Sud nad udzielnikami biaźlitasnaj złačynnaj hrupoŭki prachodziŭ u Homieli.
Sudovaja kalehija pa kryminalnych spravach Homielskaha abłasnoha suda 5 lutaha paśla dzieviaci miesiacaŭ słuchańniaŭ abjaviła pryhavor u dačynieńni da kiraŭnikoŭ złačynnaj hrupoŭki «pažarniki».
Try žychary Homiela, jakija abvinavačvajucca ŭ stvareńni złačynnaj arhanizacyi i kiraŭnictvie joj, a taksama va ŭčynieńni šerahu ciažkich złačynstvaŭ: naniasieńni ciažkich cialesnych paškodžańniaŭ, vymahańniach, kradziažach, rabavańniach, machlarstvie, admyvańni hrošaj, vykradańni čałavieka, pryhavorany da praciahłych terminaŭ turemnaha źniavoleńnia z kanfiskacyjaj majomaści:
dva — da 19 hadoŭ pazbaŭleńnia voli, adzin — da 17.
Dziaržabvinavačańnie patrabavała pakarańnie na hod bolšaje kožnamu.
Abvinavačanym inkryminavalisia złačynstvy bolš čym pa 10 artykułach Kryminalnaha kodeksa. Kryminalnaja sprava skłała 72 tamy.
Abvinavačvanyja byli zatrymany vosieńniu 2006 hoda ŭ Maskvie. Pa spravie, jakaja słuchałasia ŭ zakrytym režymie, prachodziła bolš za 100 paciarpiełych i bolš jak 200 śviedak, u dačynieńni da jakich prymalisia biesprecedentnyja miery biaśpieki: ich zavodzili ŭ zału ŭ śpiecyjalnych maskach i padčas apytańnia vykarystoŭvali śpiecyjalnyja srodki dla źmianieńnia hołasu. Śviedki davali pakazańni ź inšaha pakoja. Heta było źviazana z tym, što niekatoryja ŭdzielniki złačynnaj hrupoŭki ŭžo adbyli pakarańnie i vyjšli na volu.
Prysud moža być abskardžany na praciahu 10 dzion. Dziaržabvinavaŭca zajaviŭ žurnalistam, što praciahłyja terminy pakarańnia abumoŭleny ciažkaściu złačynstvaŭ, bolšaść ź jakich učyniena z karyślivych mierkavańniaŭ. Sud taksama abaviazaŭ abvinavačvanych pakryć maralnuju i materyjalnuju škodu paciarpiełym. Suma maralnaj škody dachodzić da 13 młn., suma materyjalnaj — da 97 młn. U košt pakryćcia škody budzie nakiravana majomaść abvinavačvanych.
Sudovy praces pačaŭsia 24 sakavika 2009 hoda.
Rasśledavańnie pravodziŭ adździeł pa važniejšych spravach prakuratury Homielskaj vobłaści.
Zatrymanyja ŭ Maskvie ŭdzielniki złačynnaj hrupoŭki byli ekstradavany ŭ Homiel u 2008 hodzie i źmieščany ŭ SIZA.
Złačynnaja hrupoŭka była stvorana ŭ siaredzinie 1990‑ch hadoŭ i praisnavała na terytoryi vobłaści bolš za 10 hadoŭ. Udzielniki hrupoŭki zajmalisia vymahańniem na Centralnym rynku i ŭ inšych handlovych kropkach, kantralavali «valutčykaŭ», prastytutak, taksistaŭ.
U červieni 2008 hoda Homielski abłasny sud pryznaŭ šeść hamialčan vinavatymi ŭ stvareńni złačynnaj arhanizacyi i kiraŭnictvie joju, udziele ŭ vymahańniach, rabavańniach, machlarstvie, pryčynieńni ciažkich cialesnych paškodžańniaŭ, źniščeńni majomaści ahulnaniebiaśpiečnym sposabam, jaki paciahnuŭ śmierć dvuch čałaviek pa nieaściarožnaści. Minimalnaje pakarańnie — dzieviać hadoŭ i adzin miesiac pazbaŭleńnia voli — atrymaŭ udzielnik złačynnaj arhanizacyi, maksimalnaje — 15 hadoŭ i 15 hadoŭ i šeść miesiacaŭ pazbaŭleńnia voli — pryznačana asobam, pryznanym sudom liderami hrupoŭki.
U 2006—2007 hadach abłasny sud vynies abvinavačańnie 46 udzielnikam hrupoŭki «pažarniki».
Minimalnym pakarańniem dla ŭdzielnikaŭ bandy było pryznačana pazbaŭleńnie voli na try hady.