Aby da dušy, dobra i ŭ šałašy

«Kuchnia da dušy» (anh. Soul Kitchen, ras. «Dušievnaja kuchnia»), kamiedyja, Niamieččyna, 2009 h., 99chv., rež. Fatych Akin)

Pakul u «Kijevie» doŭhija čerhi pa kvitki patrabujuć chleba i avataryščaŭ, u «Domie Kino» pakazvajuć šykoŭnuju kamiedyju za krychotny biudžet.

Adnačasova z naviednikami Bierlinskaha kinafestu biełaruski hladač moža ŭbačyć kamiedyju «Kuchnia da dušy», jakaja ŭžo pabyvała na Vieniecyjanskim kinafeście, adkul pryviezła admysłovy pryz žury, a svajmu režysioru zdabyła reputacyju stałaha kinakuchara, jaki zdolny vydatna dać rady luboj stravie: jak horkaj, tak sałodkaj.

Vunderkind niamieckaha kino Fatych Akin vydaŭ čarhovy kulinarna-kiniematahrafičny šedeŭr z kuchni svajho imihranckaha serca.

Dla Akina, turka z pachodžańnia i niemca pavodle hramadzianstva, hałoŭny stan — pamiežny: Uschod i Zachad, kabanas i šaŭrma, Niamieččyna i Turcyja (abo jak u hetym vypadku — Hrecyja), svaje i čužyja. Lubimyja piersanažy: imihranty z paśviedčańniem niaŭdačnika, aficyjantki z šarmam Marlen Dytrych. Paśla dramy «Hałavoj ab ścienku», jakaja raspaviadała pra žyćcio turkaŭ u FRN dy zdoleła atrymać u 2004 hodzie «Załatoha Miadźviedzia», Akin zdymaje kamiedyju pra niamieckija pryhody ŭžo hreckaj dyjaspary.

Aby da dušy, dobra i ŭ šałašy: vialiki biudžet u filmie tolki ŭ samim siužecie (simpatyčnamu ŭładalniku Zinasu Kazanzakisu da zarezu treba zdabyć 200 tysiač jeŭraŭ za svaju potam i mazalom zdabytuju straŭniu), a hrošy na specefiekty, vidać, usie pajšli na vyrab niejmaviernych pamieraŭ (nia soramna paviesić navat na makaŭku bažnicy) załatoha kryža adnaho z hieroja kamiedyi, hreckaha bandyta.

Ale niahledziačy na finansavyja abmiežavańni, hieroi filma, novaprybyłyja hamburhcy, vidoviščna ŭlublajucca ź pieršaha ŭdara ŭ hałavu, viesialacca — ažno čerci vyjuć, lubiacca — ažno sapraŭdnyja pornaaktory kusajuć łokci. Chočacca spasiarod kinateatru pa mižziemnamorskaj zvyčcy braznuć talerku ab ziamlu i stančyć na askabałkach sirtaki, na poŭnyja zastaŭki zaharłaŭšy: «O-p-pa! Voś heta film!».

Liza Kavalčyk

P.S. A jašče ŭ mieniu «Kuchni da dušy»: uradženiec Polščy, zorka niamieckaha kino Moryc Blajbtroj («Biažy, Łoła, biažy!»), jaki sa svajoj nieardynarnaj źniešnaściu daŭno davioŭ, što prosta i lohka moža hrać i ŭźbieka («Łuna-papa»), i italjanca (drama «Salina»). Hetym razam Blajbtroj iskramiotna ŭjaŭlaje zahannaha, ale takoha simpatyčnaha hreka, kliničnaha hulca i pryrodžanaha kryminalnika.

• 0
• 0
• 0
• 0
• 0
• 0
• 0
• 0