Ajcišnika z-pad Lidy sudziać za «zdradu dziaržavie». Jon doŭhi čas žyŭ u Hiermanii, ale viarnuŭsia ŭ Biełaruś

Alaksieju Navahrodskamu 48 hadoŭ. Jon naradziŭsia ŭ vioscy Papiernia Lidskaha rajona. Admietna, što pry naradžeńni jon mieŭ inšaje provišča — Čekavy.

Paśla škoły pastupiŭ u Minski radyjotechničny kaledž. Pa zakančeńni pajšoŭ u BDUIR, jaki skončyŭ u 1998-m.

Admietna, što, zhodna z bazami «Kibierpartyzanaŭ», na 2005-y mužčyna pracavaŭ śviatarom. Publičnych źviestak pra heta adšukać nie atrymałasia, jak i taho, da jakoj kanfiesii naležyć mužčyna.

Paśla śviatarstva, u 2007-m, Alaksiej pajšoŭ pracavać u «Biełfarmacyju». Paśla 2008-ha byŭ sistemnym administrataram i dyrektaram u TDA «Fiłasofija», śfieraj dziejnaści jakoha paznačanaja «Brašurovačna-pieraplotnaja i adździełačnaja dziejnaść». Prykładna ŭ hety ž čas jon źmianiŭ proźvišča na «Navahrodski».

Alaksiej vyjechaŭ za miažu — viadoma, što na 2015-y žyŭ u Polščy. A ŭ 2019-m i 2021-m mužčyna pisaŭ pra siabie, što žyvie ŭ Hiermanii, zajmajecca štučnym intelektam i pracuje ŭ niamieckaj kampanii EDEKA GmbH/WITRON. Jahonyja asnoŭnyja miesiendžary byli pryviazanyja da niamieckaha numaru, a paštovaja skrynia na niamieckim damienie, to-bok, u Hiermanii jon žyŭ stała.

Zhodna z bazami «Kibierpartyzanaŭ», aficyjna z 2011-ha jon u Biełarusi nie pracavaŭ. Zhodna ź ichnimi ž źviestkami, mužčyna maje traich dziaciej ad roznych žančynaŭ.

Pavialičyć

Alaksiej cikavicca fiłasofijaj i ŭdzielničaŭ u tematyčnych kanfierencyjach — da prykładu, u krasaviku 2021-ha rabiŭ dakład «Śviadomaść i štučny intelekt» na navukovaj kanfierencyi «Fiłasofija i vykliki sučasnaści», jakuju arhanizoŭvała Akademija navuk Biełarusi.

Taksama Alaksiej piša fantastyčnyja apaviadańni. U 2020-m jon vydaŭ apaviadańnie «Za ruku z AntyChrystam», u 2021-m — «Illa i jahonaja kamanda suprać pryšelcaŭ», a ŭ 2022-m — «Za ruku z aniołam».

Nieviadoma, kali jaho zatrymali, ale ŭ apošni raz jon byŭ anłajn na svajoj staroncy Ukantakcie 29 śniežnia 2022-ha, choć raniej zachodziŭ tudy rehularna. Sud nad Alaksiejem Navahrodskim pačaŭsia 18 śniežnia 2023 u Hrodzienskim abłasnym sudzie.

Sprava zakrytaja i sutnaść jaje nieviadomaja. Alaksieju pahražaje da piatnaccaci hadoŭ pazbaŭleńnia voli pa artykule 356 KK RB — «Zdrada dziaržavie».

Viadoma, što ŭ lutym 2023-ha jaho sudzili za «pieravyšeńnie ŭłady abo słužbovych paŭnamoctvaŭ». Za heta jamu pahražała ad troch da dziesiaci hadoŭ turmy.

• 0
• 4
• 0
• 3
• 7
• 7
• 59