Z 21 studzienia 2024 hoda dla vadzicielaŭ maršrutak ustupili ŭ siłu novyja patrabavańni — z hetaha času jany pavinny mieć staž nie mienš jak dva hady. Heta patrabavańnie pahražaje niekatorym kampanijam prypynieńniem dziejnaści, a ŭsioj śfiery — deficytam kadraŭ, piša Sputnik.
Pieravozčyk: treć vadzicielaŭ moža zastacca biez pracy
Namieśnik kiraŭnika adnoj z hrodzienskich firm, jakija ažyćciaŭlajuć pasažyrskija pieravozki, uvodzić u kurs spravy:
da 21 studzienia ŭ kampaniju mahli ŭładkoŭvacca vadzicieli biez stažu, ale tolki na maršruty, jakija absłuhoŭvajuć horad i pryharad. Pry hetym dvuchhadovuju vadzicielskuju praktyku ŭ abaviazkovym paradku pavinny byli mieć kiroŭcy, jakija pracujuć na mižharodnich rejsach.
Z 21 studzienia dla vadzicielaŭ maršrutak uviali dvuchhadovy staž na ŭsie vidy pieravozak — haradskija, pryharadnyja i mižharodnija. U mnohim hetaje patrabavańnie źviazała ruki pieravozčyku, pakolki bolšaja častka rejsaŭ prypadaje na horad.
«Zrazumieła, što na pracu my zaraz nie možam pryniać ludziej, u jakich niama stažu dva hady. A što tyčycca ŭžo kiroŭcaŭ, jakija byli pracaŭładkavany da ŭstupleńnia ŭ siłu źmien, — jak ź imi być? Nijakich aficyjnych kamientaroŭ i tłumačeńniaŭ pa hetym pytańni nie było. Tamu pakul pracujem», — adznačaje namieśnica kiraŭnika firmy Śviatłana.
Jana pryznajecca: kali zakon budzie mieć zvarotnuju siłu, kampanii daviadziecca zvolnić 15 z 43 vadzicielaŭ.
«My prosta spynimsia i nie zmožam paŭnavartasna pracavać», — miarkuje surazmoŭnica.
Pierš — adpracoŭka na aŭtobusie
Razam z tym, źviartaje ŭvahu namieśnik dyrektara kampanii, u novych praviłach
zusim admianili abaviazkovuju dvuchhadovuju vysłuhu dla vadzicielaŭ transpartnych srodkaŭ katehoryi M3 (vialikija aŭtobusy) — na ŭsie pieravozki, akramia mižnarodnych. Źniali navat abmiežavańnie pa ŭzroście: kali raniej da pracy dapuskalisia vadzicieli nie maładziejšyja za 21 hod, to zaraz rulić aŭtobusam mohuć 18-hadovyja maładyja ludzi, jakija tolki što skončyli aŭtaškołu abo kursy DTSAAF.
Na jaje dumku, novyja patrabavańni ŭviali ŭ suviazi z tym, što aŭtobusnyja parki krainy nie ŭkamplektavany vadzicielami.
«Atrymlivajecca, što zaraz vadziciel, jaki atrymaŭ katehoryju «D», moža napracavać nieabchodny staž na aŭtobusie i tolki potym uładkavacca na maršrutku», — kanstatuje Śviatłana.
Maršrutčykaŭ pieravablivajuć u inšyja śfiery
Staršynia Asacyjacyi prafiesijnych pieravozčykaŭ pasažyraŭ (APPP) Kaciaryna Stankievič havoryć:
zaraz na aŭtobusnyja pieravozki ŭ cełym pa krainie nie chapaje kala 60% vadzicielaŭ.
Kadravaja prablema, padkreślivaje jana, spałučana z dvuma asnoŭnymi faktarami. Pieršy: maršrutčykaŭ i kiroŭcaŭ aŭtobusaŭ pieravablivaje rynak taksi, pakolki ŭładkavacca tudy moža ci ledź nie luby žadajučy. Da taho ž, u hetaj śfiery jość mahčymaść zarablać «niefiksavanyja» hrošy.
«Tak, taksi taksama nialohkaja praca, i mnohija ŭmudrajucca sumiaščać hetuju pracu z asnoŭnaj dziejnaściu. Z asabistaha vopytu: mianie niejak vioz mašynist krana, jaki spačatku vosiem hadzin adpracavaŭ na kranie, paśla čaho pajšoŭ taksavać», — adznačaje Stankievič.
Druhi niemałavažny aśpiekt: šmatlikija kiroŭcy zjazdžajuć na zarobki za miažu.
Padvodziačy reziume, kiraŭnik APPP vykazała mierkavańnie, što ŭ cełym situacyja z zabiaśpiečanaściu vadzicielami na rynku pasažyrskich pieravozak u bližejšy čas moža pahoršycca.
«U lubym vypadku, ludzi sychodziać sa śfiery, i ich treba kimści zamianiać. Praz 6-7 miesiacaŭ my atrymajem prablemy.
Užo da siaredziny leta ja čakaju, što kadravaje pytańnie ŭ hetaj śfiery, kali ničoha nie budzie pryniata, stanie jašče vastrejšaje», — akcentuje kiraŭnik abjadnańnia pieravozčykaŭ pasažyraŭ.
Taksi taksama datyčycca
U Asacyjacyi pieravozčykaŭ i dyśpietčaraŭ Biełarusi (APID), tym časam, vykazvajuć zusim inšaje mierkavańnie: novaŭviadzieńni, źviazanyja z patrabavańniem mieć vadzicielam dva hady stažu, nakiravany na palapšeńnie jakaści i biaśpieki pieravozak.
«Uviadzieńnie hetaha patrabavańnia stanoŭča adabjecca na takich pieravozkach», — paviedamili tam i dadali, što ŭ asacyjacyju ŭžo źviarnułasia vialikaja kolkaść pieravozčykaŭ, ale mienavita ŭ śfiery taksi.
Sprava ŭ tym, što, zhodna z abnoŭlenymi Praviłami aŭtamabilnych pieravozak pasažyraŭ, jakija zapracavali z 21 studzienia, vadzicieli taksi abaviazany mieć siertyfikat ab adpaviednym navučańni.
«Pavodle našaj infarmacyi, užo jość pieravozčyki, jakija spyniajuć svaju dziejnaść u suviazi z abnaŭleńniem Praviłaŭ aŭtamabilnych pieravozak pasažyraŭ. Adnak tyja firmy, jakija chočuć pracavać, pradoŭžać svaju dziejnaść z zachavańniem pałažeńniaŭ, ukazanych u novaj redakcyi praviłaŭ», — adznačajuć u APID.
Ciapier čytajuć
Jak skłaŭsia los vypusknikoŭ, jakimi žurfak hanaryŭsia 10 hadoŭ tamu? Historyja adnaho ŭračystaha kałaža29
Kamientary