«Paśla ranieńnia ŭ im niešta nadłamałasia». Sasłužyŭcy pra biełaruskaha dobraachvotnika, zatrymanaha za narkotyki

Mieŭ sudzimaść, pracavaŭ u Polščy, byŭ žanaty na ruskaj

Juryj Harupa z Brestčyny. Palitykaj nie cikaviŭsia, u armii nie słužyŭ. Vyvučyŭsia na zaatechnika ŭ Pinskim sielskahaspadarčym technikumie.

Pa jaho skančeńni mieŭsia adpracavać raźmierkavańnie. Adpracavaŭšy miesiac za mizerny zarobak, vypraviŭsia hastarbajtaram u Polšču. Tam pracavaŭ na budoŭli.

U adzin z pryjezdaŭ na radzimu Harupu zatrymali. Jamu prysudzili try hady «chimii». Pakarańnie adbyvaŭ u Pinsku, pracavaŭ na «Pinskdrevie».

Z «chimii» Juryj sprabavaŭ źbiehčy. Jaho schapili na miažy i dali 2,5 hoda kałonii. Siadzieŭ u Navapołacku. Vyzvaliŭsia ŭ 2010 hodzie i źjechaŭ u Polšču.

U Polščy paznajomiŭsia ź dziaŭčynaju z Padmaskoŭja. Ažaniŭsia, ale šlub byŭ niadoŭhim, u 2013 hodzie para razyšłasia.

Rodnyja vyraklisia dobraachvotnika

Za Ukrainu Juryj vajuje z 2014 hoda. Z Polščy pryjechaŭ adrazu pa akupacyi Kryma razam ź siabram, jaki słužyŭ u Francuzskim zamiežnym lehijonie.

Chacieŭ zapisacca ŭ bataljon «Ajdar», ale jaho nie ŭziali praz adsutnaść vajskovaha dośviedu. Tady dałučyŭsia da «Pravaha siektara», prajšoŭ jaho vučebku. Słužyŭ z Paŭłam «Vołatam» Susłavym dy Kanstancinam «Fieniksam» Dziubajłam.

Rodnyja Juryja, kali daviedalisia, što jon va Ukrainie, pierastali kamunikavać ź im.

Va Ukrainie Juryj ažaniŭsia druhi raz. Maje dačku. Siamja žyvie ŭ Chmialnickim.

Try razy spyniałasia serca

Kali pačałasia poŭnamaštabnaja vajna, dałučyŭsia da biełaruskaj roty pry «Azovie», ź jakoj paŭstaŭ Połk Kalinoŭskaha.

22 krasavika 2022 hoda «Chmiela» ciažka paraniła ŭ Mikałajeŭskaj vobłaści.

Askiepak praź ściahno trapiŭ u žyvot, byli traŭmavanyja ŭnutranyja orhany. Paškodžanaja ruka dahetul nie ačuniała. Juryj atrymaŭ kantuziju i ciapier hłuchi na adno vucha.

Ź pieradavoj bajca doŭha nie mahli evakujavać praz abstreł.

Try razy ŭ jaho spyniałasia serca, daktary nie vieryli, što Harupa vyžyvie. Lačyli bajca ŭ Adesie miedyki-biełarusy.

Pa miedyčnych pakazčykach Juryj byŭ adchileny ad słužby, ale praz paŭhoda trenirovak atrymaŭ dazvoł na viartańnie.

Damohsia viartańnia na front

Pa viartańni paśla ranieńnia trapiŭ u bataljon «Lićvin» Pałka Kalinoŭskaha i staŭ artylerystam. Kalinoŭcy charaktaryzujuć Juryja jak dobraha čałavieka i dobraha vajskoŭca.

Ale, kažuć jany, paśla ranieńnia ŭ im niešta nadłamałasia.

Juryj pakinuŭ Połk Kalinoŭskaha ŭ kancy 2022 hoda, bo «nie syšoŭsia charaktaram z kiraŭnictvam».

