«Jon pavinien byŭ adčuvać mocnyja pakuty, heta jak kinžał u žyvacie». Hod tamu pamior palitviazień Aleś Puškin
Aleś Puškin pamior 11 lipienia na 58-m hodzie žyćcia ŭ reanimacyi hrodzienskaj balnicy, kudy jaho dastavili z turmy. U mastaka była prabadnaja jazva.
Viadomy biełaruski mastak, žyvapisiec-nonkanfarmist, pierformier byŭ zatrymany 30 sakavika 2021 hoda, paśla viartańnia z Kijeva, i praz hod asudžany na piać hadoŭ kałonii pa abvinavačańni ŭ ździeku ź dziaržaŭnych simvałaŭ (artykuł 370 KK) i raspalvańni varožaści (častka 3 artykuła 130 KK).
Adnoj z padstaŭ zatrymańnia byŭ partret antysavieckaha partyzana Aŭhiena Žychara, raźmieščany na vystavie ŭ Hrodnie.
Spačatku pakarańnie adbyvaŭ u ivacevickaj kałonii, a potym byŭ pieraviedzieny na turemny režym u Hrodnie.
Mastaka ŭžo ŭ nieprytomnym stanie pryvieźli ŭ balnicu 11 lipienia 2023 hoda, na apieracyjnym stale ŭ jaho spyniłasia serca.
— Puškina pryvieźli ŭ balnicu faktyčna pry śmierci. U jaho byŭ raźvity pierytanit, byŭ septyčny stan i paliorhannaja niedastatkovaść. Kali skazać prostaj movaj, u jaho była dzirka ŭ straŭniku. Praktyčna nie było šancaŭ na vyratavańnie.
Prabadnaja jazva vyklikaje vostry bol. Tamu pacyjent adrazu źviartajecca sa skarhami. U bolšaści vypadkaŭ u čałavieka jość niekalki dzion dla taho, kab likvidavać prablemu apieratyŭna. Kali čałavieku svoječasova dapamahčy, jon budzie dalej žyć. Paśla takich apieracyj pacyjenta, jak praviła, užo praz paru dzion adpuskajuć dadomu. Kali hetaha nie zrabić svoječasova, to prabadzieńnie jazvy vykliča pierytanit i paśla septyčny šok.
Situacyja z Puškinym? Jaho prosta zabili ŭ turmie, pa-inšamu ja heta nie nazavu. Prosta nie mahło być takoha, kab jon nie źviartaŭsia ŭ turmie pa dapamohu, bo takaja kliničnaja karcina vyklikaje vostry bol.
Jon pavinien byŭ adčuvać mocnyja pakuty, heta jak kinžał u žyvacie, — kazaŭ tady surazmoŭca vydańnia Most.
Śmierć Alesia Puškina stałasia mocnym šokam.
Siońnia ŭ prastory «Kropka» ŭ centry Vilni a 18-j adkryjecca vystava malunkaŭ mastaka.
Ciapier čytajuć
Bližejšym časam buduć vyzvaleny bolš za 150 palitźniavolenych24
Kamientary