U najlepšych tradycyjach Ahaty Kryści. Zahinułych u hateli ŭ Banhkoku vjetnamcaŭ atrucili cyjanidam
Za atručvańniem, vidać, stajała adna z achviar.
![](http://nashaniva.com/img/w840d4webp1/photos/z_2024_07/police240717-5rc8d.jpg.webp)
Jak paviedamlaje palicyja Tajłanda, šaściora vjetnamcaŭ, jakija pamierli ŭ raskošnym numary hatela ŭ Banhkoku, byli atručanyja napojami z cyjanidam. Premjer-ministr Tajłanda Sretcha Tchavisin zajaviŭ, što Fiederalnaje biuro rasśledavańniaŭ ZŠA dapamahaje tajskim uładam u rasśledavańni, piša Bi-bi-si.
Palicyja padazraje, što za atručvańniem stajaŭ adzin z zahinułych, jakoha padšturchnuli da hetaha daŭhi. Pakajoŭki hatela Grand Hyatt Erawan ŭ Banhkoku vyjavili cieła pozna ŭviečary ŭ aŭtorak. Na dumku śledčych, da hetaha momantu zahinułyja byli miortvyja ŭžo sutki.
Dvoje z zahinułych dali ŭ doŭh «dziasiatki miljonaŭ tajskich bataŭ» treciamu dla inviestycyjnych metaŭ, kažuć ułady. 10 młn bataŭ — heta amal 280 tys. dalaraŭ.
Na pres-kanfierencyi ŭ sieradu namieśnik načalnika palicyi Banhkoka hienierał Napasin Punsavat paviedamiŭ, što hrupa zarehistravałasia ŭ hateli paasobku ŭ vychodnyja i atrymała piać numaroŭ — čatyry na siomym paviersie i adzin na piatym.
Čatyry achviary — hramadzianie Vjetnama Tchi Nhujen Fuonh, jaje muž Chonh Fam Tchań, a taksama Tchi Nhujen Fuonh Łan i Dziń Tran Fu. Dvoje inšych — hramadzianie ZŠA Šeryn Čonh i Danh Chunh Van. Zahinułym było ad 37 da 55 hadoŭ.
U paniadziełak dniom usie šaściora sabralisia ŭ pakoi na piatym paviersie. Hrupa zamoviła ježu i harbatu, jakija byli dastaŭleny ŭ pakoj kala 14:00 pa miascovym časie, ich pryniała Čonh, na toj momant jana znachodziłasia ŭ numary adna.
Pa słovach namieśnika načalnika palicyi, aficyjant prapanavaŭ zrabić harbatu dla haściej, ale Čonh admoviłasia, paśla čaho aficyjant syšoŭ.
Paźniej jon uspomniŭ, što jana «razmaŭlała vielmi mała i była vidavočna ŭ stanie stresu».
Pamiž 14:03 i 14: 17 u numar pryjšli astatnija piać čałaviek.
Pa słovach palicejskich, u numary nie było śladoŭ baraćby, rabavańnia abo ŭzłomu. Paźniej jany vyjavili ślady cyjanidu va ŭsich šaści čajnych kubkach.
Na apublikavanych palicyjaj fotazdymkach bačnyja talerki ź niekranutaj ježaj, pakinutyja na stale ŭ numary, niekatoryja ź ich usio jašče pakrytyja plonkaj.
U zamovie numaroŭ u hateli fihuravała siomaje imia, jakoje palicyja identyfikavała jak małodšuju siastru adnoj z achviar.
Pa słovach palicyi, jana źjechała z Tajłanda na minułym tydni ŭ vjetnamski prybiarežny horad Dananh i nie maje dačynieńnia da incydentu.
Svajaki zahinułych, apytanyja palicyjaj, skazali, što muž i žonka Tchi Nhujen Fuonh i Chonh Fam Tchań vałodali biznesam pa budaŭnictvie daroh i dali hrošy Čonh, kab jana ŭkłała ich u prajekt budaŭnictva balnicy ŭ Japonii.
Palicyja padazraje, što Dziń Tran Fu taksama padmanuli, prymusiŭšy ŭkłaści hrošy.
***
Karaleva detektyvaŭ Ahata Kryści (Łedzi Małoven) da taho jak pačać litaraturnuju karjeru pracavała miedsiastroj u špitali, a potym farmaceŭtam u aptecy. U vyniku ŭ jaje byli byli hruntoŭnyja viedy ŭ jadach, tamu niadziŭna, što hałoŭny sposab zabojstva ŭ jaje knihach — atručvańnie roznymi jadami. Daśledčyki padličyli, što žančyna «atruciła» ahułam 83 čałaviek, pryčym addavała pieravahu myšjaku, vieranału i cyjanidu.
Kamientary