Sud zavočna pryhavaryŭ haradzienskaha žurnalista Alesia Kirkieviča da 7 hadoŭ, vialikaha štrafu i kanfiskacyi nieruchomaści

Kryminalnuju spravu, raspačatuju suprać žurnalista Alesia Kirkieviča ŭ paradku śpiecvytvorčaści, razhladaŭ sudździa Hrodzienskaha abłasnoha suda Juryj Kazakievič, paviedamlaje BAŽ.

Alesia Kirkieviča sud pryznaŭ vinavatym u sadziejničańni ekstremisckaj dziejnaści i na padstavie č. 1 art. 361—4 i pakaraŭ pa hetym artykule try hadami.

Taksama Kirkievič pryznany vinavatym u inšym sadziejničańni ekstremisckaj dziejnaści, učynienym paŭtorna, hrupaj asob pa papiaredniaj zmovie, i na padstavie č. 2 art. 361—4 KK pakarany za heta pazbaŭleńniem voli na termin 5 hadoŭ sa štrafam 600 bazavych vieličyń (24 tysiačy rubloŭ).

«Pa sukupnaści złačynstvaŭ šlacham častkovaha składańnia asnoŭnych pakarańniaŭ i poŭnaha dałučeńnia dadatkovaha pakarańnia» kančatkova sud pastanaviŭ pryznačyć Alesiu Kirkieviču pakarańnie ŭ vyhladzie pazbaŭleńnia voli na termin 7 hadoŭ z adbyvańniem u papraŭčaj kałonii va ŭmovach uzmocnienaha režymu. A taksama pryznačyŭ štraf 24 000 rubloŭ.

Sud pastanaviŭ, što rečavyja dokazy pa spravie žurnalista buduć zachoŭvacca ŭ materyjałach kryminalnaj spravy.

Rečavymi dokazami, pavodle jakich Alesia Kirkieviča pryznali vinavatym, stali:

— CD‑R dysk z zapisanymi na im aŭdyjofajłami;

— razdrukavany artykuł «Aleś Kirkievič: «U siońniašniaj Biełarusi nadyšoŭ maksimalna niespryjalny čas dla stvareńnia biełaruskaha kantentu», jaki vyjšaŭ na sajcie «Radyjo Svaboda» 25 vieraśnia 2022 hoda;

— CD‑R dysk z zapisanym na im videarolikam z «Bondarieva-jurodivaja. Aŭtar prajekta «Tryzub i Pahonia» ab situacyi ź biełaruskaj movaj/ Mova nanova»;

— razdrukavany artykuł «Idziem u bok Paŭnočnaj Karei: chvalić režym i šukać špijonaŭ. Biełaruskija hidy — ab novych patrabavańniach», jaki vyjšaŭ na sajcie belsat.eu 2 žniŭnia 2023 hoda.

Pavodle pieraliku hetych rečavych dokazaŭ, možna mierkavać, što kryminalnuju spravu suprać Alesia Kirkieviča raspačali za supracoŭnictva ź niezaležnymi miedyjami, abvieščanymi ŭ Biełarusi ekstremisckimi farmavańniami.

U košt apłaty štrafu sud pastanaviŭ pradać majomaść Alesia Kirkieviča

U vyraku, jaki vynies Hrodzienski abłasny sud, asobna ahavorany los aryštavanaj majomaści žurnalista. Heta «1/3 doli prava ŭłasnaści Kirkieviča A. R. na budynak adnakvaternaha žyłoha doma pa adrasie: Viciebskaja vobłaść, Ušacki rajon, Kublicki sielski saviet, v. Byčki, vuł. Centralnaja, d. 33». Aryšt na majomaść byŭ nakładzieny 22 listapada 2023 hoda, i jaje vyrašana realizavać u košt pahašeńnia štrafu.

«Adnakvaterny žyły dom», pra jaki viadziecca ŭ prysudzie, znachodzicca ŭ vioscy Byčki — małoj radzimie znakamitaha Vasila Bykava. Niekali hramadskija aktyvisty nabyli budynak kolišniaj viaskovaj škoły, dzie ŭ pieršym kłasie vučyŭsia budučy piśmieńnik.

Kali škołu ŭ Byčkach zakryli, u draŭlanuju chatu zasialilisia ludzi, i za niekalki dziesiacihodździaŭ jana źmianiła niekalki haspadaroŭ. Apošnimi tutejšymi nasielnikam była siamja Antaniny Bykavaj, švahierki Vasila Bykava.

Potym u vykuplenaj chacie pravodzili letniki dla hramadska aktyŭnaj moładzi.

***

Žurnalist-fryłansier, piśmieńnik i krajaznaŭca, kolišni namieśnik staršyni «Maładoha frontu» Aleś Kirkievič — były palitviazień. Jon braŭ udzieł u pratestach suprać falsifikacyi vynikaŭ prezidenckich vybaraŭ 19 śniežnia 2010 hoda. Na pačatku 2011-ha byŭ aryštavany. 5 maja 2011 hoda sud Kastryčnickaha rajona Minska pryhavaryŭ jaho da 4 hadoŭ źniavoleńnia ŭ kałonii ŭzmocnienaha režymu. Adbyvaŭ pakarańnie ŭ navapołackaj papraŭčaj kałonii, byŭ vyzvaleny praz pamiłavańnie 1 vieraśnia 2011 hoda.

• 0
• 1
• 0
• 0
• 0
• 0
• 6
• 0