U Hrodnie razhareŭsia ziamielny skandał

ABEZ Hrodna zacikaviŭsia abstavinami vydzialeńnia ŭ centry horada ŭčastkaŭ ziamli koštam kala paŭmiljona dalaraŭ. Pad udaram apynulisia kiraŭniki har-i abłvykankama.

Jak stała viadoma «Ježiednievniku», havorka idzie pra dva rašeńni harvykankama Hrodna, zhodna jakich STAA «Firma taksapark» atrymała ŭ stałaje karystańnie dva ŭčastki ziamli faktyčna ŭ centry Hrodna. Pieršaje rašeńnie było pryniataje ŭ listapadzie 2001 hoda, druhoje — u lutym 2004-ha. Akurat u toj čas, kali Hrodzienskaj vobłaściu pačaŭ kiravać Uładzimir Saŭčanka. Košt učastkaŭ, pa acency ABEZ, skłaŭ bolš za 1,4 młrd rubloŭ. Praŭda, jašče raniej abstaviny vydzialeńnia ŭčastka ziamli praviaraŭ KDK, i jon acaniŭ učastki ŭ 111 młn rubloŭ.

STAA «Firma taksapark» vielmi dobra viadomaja ŭ Hrodnie. Kampanija akazvała transpartnyja i turystyčnyja pasłuhi dla arhanizacyj i pryvatnych asob, u tym liku arhanizoŭvała pajezdki na aŭtobusie «Nieapłan» u Chmialnicki, ekskursijnyja tury ŭ Kijeŭ, Sankt-Pieciarburh, Lvoŭ, pa Załatym kołcy Rasii, adpačynak na turbazy «Sokał Hara» ŭ Smalensku , rehularny rejs Hrodna-Varšava-Hrodna, pradavała aŭtobusnyja bilety ŭ inšyja krainy Jeŭropy.

Charakterna, što za minułyja 9 i 5 hadoŭ rašeńni ab vydzialeńni ziamli STAA «Firma taksapark» nie adnojčy praviaralisia i kožny raz pryznavalisia pravamiernymi.

Jak kažuć u Hrodnie, usia sutnaść u tym, što rašeńnie prymałasia nie ŭ harvykankamie. Adpaviednaje rasparadžeńnie pastupała z abłvykankama. Voś tolki ad kaho? Nibyta chtości z kabinieta staršyni abłvykankama mieŭ blizkija suviazi z uładalnikami bujnoj pryvatnaj kampanii. Pahavorvajuć navat, što mienavita z hetym ziamielnych skandałam, jaki ABEZ raskruciŭ akurat u studzieni, i źviazana adstaŭka kiraŭnika vobłaści Uładzimira Saŭčanki.

Praŭda heta ci nie, pakul skazać składana, ale zaraz supracoŭniki ABEZ staranna vyvučajuć abstaviny vydzialeńnia ziamli ŭ Hrodnie i biaruć tłumačeńni va ŭsich, chto mieŭ da hetaha niejkija adnosiny. Akramia hetaha, ABEZ užo ŭdałosia damahčysia admieny raniej pryniatych rašeńniaŭ ab vydzialeńni ŭčastkaŭ jak niezakonnych, što vyvodzić skandał na pryncypova novy ŭzrovień.

Pa-pieršaje, u vielmi niepryjemnuju situacyju traplaje STAA «Firma taksapark». Za 9 i 5 hadoŭ, jakija prajšli z času vydzialeńnia ziamli, na abodvuch učastkach byli ŭźviedzienyja abjekty nieruchomaj majomaści, ź jakimi zaraz nie zrazumieła, što rabić. Pakolki rašeńni ab vydzialeńni ziamli pryznanyja niezakonnymi, to i niezakonnymi źjaŭlajucca pabudavanyja na ich abjekty, jakija ciapier treba nibyta znosić.

Pa-druhoje, sam fakt pryznańnia rašeńniaŭ niezakonnymi kaža ab tym, što mieli miesca karupcyjnyja damoŭlenaści z kimści z kiraŭnictva horada abo vobłaści. Tamu za pryniatyja rašeńni ŭ lubym vypadku chtości pavinien adkazać.

Jak udałosia daviedacca «Ježiednievniku», kryminalnyja spravy pakul nie raspačali, ale sam

ziamielny skandał padniaŭ u vobłaści surjoznuju antykarupcyjnuju chvalu. Pad jaje trapiŭ były kiraŭnik vobłaści U. Saŭčanka ci nie, u dadzienym vypadku nie tak i važna. Kudy cikaviej inšaje — chto stanie toj fihuraj, na jakuju ŭsie hetyja karupcyjnyja

dziejańni śpišuć?

I ŭsio ž, u spravie vielmi šmat niezrazumiełaha. Acenka ŭčastka z boku MUS i KDK čamuści adroźnivajecca ŭ niekalki razoŭ. Dy i sam jon ujaŭlaje saboj vielmi sumnieŭnuju kaštoŭnaść, navat u jakaści karupcyjnaha abjekta. Ziamla ŭ 0,3 ha, ab jakoj idzie havorka — heta nie toj abjekt, na jakim možna raskrucić karupcyjny skandał i ź jakim stanie źviazvacca kiraŭnik vobłaści. Ale tym časam, chvala padniałasia i niezrazumieła čamu?

Hladzi jašče:
Saŭčanka padaŭ u adstaŭku

• 0
• 0
• 0
• 0
• 0
• 0