20 žniŭnia 2006 h. u parafii Najśviaciejšaj Trojcy ŭ Klecku adbyłasia zakładka vuhłavoha kamienia pad pabudovu novaha parafijalnaha kaścioła. Hetuju ŭračystaść uznačaliŭ Apostalski Administratar Minska-Mahiloŭskaj archidyjacezii biskup Antonij Dziamjanka.
20 žniŭnia 2006 h. u parafii Najśviaciejšaj Trojcy ŭ Klecku adbyłasia zakładka vuhłavoha kamienia pad pabudovu novaha parafijalnaha kaścioła. Hetuju ŭračystaść uznačaliŭ Apostalski Administratar Minska-Mahiloŭskaj archidyjacezii biskup Antonij Dziamjanka.
Kaścioł u honar Najśviaciejšaj Trojcy isnavaŭ u Klecku z 1459 h. U pieryjad pamiž suśvietnymi vojnami miascovaja parafija naličvała kala piaci tysiač viernikaŭ. Ciažki los vypaŭ hetaj supolnaści: padčas hitleraŭskaj akupacyi byli rasstralany kleckija śviatary, a ŭ 1953 h. ateistyčnyja savieckija ŭłady ŭzarvali staražytnuju śviatyniu. Na praciahu doŭhich dziesiacihodździaŭ kataliki Klecka i navakolnych parafij nie mieli ni kaściołaŭ, ni śviataroŭ.
Z pačatkam pierabudovy miascovyja vierniki pačali pradprymać zachady pa viartańni adzinaha acalełaha ŭ horadzie kaścioła – byłoha daminikanskaha. Adnak nasupierak łohicy i histaryčnaj spraviadlivaści miascovyja ŭłady čamuści vyrašyli pieradać katalickuju śviatyniu pravasłaŭnym… Ale katalickija vierniki Klecka, jakija z časoŭ vajny zastavalisia biez dušpastyra, nie zdalisia i vyrašyli budavać novy kaścioł na terytoryi, vydzielenaj haradskimi ŭładami.
Namahańniami kleckaha probašča ks. Ervina Viačorka MSF byŭ zakładzieny fundamient novaj śviatyni, uźviedzieny mury, a taksama častkova viežy, i nakryty dach. U kaściole ŭžo navat źjavilisia šyby. Adnak pakul što parafijanie molacca u časovym draŭlanym budynku, raźmieščanym niepadalok.
Mienavita tam biskup Antonij Dziamjanka celebravaŭ u niadzielu ŭračystuju śviatuju Imšu, paśla jakoj usie jaje ŭdzielniki ŭ pracesii nakiravalisia da budoŭli. Za kryžam pradstaŭniki troch pakaleńniaŭ – maleńki chłopčyk, suženskaja para i pažyłyja asoby – nieśli try cahliny z muroŭ zrujnavanaha ateistyčnymi savieckimi ŭładami kaścioła Najśviaciejšaj Trojcy. Hetyja histaryčnyja cahliny byli zakładzieny ŭ mury novaj kleckaj śviatyni, dzie miascovyja vierniki zmohuć źbiracca na śviatuju Eŭcharystyju i prymać inšyja sakramenty.
Paśla zakładki cahlin biskup Antonij Dziamjanka vykazaŭ ščyruju padziaku ŭsim, chto ŭziaŭ na svaje plečy kłopat pa adradžeńni kaścioła ŭ Klecku, i vykazaŭ nadzieju na toje, što chutka ŭžo pryjdzie toj čas, kali vierniki buduć malicca ŭ pryhožaj i prastornaj śviatyni, taksama, jak i ich prodki na praciahu mnohich stahodździaŭ. Na malitvu ich budzie sklikać huk staražytnaha zvona vahoju amal u tonu, jaki zachoŭvaŭsia ŭ dziaržaŭnym muziei i niadaŭna byŭ viernuty prafii. Tady nazaŭsiody adyduć u historyju časy, kali kleckija vierniki vymušany byli tulicca ŭ maleńkaj chacincy, jakaja na doŭhija hady stała dla ich miescam malitvy.
Kamientary