Niaviestka Łukašenki atrymała ŭ Rasii dypłom na premii «Šanson hoda — 2024»
Adna z samych praduktyŭnych aŭtaraŭ Biełarusi Hanna Siałuk (pad hetym psieŭdanimam piša pieśni niaviestka Łukašenki) atrymała čarhovuju premiju. Vy budziecie ździŭleny, ale zaraz uznaharodu joj vypisaŭ nie śviokar. Atrymać dypłom Hanna pajechała ŭ Maskvu.
Rasijskaje «Radyjo Šanson» praviało svaju tradycyjnuju cyrymoniju ŭznaharodžańnia «Šanson hoda — 2024». Mierapryjemstva adbyłosia ŭ Maskvie ŭ šmatfunkcyjanalnym centry «Live Arena». Viali imprezu śpiavak Alaksandr Maršał i aktrysa Alaksandra Rabianok.
Watch on TikTok
Hanna asabista pryjechała na cyrymoniju ŭznaharodžańnia ŭ Rasiju. Na fota ź mierapryjemstva jana paziruje razam sa śpievakom Rusłanam Alachno, jaki atrymaŭ statuetku. Siałuk dapamahała Alachno pracavać nad jaho albomam «A my budziem ščaślivymi». Sam artyst nazyvaje jaho pryznańniem u lubovi da svajoj siamji.
Na dypłomie, jaki piaščotna i trapiatliva Hanna trymaje ŭ rukach, paznačana: «Za tvorčy ŭniosak u raźvićcio sučasnaj muzyčnaj kultury». Na svajoj staroncy ŭ instahram Siałuk napisała padziaku kalektyvu «Radyjo Šanson» — kolkaść kličnikaŭ u tekście zaškalvała. U kamientaryjach užo pačaŭsia pierapis praŭładnych artystaŭ — usie imknucca chutčej pavinšavać aŭtarku piesień. Najbolš addanyja (naprykład, Alaksadra Mielech, jakaja śpiavaje pieśniu «Ach, Alaksandr!» — pryznańnie ŭ kachańni Łukašenki) navat stali repościć dopis Siałuk sabie ŭ storys.
Darečy, siarod tych, chto atrymaŭ šanson-uznaharodu, akazaŭsia i «biełaruski miljanier, jaki śpiavaje» — Vasil Suško. Pra niebanalny šlach na scenu artysta, jaki prezientuje siabie jak «brutalny, charyzmatyčny mužčyna nie tolki ź miljonnym rachunkam u banku, ale i z ramantyčnaj dušoj», «Naša Niva» raspaviadała raniej.
U svaim instahramie Suško paviedamiŭ, što łaŭreatam u adnoj z naminacyj jon staŭ dziakujučy pieśni «Staranisia, nuda!».
Anžalika Mielnikava tydzień praviała na Šry-Łancy i vylecieła ź dziećmi ŭ Dubaj37
Kamientary