La bierahoŭ Maŭrytanii zatanuła łodka ź mihrantami, zahinuli 89 čałaviek
Jany spadziavalisia dasiahnuć Kanarskich vyspaŭ — terytoryi Ispanii, raźmieščanaj prykładna za 100 kiłamietraŭ ad afrykanskaha bieraha, — i paprasić prytułku ŭ ES.
Nie mienš za 89 čałaviek zahinuli pry krušeńni rybackaj łodki ŭ Atłantyčnym akijanie la bierahoŭ Maŭrytanii ŭ Zachodniaj Afrycy. Ich cieły byli padniatyja na bierah. Akramia taho, dziasiatki ličacca źnikłymi bieź viestak, piša Radyjo Svaboda.
Pavodle bierahavoj achovy, udałosia vyratavać dzieviać pasažyraŭ, uklučajučy piacihadovaje dzicia. Usiaho na borcie, jak miarkujecca, byli 170 čałaviek.
Na pierahružanaj łodcy jechali mihranty z Maŭrytanii, Sieniehała i Hambii. Jany spadziavalisia dasiahnuć Kanarskich vyspaŭ — terytoryi Ispanii, raźmieščanaj prykładna za 100 kiłamietraŭ ad afrykanskaha bieraha, – i paprasić prytułku ŭ ES.
Kiraŭnik miascovaj rybałavieckaj asacyjacyi Jali Fał raspavioŭ ahienctvu Reuters, što zahinułych mahło być bolš, pakolki łodka paciarpieła krušeńnie niekalki dzion tamu, i pieršyja vykinutyja na bierah trupy miascovyja žychary chavali sami, kab nie dapuścić ich raskładańnia.
Mihranty, jakija sprabujuć trapić u Jeŭropu z Afryki i Blizkaha Uschodu, časta padarožničajuć na pierahružanych sudach i navat płytach, nie prystasavanych dla dalokich marskich pachodaŭ i nie abstalavanych vyratavalnymi srodkami. Niaredka ŭ ich niama z saboj ježy i presnaj vady.
Pravaabaroncy ź ispanskaj hrupy Caminando Fronteras zajavili, što tolki za pieršyja piać miesiacaŭ 2024 hoda ŭ Atłantycy zahinuli nie mienš za piać tysiač mihrantaŭ, jakija nakiroŭvalisia ad bierahoŭ Afryki da Kanarskich astravoŭ.
Na hetym maršrucie hinie ŭ siarednim pa 33 čałavieki štodnia.
Pavodle źviestak MUS Ispanii, za hety ž pieryjad na vyspy prybyli 16,5 tysiač prośbitaŭ prytułku. Za minuły hod ich kolkaść skłała 39910 čałaviek — udvaja bolš, čym u 2022.
U vice-śpikiery KR biezalternatyŭna abirajuć Stanisłavu Hlińnik, unučku Šuškieviča1
Kamientary