Biełaruś zaniała pieršaje miesca siarod krain byłoha SSSR pa tempach rostu aficyjnaha kursu dalara ZŠA da nacyjanalnaj valuty ŭ 2009 hodzie.
Pra heta śviedčyć praviedzieny analiz kursaŭ na 31 śniežnia 2008 hoda i 31 śniežnia 2009 hoda.
Pavodle vynikaŭ piaci i dzieviaci miesiacaŭ minułaha hoda Biełaruś znachodziłasia na druhim miescy (napieradzie byŭ Tadžykistan), dziesiaci miesiacaŭ — na čaćviortym (Tadžykistan, Armienija, Kazachstan), u astatnija pieryjady — na pieršym.
U pieršuju trojku ŭvajšli Biełaruś, dzie za hod aficyjny kurs dalara ŭzros na 30,14% (z 2.200 da 2.863 rubloŭ), Tadžykistan — na 26,63% (z 3,4519 da 4,3710 samoni) i Armienija — na 23,20% (z 306,73 da 377,89 drama).
Dalej iduć Kazachstan — 22,85% (sa 120,77 da 148,36 tenhie), Małdova — 18,28% (z 10,4002 da 12,3017 leja), Kyrhyzstan — 11,86% (z 39,4181 da 44,0917 soma), Uźbiekistan — 8,5% (z 1.393,0 da 1.511,4 suma), Ukraina — 3,7% (z 7,700 da 7,985 hryŭny), Rasija — 2,94% (z 29,3804 da 30,2442 rubla), Hruzija — 1,13% (z 1,6670 da 1,6858 łary) i Azierbajdžan — 0,26% (z 0,8010 da 0,8031 manata).
Nie źmianiŭsia kurs u Turkmienistanie (2,85 manata).
U Łatvii kurs dalara źniziŭsia na 1,21% (z 0,495 da 0,489 łata), Litvie — na 1,86% (z 2,4507 da 2,4052 lita), Estonii — na 2,16% (z 11,1052 da 10,8653 krony).
U samaabvieščanaj Prydniastroŭskaj Małdaŭskaj Respublicy, jakaja maje ŭłasnuju valutu, kurs dalara ŭzros na 6,24% (z 8,4715 da 9 rubloŭ).
Kurs dalara da biełaruskaha rubla ŭ śniežni 2009 hoda ŭzros na 2,91%. Heta piaty pakazčyk paśla Małdovy (10,77%), Estonii (4,46%), Łatvii (3,82%) i Litvy (3,54%). Aficyjnaja kaciroŭka amierykanskaj valuty pavialičyłasia taksama ŭ Rasii (na 1,43%), Hruzii (na 0,69%), Tadžykistanie (na 0,41%), Kyrhyzstanie (na 0,39%), va Uźbiekistanie (na 0,26%), u Azierbajdžanie (na 0,09%) i va Ukrainie (na 0,05%).
U Turkmienistanie kurs nie źmianiŭsia. Dalar patańnieŭ u Kazachstanie (na 0,24%) i Armienii (na 2,04%).
U 2008 hodzie Biełaruś zaniała dzieviataje miesca siarod krain SND i Bałtyi pa tempach rostu aficyjnaha kursu dalara da nacyjanalnaj valuty (na 2,33%).
Kamientary