Biełarusam rekamiendujuć ujazdžać u Polšču praź Litvu: u Tarespali niemahčyma kupić strachoŭku
Polskija strachavyja ahienty tak i nie zapracavali ŭ punkcie propusku «Tarespal» na miažy ź Biełaruśsiu. U vyniku aformić damovu pamiežnaha strachavańnia aŭtamabila tam niemahčyma.
Z 30 červienia biełarusy i rasijanie nie mohuć strachavać transpart u sistemie aŭtahramadzianskaj adkaznaści «Zialonaja karta». Ciapier, kab pajechać u Jeŭropu, kiroŭcam treba afarmlać damovy pamiežnaha strachavańnia ŭ punktach propusku toj krainy, kudy jany nakiroŭvajucca, piša Mostmedia.io.
Jak raspavioŭ namieśnik hiendyrektara Biełaruskaha biuro pa transpartnym strachavańni Viktar Łukaševič, takija damovy možna svabodna aformić na litoŭskaj i łatvijskaj miežach, dzie na pahranpierachodach prysutničajuć strachavyja ahienty. Adnak na polskaj takija polisy zrabić niemahčyma.
— Nakolki nam viadoma, z boku polskaha pamiežnaha pierachodu «Tarespal» pytańni zastalisia, i jany dahetul nie vyrašylisia. Choć my niekalki razoŭ źviartalisia ŭ polskaje matornaje strachavoje biuro. Jany abiacali ŭsialakaje sadziejničańnie, ale arhumientavali ŭ kančatkovym vyniku tym, što sam pamiežny pierachod niedastatkova abstalavany dla raźmiaščeńnia strachavoha ahienta, — skazaŭ Łukaševič.
Što rabić?
Samym vidavočnym sposabam zastajecca anłajn-strachoŭka. Adnak i ŭ hetaj schiemie jość padvodnyja kamiani. Nie zaŭsiody polis atrymoŭvajecca apłacić ź Biełarusi. U telehram-čacie «HranicaBY Biełaruś-ES» my znajšli historyju Paŭła. Jon piša, što apłacić takuju strachoŭku možna tolki jeŭrapiejskimi kartami.
Heta nie zaŭsiody tak. Inšaj udzielnicy čata Taćcianie ŭdałosia zapłacić biełaruskaj kartaj, za miesiac strachoŭki dziaŭčyna addała kala 200 rubloŭ.
Pry paśpiachovaj kupli strachoŭku vysyłajuć pdf-fajłam, jaki zatym treba razdrukavać. Afarmleńniem dakumientaŭ rajać zajmacca zahadzia i ŭvažliva praviarać strachoŭščykaŭ — siarod ich niaredka jość ašukancy.
U cełym ža čaty milhaciać abjavami ab terminovych dystancyjnych afarmleńniach, apłata — pa fakcie hatoŭnaści.
Alternatyŭny varyjant vyrašeńnia prablemy — ujazdžać u Polšču praź Litvu.
«Nakolki nam viadoma, aficyjna aformić anłajn pamiežnuju damovu strachavańnia ŭ Polščy nielha. Tamu pažadana ŭjazdžać u Jeŭropu praz terytoryju Litvy albo Łatvii abo vykarystoŭvać doŭhaterminovyja damovy (kali jany majucca)», — skazaŭ Łukaševič.
-
Italjaniec pierajechaŭ u biełaruskuju viosku i pačaŭ piačy sapraŭdnuju picu na drovach
-
«90 čałaviek vyhnali pad piakučaje sonca i trymali tam try hadziny. Ja paŭtarała tolki adnu malitvu: niachaj im usio vierniecca»
-
Ci chopić sioleta €2000, kab adpačyć na mory? Što adbyvajecca z cenami na letni adpačynak
Jak skłaŭsia los vypusknikoŭ, jakimi žurfak hanaryŭsia 10 hadoŭ tamu? Historyja adnaho ŭračystaha kałaža31
Kamientary