U Prazie adkryli Biełaruski klub

Na prezentacyi prysutničała blizu 30 čałaviek ź liku emihrantaŭ, palituciekačoŭ, a taksama hramadzianaŭ Biełarusi, jakija pa pryvatnych ci słužbovych spravach znachodzilisia hetym časam u stalicy Čechii.

Inicyjataram zasnavańnia biełaruskaje kluboŭni ŭ Prazie staŭsia viadomy dziejač zamiežža Jurka Stankievič (syn Jana Stankieviča). U interviju Radyjo Racyja spadar Stankievič pryznaŭsia, što ideja kluboŭni naradziłasia z pryčyny razroźnienaści biełarusaŭ, jakija stała žyvuć u Prazie. Tamu adnoj z hałoŭnych metaŭ novastvoranaha centru musić stać zapačatkavańnie miesca, dastupnaha ŭsim biełarusam, niezaležna ad ichniaj arhanizacyjnaj prynaležnaści.

- Nie było miesca dzie źbiracca, - zaciemiŭ Jurka Stankievič. - Neŭtralnaha miesca, kab mahli źbiracca ludzi niezaležna ad taho, ź jakoj jany arhanizacyi.

Siarod zadačaŭ kluboŭni biełarusy ŭ Prazie bačać stvareńnie ŭłasnaj biblijateki, padrychtoŭku infarmacyjnych vydańniaŭ, ładžańnie kursaŭ dla darosłych i škołki dla dzietak.

Aficyjnaje adkryćcio biełaruskaje kluboŭni prajšło ŭ vyhladzie nievialičkaha furšetu. Svaje vieršy prysutnym čytaŭ małady paet ź Biełarusi Hleb Łabadzienka. Centralnaj ža častkaj imprezy stałasia prezentacyja mastaka Alesia Puškina, jaki hetymi dniami haściavaŭ pa pryvatnym zaprašeńni ŭ Prazie. Mastak raspavioŭ prysutnym pra svaje ŭražańni ab Čechii i pakazaŭ tvorčyja raboty, napisanyja tut.

- Ja tut adzin, pryjechaŭ pa pryvatnamu zaprašeńniu i tutaj pravioŭ užo 20 dzion, - skazaŭ dla Radyjo Racyja Aleś Puškin. - Naviedaŭ Kutnu haru, zamak u Karłštejnie, pišu niekatoryja pracy, pačaŭ pisać 7 rabot. Uražańni ab Čechii, ab jaje zamkach – ja užo treci raz u Čechii – vielmi cudoŭnyja… Ja pryjaždžaju siudy jak turyst. Adzin raz ceły miesiac byŭ u českim Krumłavie, druhi raz – u samoj Prazie... Schadziŭ na vystavy, kancerty.

Siarod karcinaŭ Alesia Puškina – abraz madony Kutnaj hary, jaki naradziŭsia pad uražańniem ad naviedvańnia českaha miastečka Kutna hora. Kaliści tut u 14 stahodździ zahinuła šmat ludziej, tamu mastak namalavaŭ ciažarnuju madonu, jakaja svaim pokryvam achinaje achviaraŭ i takim čynam pieramahaje śmierć. Jašče adzin tvor uźnik paśla naviedvańnia horada Karłštejna. Pavodle historykaŭ, tut kaliści vajavaŭ biełaruski kniaź Žyhimont Karybutovič, tamu ŭjaŭleńnie mastaka naradziła karcinu z vyjavaj kniazievaj kachanki. Aleś Puškin taksama prezentavaŭ šerah klipaŭ pavodle svaich perfomansaŭ roznych hadoŭ, a taksama słajdy i fotazdymki.

Aleś Puškin zaśviedčyŭ, što niahledziačy na haścinnaść i pryhažość Čechii, jon usio roŭna z radaściu viartajecca na radzimu, u Biełaruś, dzie jaho čakaje siamja i hramadzkija abaviazki.

- Heta moj śviadomy vybar - žyć na radzimie, - dadaŭ Aleś Puškin. - Ja nie ŭjaŭlaju siabie tutaj – badaj tolki ŭ jakaści turysta. Voś pryjaždžaju siudy, hladzieć hetuju pryhožuju Prahu, ale śviadoma viartajusia kožny raz u rodny Bobr, śviadoma budu tym žyć i malavać, i chacieŭ by, kab i maje pracy byli na radzimie. Nie imknusia ich tut pradavać.

Akramia taho, mastak zaklikaŭ usich stavicca da kluboŭni stvaralna, kab biełaruski centar u Prazie staŭsia sapraŭdnym nacyjanalnym hramadzka-kulturnym asiarodkam

Radyjo Racyja

• 0
• 0
• 0
• 0
• 0