Bona prapanavaŭ kantralavać internet

Vakalist irłandskaj rok-hrupy U2 Bona ŭ svajoj kałoncy ŭ The New York Times prapanavaŭ uziać na ŭzbrajeńnie dośvied Kitaja i ŭvieści kantrol za źmieścivam internet-trafiku dziela baraćby ź piractvam. Na dumku muzyki, uviadzieńnia takoj miery musiać damahčysia pradstaŭniki kinaindustryi, jakim u chutkim časie daviadziecca vostra sutyknucca z prablemaj piractva.

Rost chutkaści pieradačy dadzienych pryviadzie da taho, što ludzi buduć zhružać sieryjały i filmy za niekalki siekundaŭ, i zusim kinuć płacić za fizičnyja nośbity, ličyć Bona.

Pavodle jahonych słoŭ, apošnija dziesiać hadoŭ pakazali, što fajłaabmien škodzić u pieršuju čarhu stvaralnikam kantentu, naprykład, muzykam-pačatkoŭcam, jakija nie zdolnyja jašče zarablać hrošy kancertami j prodažami suvienirnaj pradukcyi.

«Kinamahnaty musiać dasiahnuć pośpiechu tam, dzie zaznała parazu muzyčnaja industryja, i prymusić ułady ZŠA pryniać miery pa abaronie samaj kreatyŭnaj ekanomiki ŭ śviecie», — piša Bona.

Pavodle jahonych słoŭ, techničnaja mahčymaść kantralavać internet-trafik i takim čynam nie dapuskać raspaŭsiudu kantrafaktnaj pradukcyi isnuje, i heta dakazvaje dośvied ZŠA ŭ baraćbie ź dziciačaj parnahrafijaj i dośvied Kitaja pa zadušeńni inšadumstva ŭ internecie.

Varta adznačyć, što ź mierkavańniem Bona zhodnyja j inšyja papularnyja muzyki, u tym liku brytanskaja śpiavačka Lili Alen (Lily Allen), jakaja raniej abjaviła pra zaviaršeńnie karjery praź niežadańnie mirycca ź isnavańniem internet-pirataŭ, jakija biaspłatna raspaŭsiudžvajuć jaje muzyku.

U toj ža čas takija viadomyja hurty jak Nine Inch Nails i Radiohead, naadvarot, vystupajuć suprać baraćby ź piractvam i samastojna dazvalajuć biaspłatna zahružać svaju muzyku. Muzyki-pačatkoŭcy taksama čaściakom sami addajuć svaje tvory ŭ volny raspaŭsiud, paviedamlaje Lenta.ru.

Historyja budzie niapoŭnaj, kali nie ŭzhadać, što Bona sam paciarpieŭ ad sprytnaści pirataŭ. Letam 2004-ha hoda adzin z udzielnikaŭ U2 — Edž — straciŭ dysk z majstar-kopijaj doŭhačakanaha alboma «How To Dismantle An Atomic Bomb». Hurtu praz hety vypadak daviałosia mianiać hrafik vychadu albomu j achviaravać adpačynkam, ale ŭsio adno pirackija zapisy źjavilisia ŭ siecivie raniej.

Tym časam narviežski instytut mieniedžmientu ćvierdzić, što moładź, jakaja zahružaje pirackuju muzyku ź sieciva, kuplaje ŭdziesiaciora bolš lehalnych zapisaŭ, čym tyja, chto nie vykarystoŭvaje fajłaabmieńniki.

• 0
• 0
• 0
• 0
• 0