Siońnia ŭ Bruseli abmiarkoŭvaŭsia farmat udziełu šaści krain «Uschodniaha partniorstva» ŭ Parłamienckaj asamblei «Uschodniaha partniorstva».
Siońnia ŭ Bruseli adbyłasia sustreča Biuro Jeŭraniesta, na jakoj abmiarkoŭvaŭsia farmat udziełu šaści krain «Uschodniaha partniorstva» ŭ Parłamienckaj asamblei «Uschodniaha partniorstva» (EURONEST PA, EU‑Neighborhood East Parliamentary Assembly).
Jeŭradeputat Jacek Saryjuš‑Volski skazaŭ, što ŭ Jeŭraniest zaprosiać pa 10 deputataŭ z Armienii, Azierbajdžana, Hruzii, Małdovy i Ukrainy, a ź Biełarusi — 10 naziralnikaŭ ad apazicyjnych siłaŭ i ad hramadzianskaj supolnaści.
Spadar Saryjuš‑Volski dadaŭ, što
pakul u Biełarusi nie budzie demakratyčna vybranaha i mižnarodna pryznanaha parłamienta, u Jeŭraparłamiencie Biełaruś buduć pradstaŭlać tolki naziralniki.
Jeŭradeputat taksama paviedamiŭ, što Jeŭraparłamient maje namier vysłać misiju ŭ Biełaruś, chutčej za ŭsio ŭ lutym, kab vyznačyć skład hrupy naziralnikaŭ, jakaja budzie pradstaŭlać Biełaruś u Jeŭranieście.
Nakont taho, pavodle jakich praviłaŭ sfarmujecca zhadanaja hrupa biełaruskich naziralnikaŭ u Jeŭranieście, Saryjuš‑Volski skazaŭ nastupnaje:
«Ahulna kažučy, ideja ŭ nas takaja, kab zaprasić pa adnym pradstaŭniku ź piaci apazicyjnych partyj — kamunistaŭ, sacyjał‑demakrataŭ, kansiervataraŭ, libierałaŭ i chryścijanskich demakrataŭ — dy piać pradstaŭnikoŭ hramadskich ruchaŭ, takich jak Ruch za Svabodu, niezaležnyja žurnalisty, niezaležnyja prafsajuzy, relihijnyja mienšaści, nacyjanalnyja mienšaści. Heta papiaredniaja kancepcyja, jakaja budzie abmiarkoŭvacca padčas pracy misii Jeŭraparłamienta ŭ Biełarusi».
Pieršaje pasiedžańnie Parłamienckaj asamblei «Ŭschodniaha partniorstva» pryznačana na 24 sakavika.
Babaryka try chviliny adkazvaŭ na pytańnie, čyj Krym. Tak i nie adkazaŭ89
Kamientary