Z turmy ŭ Ekvadory prapaŭ viadomy mafijozi. I ŭ krainie abviaścili nadzvyčajnaje stanovišča
Adolfa Masijas Viljamar pa mianušcy Fita siadzieŭ užo 12 hadoŭ i pry hetym uznačalvaŭ mahutnuju mafijoznuju hrupoŭku.
Z kamiery ŭ ekvadorskaj turmie źnik lidar złačynnaj hrupoŭki, jakuju, u pryvatnaści, padazrajuć u zabojstvie kandydata ŭ prezidenty krainy. U krainie abvieščana nadzvyčajnaje stanovišča terminam na dva miesiacy, piša Bi-bi-si.
44-hadovy Adolfa Masijas Viljamar pa mianušcy Fita siadzieŭ užo 12 hadoŭ i pry hetym uznačalvaŭ mahutnuju mafijoznuju hrupoŭku «Łos Čanieras» («ludzi z horada Čonie»). Kamiera Viljamara znachodzicca ŭ toj častcy turmy ŭ horadzie Huajakil, jakaja tearetyčna pavinna achoŭvacca asabliva staranna.
Prezident Ekvadora Daniel Naboa abviaściŭ nadzvyčajnaje stanovišča terminam na 60 dzion, jakoje praduhledžvaje, u pryvatnaści, časovuju zabaronu na publičnyja schody i kamiendanckuju hadzinu.
Pa słovach prezidenta Naboa, režym nadzvyčajnaha stanovišča dazvolić vajskoŭcam i palicyi ŭziać pad pramy kantrol turmy krainy.
«Łos Čanieras» faktyčna kantralujuć bolšuju častku rehijanalnaj turmy ŭ Huajakile, dzie siadzieŭ Fita.
«Narkaterarystyčnyja hrupoŭki chočuć zapałochać nas i dumajuć, što my sastupim ich patrabavańniam, — zajaviŭ prezident Naboa. — Ale my nie budziem vieści pieramovy z terarystami i my nie supakoimsia, pakul nie adnovim mir u krainie».
35-hadovy Daniel Naboa pieramoh na prezidenckich vybarach u kastryčniku minułaha hoda, mienš za try miesiacy tamu. Padčas pieradvybarčaj kampanii byŭ zabity adzin z kandydataŭ, były žurnalist i zmahar z mafijaj Fiernanda Viljavisiensia, i ŭ datyčnaści da hetaha zabojstva padazrajuć «Łos Čanieras» i asabista Fita, jaki pahražaŭ palityku.
Jak tłumačyć ekvadorskaja palicyja, adsutnaść Fita ŭ kamiery było vyjaŭlena ŭ niadzielu. Jaho šukali pa ŭsim kryle turmy, što vielmi stroha achoŭvajecca, ale tak i nie znajšli.
Pakul nie jasna, źbieh Fita ci ž chavajecca dzieści na terytoryi vialikaha turemnaha kompleksu. Kali mienavita Fita źnik z kamiery, palicyja taksama nie viedaje.
Pa słovach načalnika palicyi, Fita šukali i šukajuć sotni palicejskich.
Rehijanalnaja turma (La Regional) źjaŭlajecca składovaj častkaj turemnaha kompleksu, u jaki ŭvachodziać piać papraŭčych ustanoŭ. U ich siadziać bolš za 12 tysiač źniavolenych.
U minułym žniŭni Fita pieraviali ŭ inšuju turmu kompleksu, La Roca. Jana ličycca bolš nadziejnaj, bo tam mienš źniavolenych.
Pieravod Fita byŭ cełaj vajskovaj apieracyjaj z udziełam niekalkich tysiač sałdat.
Ale nieŭzabavie advakat Fita padaŭ apielacyju na jaho pieravod i vyjhraŭ jaje, paśla čaho mafijozi viarnuli ŭ La Regional.
Fita adnojčy ŭžo źbieh z hetaha turemnaha kompleksu. U 2013 hodzie jon i jašče 17 źniavolenych vybralisia z La Roca i na łodkach pierabralisia praz raku, jakaja słužyć miažoj kompleksu.
Praz čatyry miesiacy Fita razam z bratam, taksama členam «Łos Čanieras», złavili ŭ domie ich maci ŭ horadzie Manta.
Z tych časoŭ Fita turmu nie pakidaŭ. Pry hetym lidaram hrupoŭki jon staŭ u źniavoleńni, u 2020 hodzie, paśla zabojstva papiaredniaha vierchavoda Chorchie Łuisa Sambrana.
«Łos Čanieras» zajmajucca ŭ asnoŭnym narkahandlem i rekietam i supracoŭničajuć z mahutnym mieksikanskim kartelem Sinałoa.
Jak skłaŭsia los vypusknikoŭ, jakimi žurfak hanaryŭsia 10 hadoŭ tamu? Historyja adnaho ŭračystaha kałaža31
Kamientary