U Pałku nie zaŭvažali, kab Juryj užyvaŭ narkotyki, ale pamiatajuć pra jaho prablemy z ałkaholem.

Časam byli zapoi, asabliva paśla adpačynku ad frontu. Krytyčnych nastupstvaŭ ad hetaha nie było.

Narkotyki dapamahajuć pieražyć stres

Z 3 lutaha 2023 hoda Harupa słužyŭ kamandziram minamiotnaha ŭzvodu Druhoha internacyjanalnaha lehijona. Jaho sasłužyŭcami taksama byli biełarusy.

U padraździaleńni ŭ Juryja stała vastrej prajaŭlacca ałkaholnaja zaležnaść.

Byŭ epizod, kali jon chacieŭ źviarnucca da narkołaha, ale kali śpiecyjalista znajšli, to nie pajšoŭ da jaho, kažuć surazmoŭcy.

Toje, što Juryj staŭ užyvać narkotyki, było vidać pa im.

Paśla dozy jon dakučaŭ hutarkami na fiłasofskija temy. Ale bajec nie raspaŭsiudžvaŭ narkotykaŭ i nie afišavaŭ svajoj zaležnaści, jak niekatoryja jaho sasłužyŭcy.

Pavodle surazmoŭcaŭ, šmat chto ź biełaruskich dobraachvotnikaŭ užyvaje narkotyki, asabliva tyja, chto pryjechaŭ na vajnu z Polščy.

Tam narkatyčnaje zakanadaŭstva bolš libieralnaje za biełaruskaje. U Polščy znajści marychuanu praściej za prostaje.

Surazmoŭcy kažuć, što razžycca na froncie narkotykami nieskładana. Mnohija zakazvajuć ich poštaj.

Zatrymali Juryja Harupu nie na froncie, a ŭ Chmialnickim, dzie jon znachodziŭsia na pabyŭcy. U jaho byŭ pakiet z 300 hramami sintetyčnaha narkotyka Alfa-PVP.

Dobraachvotniki adznačajuć, što situacyja z zatrymańniem Juryja nie adzinkavaja. U niavoli za narkotyki ciapier znachodziacca jašče niekalki biełarusaŭ.

Vajnoj nie byŭ stomleny

Pavodle sasłužyŭcaŭ, Juryj — kłasny minamiotčyk. U jaho byli suviazi, što dazvalała jamu dastavać patrebnaje dla padraździaleńnia. Mieŭ bahata siabroŭ.

Z Druhoha internacyjanalnaha lehijona Juryj syšoŭ u žniŭni 2023 hoda.

Sasłužyŭcy vyklučajuć, što pryčynaj była stomlenaść ad vajny. Za doŭhi čas znachodžańnia na froncie jana stanovicca nieadjemnaj častkaj žyćcia vajskoŭca.

Surazmoŭcy dapuskajuć, što ŭ Juryja mahli ŭźniknuć prablemy z kiraŭnictvam.

Sa słužby va Uzbrojenych siłach jon nie zvolniŭsia. Hetaja akaličnaść, jak i ciažkaje ranieńnie, moža być uličanaja śledstvam i sudom dla źmiakčeńnia pakarańnia.

Hladzicie taksama:

Šturmavik Pałka Kalinoŭskaha pra rasijskich sałdat: Siadzieŭ z paŭtaraškaj piva kala padjezda, a ciapier z takimi ž prydurkami jedzie «mačyć ukropaŭ»

«Vyłazka na terytoryju Biełarusi nam pakul nie patrebna». Kamandziry pałka Kalinoŭskaha adpravilisia ŭ tur pa haradach Jeŭropy

Pra palityku Ukrainy, kalinoŭcaŭ, «pacukoŭ», Sachaščyka i Janki. Novy «Tok» z Hienadziem Mańko

«My hatovyja byli sustreć amapaŭcaŭ». Demabilizavany kalinoviec pra čatyry miesiacy frontu, pieražyvańni i PTSR

• 7
• 0
• 4
• 8
• 0
• 36
• 8
• 0