.
Što adbyłosia ŭ pasadcy pad Rabocinam
Videa Radyjo Svaboda pieradali bajcy adnaho z padraździaleńniaŭ USU, jakoje vajuje na Zaparožskim kirunku. Heta amal 19-ci chvilinny rolik, źniaty ŭ vakolicach Rabocina Zaparožskaj vobłaści. Žurnalisty vieryfikavali dakładnaje miesca zdymak — heta sapraŭdy adna z pasadak pablizu hetaj vioski. Dakładnaje miesca nie nazyvajecca, kab nie padviarhać niebiaśpiecy vajskoŭcaŭ, jakija tam dysłakujucca.
Na videa bačna, jak hrupa vajskoŭcaŭ RF, trymajučy aŭtamaty hatovymi da boju, idzie ŭ kirunku ŭkrainskich pazicyj. Napieradzie ich iduć biazzbrojnyja ludzi, jakija trymajuć ruki padniatymi dahary.
Pa miery nabližeńnia kamiery apieratara drona možna vyznačyć, što biazzbrojnych troje — i ŭsie jany apranutyja ŭ formu, adroznuju ad formy ludziej sa zbrojaj — vierahodna, uniformu USU.
Vidać, što pieryjadyčna rasijskija vajskoŭcy stralajuć z aŭtamataŭ u bok ukrainski pazicyj. Adzin z rasijskich vajskoŭcaŭ fizična prykryvajecca ŭkrainskim, trymajučy jaho adnoj rukoj za plačo, a ŭ druhoj — aŭtamat. Jašče adzin vajskoviec RF za niekalki siekund kidaje niejki pradmiet u bok ukrainskich pazicyj — jak miarkujecca, hranatu.
Pa słovach ukrainskich abaroncaŭ, jakija pieradali heta videa, heta tak zvanaja «raźviedka bojem» dla vyjaŭleńnia ahniavych srodkaŭ na pazicyjach USU. Kab zaścierahčysia ad ahniu sił abarony, rasijskija sałdaty vyrašyli prykrycca vajennapałonnymi.
Za niekalki siekund zaviazvajecca boj — pablizu hrupy sałdat RF i biazzbrojnych vybuchaje, ź vialikaj vierahodnaściu, hranata. Zatym siły abarony adkryvajuć pa hrupie ahoń sa strałkovaj zbroi — rasijskija vajskoŭcy prysiadajuć, ale praciahvajuć iści napierad pad prykryćciom pałonnych.
Rasijskija sałdaty dachodziać da jam, kustoŭ i pahorkaŭ, kudy chavajucca ad ahniu USU. U hety čas adzin z pałonnych staić napieradzie ich na kaleniach, tvaram da kirunku ataki vajskoŭcaŭ RF.
Jašče praź niekalki siekund rasijski vajskoviec stralaje z aŭtamata ŭ kirunku adnaho z pałonnych, paśla čaho hrupa biazzbrojnych źbirajecca ŭ adnym miescy na adkrytaj prastory. Jany pačynajuć biehčy ŭ procilehłym ad pazicyj USU kirunku — za imi iduć rasijskija sałdaty, trymajučy nakiravanymi na ich ruli aŭtamataŭ. Adzin z pałonnych pačynaje chutka biehčy, adryvajučysia ad hrupy rasijskich vajskoŭcaŭ. Sałdat armii RF robić streł z aŭtamata ŭ jaho bok.
Praź niekalki siekund rasijski žaŭnier robić jašče adzin streł u kirunku biazzbrojnych, jakija biahuć ad pazicyj USU – i kamiera adjazdžaje. Praź niekalki siekund, kali apieratar bieśpiłotnika znoŭ navodzić zum, cieła bajca ŭ formie USU ŭžo lažyć na ziamli.
Ukrainskija vajskoŭcy nie majuć infarmacyi pra dalejšy los hetych ukrainskich pałonnych. Bajcy, jakija pieradali Radyjo Svaboda hetaje videa, padkreślili, što takim čynam jany publična abviaščajuć ab vajennym złačynstvie rasijskaj armii. Pavodle źviestak HUR, na hetym kirunku vajujuć siły 234-ha desantna-šturmavoha pałka US RF.
Što havoryć juryst
Jurystka ŭ śfiery mižnarodnaha kryminalnaha prava Hanna Višniakova adznačaje, što dla kvalifikacyi hetych padziej treba staranna vyvučyć usie jaho abstaviny, a mienavita — ci prajšli ŭkrainskija vajskoŭcy ŭsie stadyi zdačy ŭ pałon, kab aficyjna ličycca vajennapałonnymi. Ale niezaležna ad hetaha, bajcy USU adnaznačna znachodzilisia pad achoŭnym statusam Hors de combat — jak tyja, chto nie zdolny vykonvać svaje bajavyja abaviazki padčas vajny.
«Heta peŭny imunitet, jaki vykarystoŭvajecca pamiž momantam, kali čałaviek zjaŭlajecca kambatantam, i jaho možna zabivać, i heta nie budzie vajennym złačynstvam — i momantam, kali čałaviek užo zdaŭsia ŭ pałon, staŭ vajennapałonnym», — adznačyła jana.
Kali ž budzie dakazana, što ludzi va ŭkrainskaj formie na videa — sapraŭdy vajennapałonnyja, to heta budzie hrubym parušeńniem treciaj Ženieŭskaj kanviencyi — i vajennym złačynstvam, zajaviła jurystka. Pavodle jaje słoŭ, užo isnuje adpaviednaja praktyka mižnarodnaha kryminalnaha trybunała pa Juhasłavii, kali miratvorcy AAN byli vykarystanyja ŭ jakaści «žyvych ščytoŭ».
Taksama Hanna Višniakova adznačyła, što rasijski zakon 2019 hoda ab adklikańni podpisu ŭ dačynieńni da dvuch dadatkovych pratakołaŭ Ženieŭskich kanviencyj nie aznačaje, što RF niamožna pryciahnuć da adkaznaści.
«Čatyry Ženieŭskija kanviencyi, u tym liku kanviencyja, jakaja abaraniaje pravy vajennapałonnych (treciaja) padpisanyja Rasijaj, — kaža juryst. — I, u druhuju čarhu, skažam tak, mižnarodnaje humanitarnaje prava, jano składajecca nie tolki z prava Ženievy, jano taksama ŭklučaje ŭ siabie i zvyčajnaje prava, i prava Haahi, u tym liku zhadanuju čaćviortuju Haahskuju kanviencyju ab zakonach i zvyčajach vajny na sušy».
Žyvahłod pryznała rassyłku praz čat-bot «Sumlennych ludziej» karystalnikam u Biełarusi: Ale nie ŭ pracoŭny čas, paśla 18 hadzin3
Kamientary