Paśla pačatku vajny kolkaść biełarusaŭ, achvočych da pryniaćcia rasijskaha hramadzianstva, źmienšyłasia amal u try razy
Z-za vajny va Ukrainie siarod pracoŭnych mihrantaŭ u Rasii ŭpaŭ popyt na rasijskaje hramadzianstva — asabliva siarod mužčyn pryzyŭnoha ŭzrostu, jakija płanavali pierajezd pa prahramie pierasialeńnia. U 2023 hodzie hramadzianstva Rasijskaj Fiederacyi atrymali ŭdvaja mienš ludziej, čym u davajennym 2021-m. Nie zastalisia ŭbaku ad novaj tendencyi i biełarusy, piša «Viorstka».
U 2023 hodzie rasijskaje hramadzianstva, pavodle danych rasijskaha MUS, atrymali 378,5 tysiač čałaviek. Heta amal udvaja mienš, čym u davajennym 2021 hodzie. MUS tłumačyć takoje padzieńnie tym, što atrymalniki pašpartoŭ na akupavanych terytoryjach Ukrainy bolš nie ŭličvajucca ŭ hetaj statystycy. Ź jakich krain astatnija novyja rasijanie, ź siaredziny 2023-ha MUS infarmacyju taksama nie raskryvaje.
Adnak, pavodle apošnich dastupnych źviestak, prykmietna, jakija trendy skłalisia z pačatku vajny, adznačaje «Viorstka». Kolkaść pryniatych u hramadzianstva RF ŭpała siarod vychadcaŭ z amal usich krain byłoha SSSR. Kolkaść «suajčyńnikaŭ», jakija pierajazdžajuć pa rasijskaj prahramie pierasialeńnia, u 2023‑m upała na 43% u paraŭnańni 2021‑m.
Akramia ŭradžencaŭ Ukrainy, u pieršym paŭhodździ 2023-ha ŭ paraŭnańni ź pieršym paŭhodździem 2021-ha rezka skaraciłasia kolkaść biełarusaŭ, jakija atrymali hramadzianstva — amal u try razy, da 4,6 tysiač čałaviek.
Siarod vychadcaŭ z Kazachstana zafiksavana źnižeńnie achvotnych atrymać rasijskaje hramadzianstva na 40%, da 13,9 tysiač, z Armienii — na 18%, da 17,9 tysiač.
Rasijskaje MUS nie publikavała raźbiŭku pa pole i ŭzroście novych rasijan. Ale z danych prahramy pierasialeńnia suajčyńnikaŭ vidać, što ad pierajezdu ŭ Rasiju paśla vajny admaŭlajucca ŭ pieršuju čarhu mužčyny pryzyŭnoha ŭzrostu.
U 2023‑m u paraŭnańni z 2021-m kolkaść pierasialencaŭ, jakija stali na ŭlik MUS, va ŭzroście 18—30 hadoŭ skaraciłasia ŭ try razy — prykładna da 3500 čałaviek, kolkaść žančyn u hetym uzroście skaraciłasia mienš — na 47% da 3800.
U 2024 hodzie papularnaść prahramy siarod mužčyn 18-30 hadoŭ upała da histaryčnaha minimumu. U pieršym paŭhodździ 2024 hoda ad ahulnaj kolkaści ŭdzielnikaŭ prahramy mužčyny pryzyŭnoha ŭzrostu składali ŭsiaho 5,9%.
Z ahulnaha trendu vybivajucca tolki pryjezdžyja z Tadžykistana i Kyrhyzstana. Paśla pačatku vajny pierachod u rasijskaje hramadzianstva siarod ich paskoryŭsia.
Za pieršy hod vajny ŭ paraŭnańni z 2021-m kolkaść pryniatych u rasijskaje hramadzianstva ŭradžencaŭ Tadžykistana vyrasła na 67%, da 174 tysiač. Z Kyrhyzstana — na 22%, da 23 tysiač.
Na druhi hod vajny tendencyja zachavałasia. U pieršym paŭhodździ 2023 hoda (u paraŭnańni z anałahičnym pieryjadam 2021) kolkaść uradžencaŭ Tadžykistana, jakija atrymali rasijski pašpart, vyrasła na 100% (87 tysiač), uradžencaŭ Kyrhyzstana — na 25% (10,5 tysiač).
Kamientary
rom, hobielen, Maksim Dizajnier, Indiejec, Piton, Jeriema