U Minsku bieźbiletny piensijanier mocna źbiŭ kantralorak pałkaj dla zboru śmiećcia
Sud vynies prysud 63-hadovamu žycharu stalicy, jaki źbiŭ pałkaj kantralorak hramadskaha transpartu, paviedamlaje ahienctva «Minsk-Naviny».
Mužčyna jechaŭ napadpitku ŭ aŭtobusie, majučy pry sabie pałku dla zboru śmiećcia ź mietaličnymi nakaniečnikami. Raptam u aŭtobus uvajšli try žančyny-kantralorki, jakija, praviarajučy kvitki, vyśvietlili, što pasažyr jedzie zadarma.
Kantralorki paprasili piensijaniera vyjści z sałona na najbližejšym prypynku. Jon razzłavaŭsia, adnak vyjšaŭ. Paśla ž, prajšoŭšy pieššu da nastupnaha prypynku, znoŭ sustreŭsia z hetymi ž kantralorkami. I tak było niekalki razoŭ.
Kali rabotnica «Minsktransa» čarhovy raz pieraškodziła jamu sieści ŭ aŭtobus, mužčyna trojčy ŭdaryŭ jaje svajoj pałkaj, taksama chapaŭsia rukami i skinuŭ na asfalt akulary.
Kantralorki vyklikali milicyju, adnak debašyr vyrašyŭ schavacca. Kab hetaha nie dapuścić, žančyny pajšli śledam za im, adnak dziadula paviarnuŭsia i ŭ adnoj z kantralorak sarvaŭ z kamizelki videarehistratar, kinuŭ jaho na asfalt, a zatym pasprabavaŭ udaryć supracoŭnicu pałkaj pa hałavie. Taja pierachapiła pałku rukoj, atrymaŭšy pry hetym pierałom.
U vyniku piensijaniera zatrymali, u dačynieńni da jaho raspačali kryminalnuju spravu. Vinu raniej nie sudzimy miančuk całkam pryznaŭ, u zroblenym raskajaŭsia.
Sud pryznačyŭ debašyru 2 hady «chatniaj chimii» i kurs prymusovaha lačeńnia ad ałkahalizmu. Akramia taho, na karyść paciarpiełych spahnanaja kampiensacyja maralnaj škody — 500 i 2000 rubloŭ — i škody za sapsavanuju majomaść «Minsktransa».
Kamientary