Sistemu vypiski balničnych pa novych praviłach uviaduć z 1 lipienia

Spačatku źmieny chacieli ŭvieści z 1 studzienia 2024 hoda, ale spatrebiłasia bolš času, kab prateściravać uzajemadziejańnie pracadaŭcaŭ z Fondu sacyjalnaha strachavańnia i abarony nasielnictva, piša Onliner.by.

Źmieny ŭ vypłacie balničnych zakranuć absalutna ŭsich rabotnikaŭ i kožnaha pracadaŭcu — apošnich u krainie 250 tysiač, udakładniła Julija Bierdnikava. Z 1 krasavika pa 30 červienia FSAN budzie teściravać abmien źviestkami z usimi arhanizacyjami, da hetaha schiemu aprabavali ź piłotnaj hrupaj z 250 bujnych kampanij.

Voś asnoŭnyja novaŭviadzieńni, jakija čakajuć rabotnikaŭ

Pavialičycca siaredniadzionny zarobak dla raźliku balničnaha (ciapier nie ŭličvajucca razavyja vypłaty nakštałt matdapamohi, vypłaty na azdaraŭleńnie).

Dla padliku vypłat buduć uličvać 18 miesiacaŭ pierad kvartałam, u jakim rabotnik syšoŭ na balničny (ciapier uličvajuć 6 miesiacaŭ).

Źmienicca pamier dapamohi: 100% stračanaha zarobku budzie vypłačvacca ź pieršaha dnia, kali staž pracy 10 hadoŭ i bolš. Kali staž mienš za 10 hadoŭ, vypłata budzie 80%.

Minimalny balničny pryviažuć da minimalnaha zarobku. Ciapier minimałka — 626 rubloŭ.

Balničnyja buduć naličvacca tolki pa asnoŭnym miescy pracy, ale z ulikam zarobku va ŭsich pracadaŭcaŭ (ciapier balničny pryznačajecca pa kožnym miescy pracy).

Nakont apošniaha punkta varta pamiatać taki niuans: ciapier na adnu pracu možna prynieści listok pa časovaj niepracazdolnaści, a na inšyja prychodzić i atrymlivać zarobak.

Z 1 lipienia tak nielha, kali rabotnik atrymaŭ zarobak na adnoj z rabot, na balničny ŭ hety ž čas na inšaj pracy jon pretendavać nie moža.

Dla pracujučych piensijanieraŭ nijakich asobnych źmianieńniaŭ pa balničnych nie praduhledžana, jany buduć atrymlivać ich na ahulnych padstavach, udakładnili ŭ FSAN.

Pa danych Fondu, u siarednim pa krainie praciahłaść balničnaha składaje krychu mienš za 11 dzion, kožny miesiac vydajecca kala 300 tysiač listkoŭ niepracazdolnaści. Na vypłatu dapamoh u 2023 hodzie syšło 1,6 młrd rubloŭ, sioleta čakajuć, što suma budzie bolšaja: heta źviazana sa źmianieńniem padychodaŭ da vypłat z 1 lipienia.

Što kali ŭziać balničny, ale nie prynieści jaho na pracu?

— Balničny listok, pa-pieršaje, daje prava na vypłatu dapamohi pry peŭnych umovach, pa-druhoje, heta paćvierdžańnie taho, što rabotnik pa ŭvažlivaj pryčynie nie znachodziŭsia na pracoŭnym miescy.

Kali balničny ŭziaty ŭ vychodnyja dni, ale čałaviek adčuvaje, što jamu stała lepš i idzie ŭ paniadziełak na pracu, nie pradjaŭlajučy listok niepracazdolnaści, parušeńnia nijakaha niama. Balničny nie apłačvajecca i zastajecca ŭ hramadzianina, — rastłumačyli ŭ FSAN.

Pry hetym u fondzie adznačyli, što kali rabotnik sapraŭdy drenna siabie adčuŭ i pajšoŭ da lekara, to lepš zastavacca na balničnym, kab nie zarazić kalehaŭ.

• 1
• 0
• 0
• 1
• 0
• 2
• 1
• 0