Tajamnica, ci piša Miadźviedzieŭ svaje pahrozy ŭ Telegram samastojna, vierahodna, raskrytaja.
Ukrainskija chakiery z hrupoŭki «Kibier Sprotiv» u pačatku hoda ŭzłamali elektronnuju poštu ludziej ź blizkaha asiarodździa Dźmitryja Miadźviedzieva i na praciahu 6 miesiacaŭ nazirali za ich pierapiskami pamiž saboj i z samim palitykam.
Padrabiaznaści i ŭsiu spampavanuju infarmacyju chakiery pieradali bujnomu vyviedvalnamu partału InformNapalm.
Pavodle ŭciečak, hałoŭnym śpičrajtaram i scenarystam Miadźviedzieva źjaŭlajecca adzin ź jaho asabistych pamočnikaŭ u Radzie Biaśpieki RF Alaksiej Zaklaźminski.
Jon rychtuje Miadźviedzieva da publičnych vystupleńniaŭ, piša dakumienty i artykuły pad aŭtarstvam palityka i dapamahaje jamu drukavać pahroźlivyja pasty ŭ sacsietkach.
Sam Zaklaźminski, zychodziačy ź jahonaj uzłamanaj pošty, u minułym pracavaŭ nastaŭnikam bijałohii, a ciapier aktyŭna kalekcyjanuje rasijskija psieŭdanavukovyja publikacyi pra teoryi zmovy, a taksama pra ŭpłyŭ wi-fi i hadžetaŭ na mozh i asobu čałavieka.
Tak, u adnoj z publikacyj u pošcie Zaklaźminskaha skazana, što padčas karystańnia pryładami dzieci ŭ bijałahičnym sensie pierastajuć być ludźmi.
Akramia taho, chakiery spampavali z pošty Zaklaźminskaha scenary publičnych vystupleńniaŭ z udziełam Miadźviedzieva ź vielmi detalovymi raskładami dziejańniaŭ i replik pa časie.
Naprykład, scenar padklučeńnia doma ŭ Leninhradskaj vobłaści da hazavaj sietki. Tut prapisana, što pierad padklučeńniem hazu da doma hiendyrektar «Hazproma» pa Leninhradskaj vobłaści Viačasłaŭ Buzin robić dakład i kaža nastupnaje.
«Pavažanyja Dźmitryj Anatoljevič (Miadźviedzieŭ) i Alaksandr Valancinavič (Novak), dazvolcie padklučyć dom siamji Kalinkina da sietak hazaraźmierkavańnia?»
Dalej Miadźviedzievu i Novaku prapisvajuć repliku: «Dazvalajem!»
Razam z hetym Zaklaźminski staranna redahuje publičnyja zajavy Miadźviedzieva dla ŚMI. U adnym sa zdabytych fajłaŭ chakiery znajšli čarnavy varyjant artykuła Miadźviedzieva dla «Rasijskaj haziety» ab vynikach 2022 hoda i «kančatkovaj źmienie śvietu».
Charakterna, što ŭ vypraŭleńniach i kamientarach da tekstu Zaklaźminski sam robić pamyłki (naprykład, «śliškom pieśsimJestično»).
Što znajšli jašče?
Taksama ŭ pošcie Zaklaźminskaha chakiery znajšli skarhi rasijskich abaronnych pradpryjemstvaŭ z-za ŭviadzieńnia suprać ich zachodnich sankcyj.
Tak, kiraŭnictva «Tulskoho patronnoho zavoda» zajaviła ab rezkim padzieńni abjomu prodažaŭ patronaŭ praz sankcyi, bo 85% vytvorčaści išło na ekspart (u tym liku ŭ ZŠA), i tamu zavod paprasiŭ dziaržaŭnyja struktury RF bolš zakuplać patrony.
Jašče źviartaje na siabie ŭvahu dakumient ab rekamiendacyjach pa dziaržaŭnaj palitycy Rasii ŭ Arktyčnym rehijonie, padrychtavany analitykami Vyšejšaj škoły ekanomiki (VŠE).
U im, siarod inšaha, prapanujecca «istotna pavialičyć» marskuju dziaržaŭnuju terytoryju RF u Arktycy šlacham «udakładnieńnia» linij isnujučych miežaŭ, a taksama raźmiaścić u Arktycy jadziernuju zbroju «dla vajskovaha kantrolu niedružalubnych dziaržaŭ u rehijonie».
Nahadajem, što niadaŭna Rasija publična vykazała namier «udakładnić» svaje miežy ŭ Bałtyjskim mory i tym samym jurydyčna dałučyć da siabie častku marskich terytoryj bałtyjskich krain.
Milicyja vypadkova apublikavała VIDEA dla ŭnutranaha karystańnia — instrukcyju, jak treba pavodzić siabie z nasielnictvam4
Kamientary