«Z hetym čałaviekam možna mieć spravu». Z kim u atačeńni Pucina Zachad hatovy budzie havaryć paśla vajny
Bloomberg i The Economist z roźnicaj u tydzień apublikavali vialikija artykuły pra kiraŭnicu centralnaha banka Rasii Elviru Nabiulinu. Surazmoŭcy abodvuch vydańniaŭ adznačajuć, što ŭ rasijskaj palityčnaj sistemie Nabiulina — adna ź niamnohich, chto moža havaryć z Uładzimiram Pucinym adkryta i vykazvać «toje, što jamu nie padabajecca».
«Mieduza» pierakazvaje asnoŭnaje z hetych artykułaŭ.
Bloomberg nazyvaje kiraŭnicu Centrabanka «kanstantaj», jakaja zastajecca pobač z prezidentam ciaham apošniaha dziesiacihodździa, i «anamalijaj, jakuju Pucin imkniecca abaranić». Adnak kiravańnie «vajskovaj mašynaj» va ŭmovach rostu vydatkaŭ robiać pracu Nabiulinaj usio bolš składanaj, a budučynia rasijskaj ekanomiki, jakuju kiraŭnica Centrabanka vymušanaja ŭtrymlivać, paśla vajny vyhladaje ŭsio bolš niavyznačanaj.
Pucin «šanuje parady Nabiulinaj i daviaraje im», a jaje prysutnaść razhladaje jak mahčymaść zbałansavać svaju ekanamičnuju kamandu, asnoŭnyja ŭdzielniki jakoj aktyŭna padtrymlivajuć vajskovuju rytoryku, raspaviadajuć krynicy Bloomberg. Siarod takich udzielnikaŭ vydańnie nazyvaje ministra finansaŭ Antona Siłuanava, jaki kaža pra «biudžet pieramohi», i byłoha pamočnika Pucina ŭ ekanamičnych pytańniach Maksima Areškina, jaki nazyvaje vajnu «hłabalnym kanfliktam z Zachadam praz Ukrainu».
«Elvira maje vyklučnaje prava skazać prezidentu toje, što jamu nie padabajecca. Jana moža adkryta kazać pra situacyju, i jon heta prymaje»,
— ličyć były pieršy namieśnik staršyni Centrabanka Aleh Vjuhin.
Uspaminajučy karjerny šlach Nabiulinaj, Bloomberg adznačaje, što jana trapiła ŭ pole zroku Pucina ŭ 2006 hodzie, kali adkazvała za padrychtoŭku paradku sustrečy «Vialikaj vaśmiorki» ŭ Maskvie. U 2008 hodzie Nabiulina stała ministram ekanamičnaha raźvićcia, a ŭ 2013-m uznačaliła Centrabank. U sakaviku 2022-ha, praktyčna adrazu paśla pačatku poŭnamaštabnaj vajny va Ukrainie, jana była pieranaznačanaja na svoj treci piacihadovy termin.
«Jana čalec kamandy Pucina, jakaja vyrazna vykonvaje svaju rolu, ale ŭ jaje bolšaja stupień svabody, čym va ŭrada», — miarkuje Vjuhin. Pry hetym, jak adznačaje były pieršy namieśnik staršyni Centrabanka, u Nabiulinaj «jość zdolnaść być niezaležnaj dziakujučy svajmu charaktaru», i na jaje «možna spadziavacca».
Paśla pačatku poŭnamaštabnaha ŭvarvańnia Rasii va Ukrainu Nabiulina źviarnułasia da supracoŭnikaŭ sa słovami ab «zusim niestandartnaj situacyi», jakoj «nichto nie chacieŭ», i zaklikała «pakinuć lubyja roznahałośsi», kab «dapamahać kaleham» i pracavać. Pavodle infarmacyi Bloomberg, tady ž u razmovie z supracoŭnikami Nabiulina nazvała hałoŭnaj misijaj Centrabanka praduchileńnie ekanamičnaha kałapsu, jaki, pavodle jaje słoŭ, zdolny pryvieści da palityčnaha chaosu — takoha jak paśla raspadu SSSR u 1990-ch hadach. Kalehi kiraŭnika CB uspaminajuć jaje pieraściarohu ab tym, što ŭrad, jaki znachodzicca ŭ ciažkim finansavym stanoviščy, «biez vahańniaŭ vykaranić toje, što zastałosia ad svabody ŭ Rasii».
Byłaja daradca pa Rasii ŭ Radzie nacyjanalnaj biaśpieki ZŠA Fijona Chił miarkuje, što
Nabiulina moža stać «mostam pamiž Rasijaj i suśvietnaj ekanomikaj», kali Zachad znoŭ pačnie naładžvać stasunki z Rasijaj — a heta, na dumku Chił, «adbudziecca rana ci pozna, kali vajna skončycca». Nabiulina moža akazacca čałaviekam, ź jakim, na dumku Zachadu, «možna mieć spravu», miarkuje Chił.
USU rajać žycharam Biełharadskaj vobłaści vyviešvać žoŭta-błakitnyja ściahi ci pisać BNR, kab paźbiehnuć atak dronaŭ2
Kamientary
Niemudrahielistaja kambinacyja, paŭzirajemsia, ci paviadziecca spadar Ŭładzimier na chibny zamach pra najaŭnaść kankurentki ŭ jahonym atačeńni