Tysiačy trekaŭ z tyktoka mohuć źniknuć užo zaŭtra. U čym pryčyna?
Adna z najbujniejšych muzyčnych karparacyj u śviecie zajaviła, što bolš nie budzie licenzavać kantent dla tyktoka, bo kampanii «pasvarylisia». Treki Tejłar Śvift, Ełtana Džona, Bili Ajliš, Drejka, Hary Stajłza i šmat kaho inšaha mohuć być vydalenyja z tyktoka 1 lutaha. Hazieta Variety razabrałasia, u čym pryčyna.
Jak paviedamlaje bujnaja amierykanskaja hazieta Variety, kampanija Universal Music Group nie zmahła damovicca ab praciahu supracoŭnictva z płatformaj TikTok, jakoje skončvajecca 31 studzienia.
Na praktycy heta aznačaje zabaronu płatformie na karystańnie tysiačami kampazicyj roznych vykanaŭcaŭ.
«Kampanii razyšlisia pa punktach novaha pahadnieńnia i nie ŭzhadnili jaho, tamu pa skančeńni terminu dziejnaha supracoŭnictva Universal Music Group, uklučajučy Universal Music Publishing Group, spynić licenzavańnie svajho kantentu dla TikTok i TikTok Music», — zajaviła kampanija Universal Music Group.
Pavodle Variety, baki pasvarylisia z-za troch punktaŭ novaha pahadnieńnia: abarona pravoŭ vykanaŭcaŭ ad štučnaha intelektu, anłajn-biaśpieka karystalnikaŭ tyktoka i naležnaja kampiensacyja dla vykanaŭcaŭ za vykarystańnie ich kampazicyj płatformaj.
Jak śćviardžaje Universal Music Group, «tyktok prapanavaŭ płacić artystam tolki častku ad standartnaj pracentnaj staŭki za vykarystańnie ich trekaŭ (mienš, čym płaciać u inšych sacsietkach), padajučy heta jašče i jak vydatnuju pasłuhu za mahčymaść prasoŭvacca biaspłatna na płatformie ź miljardam karystalnikaŭ».
«Tyktok sprabuje pabudavać muzyčny biznes, nie płaciačy spraviadlivuju canu za muzyku. My zaŭsiody budziem zmahacca za našych artystaŭ i aŭtaraŭ, adstojvajučy tvorčuju i kamiercyjnuju kaštoŭnaść muzyki», — adznačyli pradstaŭniki Universal Music Group.
Akramia hetaha, kampanija paskardziłasia, što «tyktok naležnym čynam nie abaraniaje vykanaŭcaŭ ad kapijavańnia ich tvorčaści štučnym intelektam, a taksama praktyčna nie zmahajecca z kantentam, jaki prapahanduje nianaviść, fanatyzm, ździeki i damahańni na płatformie».
«Zamiest taho, kab vyrašyć hetyja prablemy, kiraŭnictva tyktoka, naadvarot, pačało nas zapałochvać, vybaračna vydalajučy z płatformy tvorčaść tych našych artystaŭ, jakija jašče tolki pačynajuć nabyvać papularnaść.
Tyktok taksama prasoŭvaje padaŭžeńnie supracoŭnictva z nami z kudy mienšaj apłataj našaha kantentu. My na heta nie pojdziem i vydalim usie našyja pieśni z płatformy», — pryhraziła kampanija Universal Music Group.
U adkaz na skarhi kampanii pradstaŭniki tyktoka zajavili, što ich «rasčaroŭvaje prahnaść Universal Music Group i jaje adychod ad mahutnaj padtrymki płatformy z bolš čym miljardam karystalnikaŭ, jakaja słužyć biaspłatnym rekłamnym instrumientam i srodkam vyjaŭleńnia talentu jaje artystaŭ».
«My zmahli dasiahnuć takich ž pahadnieńniaŭ z usimi inšymi łejbłami i vydaŭcami. Vidavočna, što ehaistyčnyja dziejańni Universal nie ŭ intaresach artystaŭ i ich prychilnikaŭ», — adkazali pradstaŭniki tyktoka.
Łejbł Universal Music Group vałodaje pravami na tvorčaść takich vykanaŭcaŭ, jak Tejłar Śvift, Bad Bunny, Sting, The Weeknd, Alicia Keys, SZA, Steve Lacy, Drejk, Billie, Bili Ajliš, Kendrick Lamar, Rosalía, Hary Stajłz, Aryjana Hrande, Džaścin Bibier, Adele, U2, Ełtan Džon, J Balvin, Brandi Carlile, Coldplay, Pearl Jam, Bob Dyłan i Post Malone.
Usie jany mohuć źniknuć z katałoha tyktoka ŭžo zaŭtra.
Mova naša. Čamu Tyktok lepšy za Ciktok?
Jak nadziejna pačyścić akaŭnt u TikTok — padrabiazny hajd
Kampanija-ŭładalnik TikTok hraje klučavuju rolu ŭ vajskova-pramysłovaj śfiery Kitaja — spravazdača
«Biełarusy — tyja ž ruskija, prosta nie ŭsie jašče zrazumieli». Jak biełarusy pad bieł-čyrvona-biełym i rasijskim ściahami ŭdzielničajuć u tyktok-batłach
Čym siońnia zajmajucca niekali viadomyja hieroi ŽŽ? Spojler: mnohija tak i nie zakinuli błohierstva1
Kamientary