Kupałaŭski teatr u Minsku daje premjeru «A zory tut cichija» ŭ pastanoŭcy rasijskaha režysiora
U repiertuary teatra, a dakładniej taho, što zastałosia ad jaho paśla padziej 2020 hoda, tolki try śpiektakli pa tvorach biełaruskich kłasikaŭ.
Da navahodnich śviataŭ Nacyjanalny akademičny teatr imia Janki Kupały padrychtavaŭ premjeru — «A zory tut cichija» pavodle tvora Barysa Vasiljeva ŭ pastanoŭcy rasijskaha režysiora Dźmitryja Akimava, piša Reform.by.
«Bieź minułaha — niama budučyni. Mienavita tamu my abaviazany pamiatać i šanavać podźvih našaha naroda ŭ Vialikaj Ajčynnaj vajnie», — padajecca novy śpiektakl na sajcie ŭstanovy.
«Starejšamu pakaleńniu znajomyja imiony hierojaŭ hetaha vialikaha tvora: Ženia Kamialkova, Liza Bryčkina, Sonia Hurvič, Ryta Asianina, Hala Čaćviartak. Chočacca, kab i ciapierašniaje pakaleńnie zadumałasia ab lubovi da Radzimy, ab sumleńni, ab tym, jaki vybar robić čałaviek, znachodziačysia na vajnie. Śpiektakl-razvažanńnie. Śpiektakl-rekvijem. Śpiektakl-pryśviačeńnie ŭsim tym, chto addaŭ svajo žyćcio dziela mirnaha nieba nad hałavoj!», — adznačajecca ŭ anatacyi da pastanoŭki.
Rasijski režysior Dźmitryj Akimaŭ źjaŭlajecca hałoŭnym režysioram Matyhinskaha teatra. U jaho darobku — adznaki na Mižnarodnym fiestyvali kamiernych śpiektaklaŭ pavodle tvoraŭ F.M. Dastajeŭskaha ŭ Vialikim Noŭharadzie, forumach «Teatralnaja viasna», «Załaty viciaź». Heta pieršaja pastanoŭka Akimava na scenie Kupałaŭskaha teatra.
Śpiecyjalna da premjernaha pakazu «A zory tut cichija» Kupałaŭski teatr sumiesna ź Biełaruskim sajuzam žančyn i Muziejem historyi Vialikaj Ajčynnaj vajny padrychtavali ekspazicyju na temu «Žanočy tvar Pieramohi». Jana pryśviečana «hieraičnym žančynam Biełarusi i ich zasłuham na poli boju, u partyzanskich bryhadach i ŭ tyle», — padkreślivajecca ŭ sacsietkach ustanovy.
Simptamatyčna, što ŭ repiertuary Nacyjanalnaha teatra ź piatnaccaci pastanovak tolki try — pa tvorach biełaruskich kłasikaŭ: «Viečar» i «Čornaja panna Niaśviža» pavodle dramaturhii Alaksieja Dudarava, i «Paŭlinka» pavodle pjesy Janki Kupały.
Za apošnija miesiacy na scenie najstarejšaha teatra ŭ Biełarusi adbylisia premjery: «Kazki ab miortvaj careŭnie» pavodle kazak Alaksandra Puškina (pastanoŭka Paŭła Maryniča), u śniežni — śpiektal-nastalhija «Dvor majho dziacinstva» pa dziońnikavych zapisach režysiora-pastanoŭščyka Daniiła Filipoviča.
Kamientary
A što tyčycca na kont pamiaci - dyk u biełarusaŭ z hetym niama prablem. U nas jość Vasil Bykaŭ, i hałoŭny naratyŭ jahonych tvoraŭ pra vajnu i pieradvajenny čas - heta mienavita čałaviečaja trahiedyja, a nia možam paŭtaryć albo ŭsie, chto suprać savieckaha kałanijalizmu i tatalitaryzmu, albo sučasnaj mafijoznaj dyktatury - nacysty. I dakładna heta nie źniščeńnie mohiłak vajaroŭ AK, jakija taksama zmahalisia suprać nacystaŭ.