U Minsku pačynajecca zavočny sud za zryŭ refierendumu. Na virtualnaj łavie padsudnych Pavieł Libier, Alaksandr Dabravolski i Alena Žyvahłod
Jany, pavodle abvinavačańnia, «raspracavali płan pa zryvie respublikanskaha refierendumu ŭ 2022 hodzie».
U sudzie Zavodskaha rajona Minska 12 sakavika ŭ pracesie śpiecyjalnaj vytvorčaści (zavočna) pačynajecca razhlad kryminalnaj spravy ŭ dačynieńni da Aleny Žyvahłod, Paŭła Libiera, Paŭła Maryniča i Alaksandra Dabravolskaha, jakija, pavodle abvinavačvańnia, «raspracavali płan pa zryvie respublikanskaha refierendumu ŭ 2022 hodzie», piša «Viasna»
Usich čatyroch abvinavačvajuć pavodle č. 2 art. 191 Kryminalnaha kodeksa («pieraškoda pracy Centralnaj vybarčaj kamisii, a taksama kamisij pa refierendumie, ździejśnienym z užyvańniem pahrozy i inšym sposabam, hrupaj asob pa papiaredniaj zmovie»).
Spravu budzie razhladać sudździa Dźmitryj Łukaševič.
Śpiecvytvorčaść była raspačataja Śledčym kamitetam pa ŭzhadnieńni z hienprakuroram Biełarusi 27 śniežnia 2023 hoda, a ŭžo 22 lutaha spravu pieradali ŭ sud.
«Instytut śpiecyjalnaj vytvorčaści» byŭ uviedzieny ŭ 2022 hodzie. Jon dazvalaje vieści kryminalnuju spravu ŭ dačynieńni da abvinavačanaha, jaki «znachodzicca za miežami Biełarusi i ŭchilajecca ad jaŭki ŭ orhan, jaki viadzie kryminalny praces». Advakaty i pravaabaroncy ličać, što zavočnyja sudy parušajuć prava čałavieka na abaronu.
Pa materyjałach śledstva, fihuranty razam ź inšymi asobami ŭ studzieni-lutym 2022 hoda «ŭdzielničali ŭ raspracoŭcy i realizacyi adzinaha płana supraćpraŭnych dziejańniaŭ dla zryvu respublikanskaha refierendumu pa pytańni ŭniasieńnia źmianieńniaŭ i dapaŭnieńniaŭ u Kanstytucyju Biełarusi, pryznačanaha na 27 lutaha 2022 hoda. Zhodna z płanam, pa miescy pracy i žycharstva členaŭ Centrvybarkama i kamisij pa refierendumie pavinny byli nakiroŭvacca listy z tekstam, raspracavanym abvinavačanymi nie paźniej za studzień 2022 hoda».
Adznačajecca, što ŭ vyniku ŭ adras členaŭ CVK i kamisij pa refierendumie nakiravana nie mienš za 11 tys. listoŭ z pahrozami.
Alena Žyvahłod — kiraŭnica inicyjatyvaj «Sumlennyja ludzi», Alaksandr Dabravolski — palityk, staršy daradca Śviatłany Cichanoŭskaj, Pavieł Libier stvaryŭ płatformu dla hałasavańnia «Hołas», a Pavieł Marynič źjaŭlajecca kiraŭnikom «Małanka Miedyja».
Raniej pa hetym artykule (u tym liku) sudzili palitviaźniaŭ Siarhieja Cichanoŭskaha, Arcioma Sakava, Dźmitryja Papova, Ramana Karpuka.
Ciapier čytajuć
U Połk Kalinoŭskaha na tydzień pralez milicejski stukač. Ciapier jaho vykryli, i dobra vidać, chto sprabuje abialić ahienta10
Kamientary