Hałoŭny redaktar litoŭskaj haziety Respublika nabivajecca na intervju da Łukašenki: «Pucin dla mianie drobny»
Razmaŭlać sa Śviatłanaj Cichanoŭskaj Vitas Tomkus nie choča.
Hałoŭny redaktar i ŭładalnik litoŭskaj haziety Respublika Vitas Tomkus spadziajecca asabista ŭziać intervju ŭ Alaksandra Łukašenki. Kab źviarnuć na siabie ŭvahu ŭładaŭ u Minsku, jon napisaŭ fieljeton, poŭny sumniŭnaha sarkazmu i, mabyć, zrazumiełaha litoŭskamu čytaču humaru, piša Reform.by.
U artykule jon paviedamiŭ, što źviarnuŭsia ŭ pasolstva Biełarusi z prośbaj ab intervju i atrymaŭ adkaz, što jahony list pieradadzieny ŭ administracyju Łukašenki. Jon nahadaŭ, što ŭ 2020 hodzie padčas masavych pratestaŭ jamu ŭ takim intervju admovili. Tady jon, pa jaho pryznańni, chacieŭ daviedacca ŭ Łukašenki, navošta biehać z aŭtamatam, kali možna ŭsich biełarusaŭ pasadzić na COVID-karancin.
Razmaŭlać Tomkus sa Śviatłanaj Cichanoŭskaj nie choča, bo jana jamu i tak «doraha abychodzicca».
«Kali b ja vielmi chacieŭ, ja moh by znajści na vakzale i tańniej», — vidać, hrebliva napisaŭ hałoŭred haziety Respublika.
Jamu zdajecca, što jahony ŭzrovień — tolki Łukašenka. Bo jany abodva «apošnija z mahikan», zajmajuć svaje pasady dziesiacihodździami.
Jašče adzin čałaviek, jaki, va ŭjaŭleńni Tomkusa, znachodzicca dzieści pobač — Takier Karłsan. Ale Tomkus adrazu papiaredžvaje, što jon nie Karłsan i pytacca ŭ Łukašenki pra historyju nie budzie. Dy i apošni hieroj amierykanskaha žurnalista drabnavaty dla hałoŭreda Respublika, ličyć Tomkus.
Mahčyma paśla takoha tekstu Vitas Tomkus moža raźličvać na aŭdyjencyju biełaruskaha kiraŭnika.
Łukašenka pavinšavaŭ litoŭcaŭ, a nie kiraŭnictva z nacyjanalnym śviatam i panarakaŭ na spynieńnie ekanamičnych suviaziaŭ
Bałtyja zastajecca chabam dla pastavak sankcyjnych tavaraŭ u Rasiju. Čamu z hetym ničoha nie robiać — Politico
U Litvie prapanavali pazbaŭlać dazvołaŭ na žycharstva biełarusaŭ, jakija čaściej čym raz na miesiac jeździać na radzimu
Kamientary