«Abychodziacca z nami, jak z terarystami». Biełarusu z Sarbony admovili ŭ vałanciorstvie na Alimpijadzie
Jon ličyć, što atrymaŭ admovu z-za pašparta.
Biełaruski student Sarbony Dźmitryj Šalapin daŭno maryŭ papracavać vałancioram na Alimpijskich hulniach. 19-hadovy chłopiec padaŭ zajaŭku ŭ arhkamitet Hulniaŭ-2024 u Paryžy. Ale atrymaŭ admovu.
Anałahičnyja paviedamleńni ad arhanizataraŭ atrymlivajuć i inšyja ŭładalniki biełaruskich i rasijskich pašpartoŭ, piša channelnewsasia.com.
«Jany abychodziacca z nami jak z terarystami», — adznačyŭ biełaruski student adnoj z samych prestyžnych VNU śvietu.
Hramadzianka Rasii Dyjana, jakaja žyvie ŭ Francyi i pracuje ŭ miascovaj kampanii, zimoj atrymała paviedamleńnie, što jaje vybrali vałancioram. Jana navat paśpieła źjeździć na niekalki navučańniaŭ dla vałancioraŭ Alimpijady-2024.
Ale zatym jana atrymała jašče adzin list ad arhanizataraŭ. U im havaryłasia, što žančyna nie prajšła pravierku biaśpieki. U arhkamitecie adznačyli, što nie viedajuć kankretnaj pryčyny, ale bolš nie mohuć ź joj supracoŭničać.
Dyjana raskazała, što ź joj źviazalisia bolš za 20 čałaviek, jakija atrymali anałahičnyja listy. Jany dumajuć padać u sud na MUS Francyi. Prablemy z pravierkaj biaśpieki ŭźnikli ŭ dziasiatkaŭ uładalnikaŭ rasijskich i biełaruskich pašpartoŭ. Jany ličać, što admovy ŭ apošni momant źviazanyja mienavita z hramadzianstvam.
Viadomy vypadak admovy žančynie, jakaja zdała rasijski pašpart. 45-hadovaja rasijanka — vykładčyca francuzskaj movy — paśla pačatku poŭnamaštabnaj vajny atrymała ŭ Francyi prytułak. Jana chacieła papracavać vałanciorkaj, kab addać doŭh krainie, jakaja jaje pryniała. Adnak jana taksama atrymała admovu praz prablemy ź biaśpiekaj.
U MUS zajaŭlali, što pravierki pravodziać usie, u vyniku takich pravierak było adsiejana jak minimum 800 čałaviek. Kankretnyja kiejsy ŭ Ministerstvie kamientavać admovilisia.
Nie razmaŭlać, dystancyjavacca: va Ukrainie vypracavali rekamiendacyi pa kantaktach ź biełarusami i rasijanami na Alimpijadzie
Łukašenka pra ŭdzieł biełaruskich spartoŭcaŭ u Alimpijadzie: Nabicie im mordu
Skakun Maksim Niedasiekaŭ pra Alimpijadu: Jak biełarusy pajeduć u Paryž? Dzie buduć žyć? I na pratesty nielha zapluščvać vočy
Ukraina patrabuje nie dapuskać da Alimpijady-2024 biełarusku. U čym pytańnie?
Kamientary