Bieź śviatła, vady i chrama žyvie ŭ Minsku Kapiełan Papy Rymskaha
U niadzielu 26 maja adzin z najstarejšych śviataroŭ Minska-Mahiloŭskaj archidyjacezii ksiondz kanonik Uładzisłaŭ Zavalniuk adznačaje 50-hodździe śviatarstva.
Adzin z samych viadomych i pavažanych katalickich śviataroŭ Biełarusi ksiondz Uładzisłaŭ Zavalniuk 26 traŭnia adznačaje 50-hodździe śviatarskaha paśviačeńnia. Da hetaj daty Papa Rymski Francišak nadaŭ jamu — pa prośbie Mitrapalita Minska-Mahiloŭskaha arcybiskupa Juzafa Stanieŭskaha — tytuł Kapiełana Jaho Śviataści, što źjaŭlajecca vyrazam pryznańnia vialikich zasłuhaŭ pierad Kaściołam.
Adnak z nahody jubileju i novaha tytułu śviatar nie ładzić vialikaha śviatkavańnia, bo ličyć heta absurdnym i niesvoječasovym, raspaviali Katolik.life vierniki.
Ksiendz Uładzisłaŭ Zavalniuk — šmathadovy probašč parafii śviatoha Symona i śviatoj Aleny ŭ Minsku (Čyrvonaha kaścioła). Praŭda, u apošnich aficyjnych paviedamleńniach hetu pasadu nie ŭkazvajuć.
«Ty pavinien śviatkavać hety jubilej u Čyrvonym kaściole. Na žal, nie možaš hetaha zrabić. Nie pabajusia skazać — usie atasajamlajuć Čyrvony Kaścioł z ksiandzom Zavalniukom. Spadziajusia, heta prablema budzie vyrašana. Kali nie siońnia, to ŭ inšy dzień», — źviartaŭsia da ksiandza Uładzisłava padčas uračystaj cyrymonii arcybiskup emeryt Tadevuš Kandrusievič.
Čyrvony kaścioł zakryty ŭžo bolš za paŭtara hoda pa sumnieŭnaj pryčynie, abiacanyja pracy pa ramoncie, jakija miascovyja ŭłady anansavali ŭ pieršym kvartale 2024 hoda, nie pačalisia i ŭ kancy traŭnia.
«Kaścioł nichto adkryvać nie źbirajecca. Dyk što adznačać — što śviatara-jubilara nie puskajuć u rodny chram? Nijakich prykmietaŭ pačatku ramontu my nie bačym», — adznačajuć u parafii.
Pa-raniejšamu ŭvieś hety čas i probašč, i inšyja śviatary, i parafijanie molacca ŭ plabanii — nievialikim budynku pobač z kaściołam, jaki ŭdałosia adstajać. Adnak pamiaškańnie adklučanaje ad usich vyhod, tut niama ni vady, ni elektryčnaści. U takich umovach Papski Kapiełan vymušany ažyćciaŭlać svaju dziejnaść.
Štodnia paśla śviatoj Imšy na 15.00 ŭ katedralnym kaściole (tut ciapier vymušana prachodziać słužby dla parafii zakrytaha chrama) ksiondz Uładzisłaŭ dziažuryć u plabanii, kali nie znachodzicca ŭ adjeździe. Taksama štodzionna jon abychodzić Čyrvony kaścioł z malitvaj Ružanca. U plabanii arhanizavana kruhłasutkavaje dziažurstva, tam jość kaplica z Najśviaciejšym Sakramentam.
Parafijanie zapłanavali vinšavańnie śviatara ź jubilejem na śviatoj Imšy ŭ 15.00 ŭ katedralnym kaściole 26 traŭnia.
Ksiondz Uładzisłaŭ z samaha pačatku słužeńnia sustrakaŭsia ź ciskam śvieckich uładaŭ — jamu zabaraniali słužyć, užyvali ŭ dačynieńni da jaho karnuju psichijatryju.
8 lipienia ksiandzu Uładzisłavu spoŭnicca 75-hadoŭ.
Minskaja nastaŭnica zvolniłasia sa škoły za 3 miesiacy da kanca adpracoŭki. Kolki pryjšłosia zapłacić?26
Kamientary
odnaždy odnokašniki sprašivajut u nieho -
syn katoličieskoho śviaŝieńnika , a kak ty chodiš na diskotieki ?
cha . - hovorit syn katoličieskoho śviaŝieńnika - batia otkryvajet jaŝik [dla požiertvovanij] i otsypajet na diskotieki mnie