Ihar Račkoŭski: Miaža stała apieratyŭnaj, zručnaj, vietłaj i dabrejšaj
«Miažu Biełarusi ź Jeŭrasajuzam pierasiakać bolš kamfortna, čym z Rasijaj, jakoj nibyta niama».
Staršynia dziaržaŭnaha pamiežnaha kamitetu Ihar Račkoŭski 29 studzienia padvodziŭ vyniki pracy biełaruskich pamiežnikaŭ za minuły hod.
Jon paviedamiŭ, što apošnija dva hady adbyvajecca reforma pamiežnaj sistemy. Pa słovach, Račkoŭskaha pieršapačatkova biełaruskija pamiežniki pracavali pa staroj savieckaj tradycyi, jakaja zasnavanaja na abmiežavańniach i zabaronach. Ciapier ža pryjšoŭ čas złamać staryja stereatypy i źmianić padychody.
I na dumku Račkoŭskaha, u jahonaha viedamstva heta atrymlivajecca. «Biełaruskaja miaža stała apieratyŭnaj, zručnaj, vietłaj i, kali chočacie, dabrejšaj», — zaznačyŭ I.Račkoŭski.
Za 2009 hod hramadzianie Biełarusi pierasiakali miažu krainy 13 miljonaŭ razoŭ, zamiežniki — 10 miljonaŭ.
Ahułam siońnia ŭ pamiežnym kamitecie pracuje 13 tysiač čałaviek.
«Ciapier pamiežnik pavinien i vyhladam, i ŭnutrana adpaviadać patrabavańniam XXI stahodździa. Siońniašni pamiežnik heta i opier, i juryst, i palihłot, i technar», — zaznačyŭ staršynia kamitetu.
«Samaja spakojnaja i cyvilizavanaja ŭ nas miaža z krainami Prybałtyki i Polščaj», — skazaŭ na pres‑kanfierencyi staršynia dziaržaŭnaha pamiežnaha kamiteta Ihar Račkoŭski.
Pry hetym jon paviedamiŭ, što na miažy ź Jeŭrasajuzam usio ž isnuje prablema nielehalnaha pravozu ź Biełarusi cyharetaŭ.
Samaj ža prablemnaj źjaŭlajecca miaža z Ukrainaj, dzie adbyvajecca 40% usich zatrymańniaŭ.
Staršynia pamiežnaha kamiteta Ihar Račkoŭski prakamientavaŭ situacyju, što stvaryłasia na biełaruska‑rasijskaj miažy.
«Sapraŭdy, siońnia na biełaruska‑rasijskaj miažy ŭ adnabakovym paradku z boku Rasii prysutničaje transpartny i praktyčna mytny kantrol. Heta datyčyć uvoza na terytoryju RF aŭtamabilaŭ. Dziejničaje paŭtara dziesiatka mytnych punktaŭ. Nazirajecca i pavieličeńnie kolkaści mytnych padraździaleńniaŭ, a taksama raźvićcio mytnaj infastruktury», — skazaŭ I.Račkoŭski.
«Adsutnaść kamfortu i časta vialikija čerhi, najaŭnaść dadatkovych pracedur na ŭnutranaj miažy sajuznaj dziaržavy vyklikajuć nieparazumieńnie z boku našych hramadzian», — zaznačyŭ staršynia kamitetu.
Pry hetym Račkoŭski skazaŭ, što ludzi časta skardziacca, što miažu Biełarusi ź Jeŭrasajuzam pierasiakać bolš kamfortna, čym z Rasijaj, jakoj nibyta niama.
«Jość prablemy, jakija nosiać techničny charaktar. Spadziajusia, što paśla taho, jak pačnie dziejničać Mytny sajuz, jany źniknuć», — zapeŭniŭ I.Račkoŭski.
Na jahonuju dumku, sama ideja Mytnaha sajuza stanoŭčaja, ale pavinny być uličanyja patrabavańni ŭsich bakoŭ. «Kali nie budzie roŭnych umovaŭ, to dla čaho jon tady stvarajecca?»
Ihar Račkoŭski zaznačyŭ, što biełaruskaja miaža całkam infarmatyzavanaja i vyviedzienaja ŭ ahulnuju sietku dadzienych. U Rasii i Kazachstanie ničoha padobnaha niama.
Kamientary