U Smarhonskim rajonie pracoŭnyja vakansii na fiermie zakryvajuć indyjcami
Smarhonskaja rajonnaja hazieta «Śvietły šlach» napisała, što na pracu ŭ miascovaje KSUP «Sińki» na minułym tydni pryjechali čatyry indyjcy. Dvoje ź ich uładkavalisia na fiermu ŭ vioscy Sivicy i, jak śćviardžaje rajonka, buduć zarablać tam u try razy bolš, čym na radzimie.
![](http://nnexpictures.fra1.digitaloceanspaces.com/img/w732d4webp1/photos/z_2024_06/yq0r9v9pi4qgcq9bfz5ggbk03fq3vibf-4usfu.jpg.webp)
Mužčyny pryjechali ź indyjskaha horada Chajdabarada, a ŭ biełaruskim ahraharadku Sińkach žyvuć u internacie, jaki vydzieliła im pradpryjemstva. Miascovymi movami jany pakul nie vałodajuć zusim, ale ŭ kamunikacyi im dapamahajuć smartfony z hałasavym pierakładčykam. Ale i tak jany kožny dzień imknucca vyvučyć pa 2-3 słovy na ruskaj movie, tamu nieŭzabavie moŭny barjer spadziajucca pieraadoleć.
U siabie na radzimie jany taksama pracavali ŭ sielskaj haspadarcy, ale tam im za miesiac ciažkaj pracy płacili kala 15 tysiač rupij (180 dalaraŭ ZŠA). Na Smarhonščynie ž im abiacajuć płacić u try razy bolš, aby tolki nie łajdačyli.
Pracoŭnym mihrantam u Biełarusi padabajecca, adno što tolki treba, jak jany havorać, pryzvyčaicca da klimatu: +20 dla ich chaładnavata. Nie tyja tut i nahruzki: kali ŭ Indyi mužčyny dahladali adnačasova tolki 15 karoŭ, to tut na ich apieku kinuli značna bolš.
«Ale heta nie pałochaje. My ŭžo viedajem, kali treba davać korm žyviołam, kali prybirać za imi… Vučymsia racyjanalna raźmiarkoŭvać svaich siły i pravilna vydatkoŭvać pracoŭny čas», — adrapartavaŭ rajoncy adzin ź indyjcaŭ.
Novaje načalstva imi pakul zadavolenaje. Namieśnik dyrektara pradpryjemstva adznačyŭ, što pracavityja, biez škodnych zvyčak hości z Azii vydatna ŭpisalisia ŭ technałahičny łancužok na fiermie. Praŭda, nadoŭha ŭ Biełarusi zatrymlivajucca jany nie płanujuć, u płanach pakul praca tolki ciaham hoda.
Kamientary