Viarchoŭny sud ZŠA dazvoliŭ štatu Techas aryštoŭvać i sadžać mihrantaŭ
Viarchoŭny sud ZŠA dazvoliŭ uładam štata Techas prymianiać adzin z samych strohich imihracyjnych zakonaŭ, pryniatych za apošni čas.
Jon dazvalaje palicyi aryštoŭvać i pryciahvać da adkaznaści asob, jakija padazrajucca ŭ niezakonnym pierasiačeńni mieksikanskaj miažy. U Biełym domie zakon nazvali niekanstytucyjnym, piša Bi-bi-si.
Nielehalnaje pierasiačeńnie miažy ZŠA ŭžo źjaŭlajecca fiederalnym złačynstvam, ale spravy zvyčajna razhladajucca ŭ ramkach hramadzianskaha prava ŭ imihracyjnych sudach.
Adna z pryčyn, pa jakoj techaski zakon SB4 vyklikaje stolki sprečak, zaklučajecca ŭ tym, što sudy raniej pastanavili, što tolki fiederalny ŭrad moža zabiaśpiečvać zachavańnie imihracyjnych zakonaŭ krainy, a nie asobnyja štaty.
SB4 daje miascovym palicyjantam prava spyniać i aryštoŭvać luboha čałavieka, jaki padazrajecca ŭ niezakonnym pierasiačeńni miažy. U jakaści pakarańnia praduhledžany turemnaje źniavoleńnie abo štraf da 2 tysiač dalaraŭ.
Pakarańnie dla tych, chto niezakonna zajechaŭ u Techas paśla departacyi z ZŠA, budzie značna stražejšym — da 20 hadoŭ pazbaŭleńnia voli, u zaležnaści ad imihracyjnaj historyi i kryminalnaha bekhraŭndu čałavieka.
U aŭtorak Viarchoŭny sud pastanaviŭ, što novaja miera moža ŭstupić u siłu, pakul Apielacyjny sud u Novym Arleanie razhladaje jaje zakonnaść. Dniom raniej vyšejšaja sudovaja instancyja krainy časova prypyniła dziejańnie SB4.
Administracyja Džo Bajdena padvierhła hetaje rašeńnie rezkaj krytycy.
«SB4 nie tolki zrobić supolnaści ŭ Techasie mienš biaśpiečnymi, ale i ŭskładnić pracu dla pravaachoŭnych orhanaŭ, pasieje chaos i błytaninu na našaj paŭdniovaj miažy», — havorycca ŭ zajavie pres-sakratara Biełaha doma Karyn Žan-Pjer.
U toj ža čas prakuror Techasa Kien Pakstan nazvaŭ rašeńnie Viarchoŭnaha suda «vielizarnaj pieramohaj» nad administracyjaj Bajdena i Amierykanskim sajuzam hramadzianskich svabod (ACLU), jaki taksama asprečvaŭ zakon u sudzie.
«Jak zaŭsiody, dla mianie vialiki honar abaraniać Techas i jaho suvierenitet, a taksama vieści nas da pieramohi ŭ sudzie», — napisaŭ jon u sacsietcy X.
U ACLU zajavili, što «nie adstupiać, pakul hety ekstremalny antyimihrancki zakon nie budzie kančatkova admienieny».
Akramia taho, što SB4 parušaje paŭnamoctvy fiederalnaha ŭrada pa achovie miažy, jon moža paškodzić adnosinam ź Mieksikaj, jakaja taksama asudziła zakon, papiaredziła Ministerstva justycyi ZŠA.
Sprava vierniecca na razhlad kalehii z troch sudździaŭ Apielacyjnaha suda piataj akruhi ŭ Novym Arleanie. U taho boku, što prajhraŭ, znoŭ budzie mahčymaść źviarnucca ŭ Viarchoŭny sud.
Stała viadoma pra śmierć 22-hadovaha chłopca, jakoha asudzili pa palityčnaj kryminałcy2
Kamientary