84-hadovy nobieleŭski łaŭreat Muchamad Junus pahadziŭsia ŭvajści ŭ časovy ŭrad Banhładeš
Tym časam situacyja ŭ stalicy krainy naładžvajecca.
Łaŭreat Nobieleŭskaj premii miru 84-hadovy ekanamist Muchamad Junus pahadziŭsia stać hałoŭnym daradcam studenckaha časovaha ŭrada ŭ Banhładeš, paviedamiła hazieta The Daily Star.
Muchamied Junus — łaŭreat Nobieleŭskaj premii miru 2006 hoda za namahańni pa stvareńni ekanamičnaha i sacyjalnaha raźvićcia, niejki čas byŭ daradcam urada Banhładeš.
U 1970-ja paśla hoładu ŭ Banhładeš, jaki zabraŭ žyćci 1,5 młn čałaviek, Junus zasnavaŭ bank Grameen, jaki vydaje mikrasubsidyi pad nievysoki pracent. Jany dazvalajuć vyžyvać šmatlikim banhładešcam: kraina źjaŭlajecca adnoj z samych biednych u Azii. Junus atrymaŭ mianušku «bankir dla biedniakoŭ». Dziakujučy jamu byli vyratavanyja sotni tysiač čałaviek.
1 studzienia 2024 hoda sud horada Daka pryznaŭ Muchamada Junusa vinavatym u parušeńni pracoŭnaha zakanadaŭstva i prysudziŭ jaho da šaści miesiacaŭ źniavoleńnia i da štrafu pavodle dvuch artykułaŭ na ahulnuju sumu, ekvivalentnuju 272 dalaram ZŠA. Na pieryjad padačy apielacyi asudžany byŭ adpuščany na volu pad zakład.
Tym časam situacyja ŭ stalicy Banhładeš viartajecca ŭ zvykłaje rečyšča, žycharam dazvolili vychodzić na vulicu.
«Usio naładžvajecca. Źniali kamiendanckuju hadzinu, možna vychodzić z domu», — paviedamiła žycharka Banhładeš Alena karespandentu TASS.
Pry hetym, na jaje dumku, spakoj moža być zmanlivym. «Usio ž ułady niama. Usio moža być. Ale hałoŭnaje — aeraport pracuje», — dadała rasijanka.
***
Mitynhi ŭ krainie pačalisia ŭ kancy červienia, ich udzielniki (u pieršuju čarhu studenty) patrabavali pakłaści kaniec sistemie kvot, jakaja reziervuje da 30% dziaržaŭnych pasad dla členaŭ siemjaŭ vieteranaŭ, jakija zmahalisia ŭ vajnie za niezaležnaść Banhładeš u 1971 hodzie.
Praciŭniki sistemy nazvali jaje dyskryminacyjnaj i ličać, što jana prynosić karyść prychilnikam premjera Šejch Chasiny, čyja partyja «Avami lih» uznačaliła ruch za niezaležnaść u 1970-ch.
U vyniku na akcyjach paŭstali łozunhi z zaklikam da adstaŭki Chasiny. Na fonie rostu napružanaści ŭ krainie ŭviali kamiendanckuju hadzinu i adklučyli mabilny Internet, što pryviało da $10 młrd škody ekanomicy krainy.
Pavodle źviestak NDTV, padčas pratestaŭ zahinuli zvyš 300 čałaviek, siarod ich i demanstranty, i palicyjanty.
76-hadovaja Šejch Chasina — dačka pieršaha premjera Banhładeš, była va ŭładzie z 2009 hoda, u studzieni hetaha hoda jaje pieraabrali na čaćviorty termin, apazicyja bajkatavała vybary. Učora Chasina źjechała z krainy, a pratestoŭcy zachapili jaje rezidencyju.
Ciapier čytajuć
U Połk Kalinoŭskaha na tydzień pralez milicejski stukač. Ciapier jaho vykryli, i dobra vidać, chto sprabuje abialić ahienta4
Kamientary