Historyja z 21-hadovym tyktokieram, jaki pramianiaŭ Varšavu na Maskvu, atrymała niečakany praciah
Historyja haradzienskaha chłopca, jaki žyŭ u Varšavie, vioŭ błoh u tyktoku, sabraŭ bolš za 20 tysiač padpisčykaŭ, a zatym pierajechaŭ u Maskvu, kab «niejak maštabavacca i raźvivacca», uskałychnuła biełaruski internet. Mnohija nazyvali hety krok amaralnym na fonie raźviazanaj Rasijaj vajny.
Reform.by sumiesna z «Dzikim palavańniem» vyrašyŭ pahladzieć, chto baćki maładoha čałavieka. I čakaŭ siurpryz. Baćka Uładzisłava — toj samy «Zły dalnaboj».
Nahadajem, viadomaha błohiera ź Biełarusi «Złoha dalnaboja» kličuć Maksim Kuźniacoŭ. Jon pierajechaŭ u Polšču ŭ 2019 hodzie i stvaryŭ u Varšavie tak zvany «ličbavy prafsajuz kiroŭcaŭ». Heta mabilny dadatak, karystalniki jakoha płaciać unioski i zatym nibyta mohuć źviarnucca pa materyjalnuju dapamohu.
Miarkujučy pa bazach, jakija atrymali «Kibierpartyzany», Kuźniacoŭ minimum z 2007 pa 2013 hod rabiŭ vypłaty ŭ FSAN jak rabotnik dziaržaŭnaj prajektnaj ustanovy «Łaryskor».
Hetaja struktura źjaŭlajecca šyrmaj dla pracaŭładkavańnia ahientaŭ roznych padraździaleńniaŭ MUS. U bazie pašpartoŭ jość cełych 6 varyjantaŭ ź jaho fota, ale z roznymi proźviščami. Pryčym try dakumienty zaviedzienyja ŭ adzin i toj ža dzień — 26 śniežnia 2012 hoda. U MUS takija pašparty nazyvajuć dakumientami prykryćcia, i heta zvyčajnaja praktyka dla sakretnych ahientaŭ.
U pačatku kastryčnika 2023 hoda na «Biełsacie» ŭ prahramie «Tydzień» vyjšła rasśledavańnie, pryśviečanaje «Złomu dalnaboju». Padčas rasśledavańnia žurnalisty źviartalisia pa kamientary i da samoha Kuźniacova. U adkaz atrymali abrazy i pahrozy.
Dziakujučy prajektu «Dzikaje palavańnie» i «dapamozie «Kibierpartyzan» žurnalisty zmahli vyśvietlić, što tyktokier — syn Maksima Kuźniacova. Jaho zavuć Uładzisłaŭ Maksimavič Kuźniacoŭ.
Cikava, što paśla publikacyi rasśledavańnia na «Biełsacie» małady čałaviek svaim padpisčykam raspavioŭ, što niadrenna b źjeździć dadomu «choć nienadoŭha». Z Polščy Uładzisłaŭ źjechaŭ u Biełaruś u siaredzinie śniežnia. Miarkujučy pa jaho błohu, u Hrodna jon pryjechaŭ 17 śniežnia 2023 hoda.
Čatyry dni tamu Uładzisłaŭ paviedamiŭ svaim padpisčykam, što pierajechaŭ u Maskvu i raspavioŭ pafasnuju historyju pra kantent na ruskaj movie i vialikija mahčymaści ŭ stalicy Rasii.
Ci źviazanyja abnarodavańnie infarmacyi ab pracy jahonaha baćki na biełaruskich siłavikoŭ i terminovy pierajezd tyktokiera z Varšavy ŭ Maskvu, vyśvietlić nie ŭdałosia.
Ciapier čytajuć
Fiodar Viktaravič i «Viktar Fiodaravič». Supracoŭnik «Varhiejminha» maje pašpart prykryćcia. Jaho žonka Volha Siamaška — viadomaja žurnalistka29
Kamientary