Siońnia pa ŭsioj krainie projduć vypusknyja. Adznačać u restaranach, kafe sioleta kateharyčna zabaroniena
Vypusknikami 11-ch kłasaŭ stali bolš za 55 tysiač junakoŭ i dziaŭčat.
Va ŭsich škołach Biełarusi 14 červienia projduć vypusknyja viečary dla 11-kłaśnikaŭ. Paśla taho jak Łukašenka aburyŭsia praviadzieńniem vypusknych u restaranach i kafe, ich praviadzieńnie tam zabaranili.
Kansultant Hałoŭnaha ŭpraŭleńnia vychavaŭčaj raboty i maładziožnaj palityki Ministerstva adukacyi Taćciana Asmałoŭskaja śćviardžaje, što arhanizacyja śviatočnych mierapryjemstvaŭ Ministerstvam adukacyi tradycyjna rehłamientavana.
«Pravodzić ich varta ŭ pamiaškańniach ustanoŭ adukacyi — heta, jak praviła, škoły. U vyklučnych vypadkach uračystaści mohuć pravodzicca va ŭstanovach kultury abo ŭstanovach dadatkovaj adukacyi dziaciej i moładzi. Mahčyma arhanizavać śviata i na adkrytaj placoŭcy, ale heta ŭsio roŭna pavinna być placoŭka ŭstanovy adukacyi.
Rehularna pastupajuć pytańni i ad baćkoŭ, i ad vypusknikoŭ, ci možna pravodzić vypusknyja viečary ŭ restaranach, kafe, zabaŭlalnych centrach i inšych abjektach. Adnaznačna — nie. Hetaja pazicyja vyznačana ŭ zahadzie Ministerstva adukacyi. Lubaja łakacyja praviadzieńnia ŭračystaha mierapryjemstva znachodzicca na kantroli i orhanaŭ upraŭleńnia adukacyi, i orhanaŭ unutranych spraŭ», — prainfarmavała jana.
Jana kaža, što akramia adpracavanych maršrutaŭ sustrečy śvitańnia i masavych hulańniaŭ u horadzie staranna prapracoŭvalisia i scenary viečaroŭ.
«Na ŭsich etapach vypusknych dla biaśpieki buduć arhanizavanyja dziažurstvy piedahahičnych i inšych rabotnikaŭ ustanoŭ adukacyi. Uračystaści buduć prachodzić taksama va ŭzajemadziejańni z baćkoŭskimi kalektyvami. Što tyčycca scenaryjaŭ śviataŭ, to dla ich arhanizacyi dastatkova tvorčaha patencyjału piedahahičnych kalektyvaŭ, jakija hatovyja pravieści cikavyja i kreatyŭnyja mierapryjemstvy. Da raspracoŭki scenaryjaŭ byli padklučanyja piedahohi, sami dzieci i ich baćki.
Formy vypusknych viečaroŭ absalutna raznastajnyja — heta i školnyja kapuśniki, i tradycyjnyja konkursy talentaŭ, i prezientacyi kinafilmaŭ i kinastužak sa školnych hadoŭ.
Cikavym farmatam zaŭsiody była cyrymonija ŭznaharodžańnia, kali vypusknikam uručajucca roznyja ŭznaharody za pieramohi ŭ naminacyjach, adznačajucca pry hetym i miedalisty, i kłasnyja kiraŭniki, i nastaŭniki-pradmietniki, i navat nastaŭniki pačatkovych kłasaŭ i miedrabotniki, heta značyć usie, chto prymaŭ udzieł u žyćci vypusknikoŭ na praciahu 11 hadoŭ», — kaža jana.
Zzadu centralizavanyja ekzamieny, u kahości CT. U bolšaści ź ich napieradzie pryjomnaja kampanija ŭ VNU, pra jakuju na adzin viečar možna zabycca.
Ciapier čytajuć
Paśla źniknieńnia śpikierki Mielnikavaj niama dostupu da rachunkaŭ Kaardynacyjnaj rady28
Kamientary