U hetaj krainie hramadskija tualety słaviacca čyścinioj. Ale nie viedaju, ci vy chacieli b, kab vašych dziaciej tak da hetaha pryvučali

Technałahičnaść japonskich prybiralniaŭ nie raz stanaviłasia pradmietam aniekdotaŭ. Kožny, chto pabyvaŭ u hetaj krainie, z zachapleńniem raspaviadaje pra ich čyściniu, jakaja kantrastuje sa stanam takich miescaŭ u Jeŭropie.

Hramadskija prybiralni ŭ japonskich haradach možna znajści paŭsiul. Jany zvyčajna paznačany śpiecyjalnymi šyldami, i jany biaspłatnyja. Vy možacie imi skarystacca ŭ parkach, na vulicach i płoščach, na stancyjach mietro, u handlovych centrach, ofisnych budynkach, chramach. Ich prybirańniem zajmajucca pryvatnyja kampanii. Ale tam mała što prybirać: hetyja pamiaškańni zaŭsiody biezdakorna vyhladajuć i nikoli (u adroźnieńnie ad Jeŭropy) nie byvajuć raźbityja ci razmalavanyja. Taki ž vyhlad majuć prybiralni ŭ ciahnikach.

Jak piša Le Monde, kłopat ab čyścini i hihijenie — častka mientalitetu japonca. Hetamu vučać z samaha rańniaha dziacinstva. Japonskija chłopčyki i dziaŭčatki ŭ pačatkovaj i siaredniaj škołach (jak u dziaržaŭnych, tak i pryvatnych) čyściać školnyja prybiralni. I heta (jak i myćcio voknaŭ, pryborka kłasa) nie ličycca pakarańniem, a razhladajecca jak pieršačarhovy ŭdzieł u absłuhoŭvańni ŭstanovy. Prybirańnie tam uvachodzić u štodzionny raskład zaniatkaŭ.

Šmat chto sa starejšaha pakaleńnia biełarusaŭ moža pryhadać, jak u savieckaj škole dzieci taksama brali ŭdzieł u prybirańni kłasaŭ i škoły. Ale, pa-pieršaje, na tualety heta nie raspaŭsiudžvałasia, a pa-druhoje, u savieckaj turemnaj sistemie ludziej pryvučali da tabujavańnia prybirańnia tualetaŭ.

Jak piša BBC, zvyčka da čyścini ŭ japoncaŭ zdaŭna. Pieršy anhličanin — marachod Uił Adams, jaki stupiŭ na ziamlu Japonii ŭ 1600 hodzie, adznačaŭ, što «pradstaŭniki arystakratyi byli vyklučna achajnyja», kanalizacyja była va ŭzornym paradku, a ŭ prybiralniach kuryli aramaty, tady jak vulicy anhlijskich haradoŭ taho času «časta byvali zavalenyja ekskremientami».

Čyścinia — važnaja častka staražytnaj relihii japoncaŭ, sintaizmu. Adna z hałoŭnych kancepcyj u sintaiźmie — kiehary (zabrudžvańnie, apahanieńnie), procipastaŭlenaje čyścini. Kab paźbiehnuć kiehary, patrebny častyja rytuały ačyščeńnia. Va ŭjaŭleńni japoncaŭ praktykavać čyściniu žyćciova važna, bo heta dapamahaje paźbiehnuć biedstvaŭ dla ŭsiaho hramadstva.

Čyścinia — taksama važnaje paniaćcie ŭ budyźmie, jaki pryjšoŭ na japonskija ziemli ŭ VI stahodździ. A ŭ dzen-budyźmie, jaki pačaŭ raspaŭsiudžvacca ŭ XII—XIII stahodździach, takija štodzionnyja spravy, jak pryhatavańnie ježy i prybirańnie, ličacca duchoŭnymi praktykavańniami, roŭnymi miedytacyi.

U internecie možna znajści zachaplalnyja apisańni hramadskich prybiralniaŭ Japonii. Ich asnaščeńnie nie pierastaje ździŭlać: siaduška z padahrevam, bide z sušyłkaj ciopłym pavietram, aŭtamatyčny źliŭ i ačystka čašy ŭnitaza, sušyłki dla ruk i abstalavańnie dla ludziej z abmiežavanymi mahčymaściami. Kali vy saromiejeciesia hukaŭ svajho cieła, to možacie nacisnuć sensar, i pamiaškańnie napoŭnicca muzykaj. U prybiralniach navat praduhledžanyja kresły dla dziaciej da 3-ch hadoŭ. Pakul mama spraŭlaje patrebu, małyš siadzić pobač pad jaje nahladam.

U apošnija hady niekatoryja hramadskija prybiralni nabyli novaje abličča i stali «śviaciliščami miru i hihijeny». Značnyja źmieny adbylisia napiaredadni Alimpijskich hulniaŭ 2021 hoda ŭ Tokia. U toj čas viadomyja japonskija architektary adkazvali za pieraŭtvareńnie abličča hetych hramadskich miescaŭ.

Adnoj z navinak, jakaja ździviła ŭsich, stała prybiralnia ŭ sadzie Johi Fukamaci (Yoyogi Fukamachi) — nievialiki šklany budynak z prazrystymi ścienami, jakija traciać prazrystaść, kali zakryć pamiaškańnie znutry.

Pavialičyć

Jak adznačajuć aŭtary artykuła ŭ Le Monde, Japonija imkniecca prademanstravać astatniamu śvietu, što hramadskija prybiralni mohuć stać miescami adpačynku ŭ poŭnym sensie hetaha słova i navat častkaju novaha «haradskoha šyku».

U toj ža čas u śviecie, pavodle danych Suśvietnaj arhanizacyi achovy zdaroŭja za 2023 hod, 3,5 miljarda čałaviek praciahvajuć žyć bieź minimalnych hihijeničnych vyhod. Z takoj pierśpiektyvy padajecca małaimaviernym chutkaje raspaŭsiudžańnie hetaj častki japonskaj kultury, jak heta adbyłosia z manhaj ci sušy. Ź inšaha boku, mahčyma, što prykład Japonii padšturchnie bahatyja krainy palepšyć svaje hramadskija prybiralni jak z punkta hledžańnia kolkaści, tak i čyścini.

Čytajcie jašče:

Kraina ŭzychodziačaha porna: jak japonskaja pornaindustryja vychodzić ź cieniu

Dziakujučy hetamu vynachodnictvu možna spać prosta ŭ ofisie

Japonija moža stać piataj krainaj, jakaja paśpiachova zapuściła misiju na Miesiac

• 103
• 0
• 6
• 7
• 14
• 24
• 40
• 0