Hibiel biełarusa ŭ balnicy ŭ Varšavie rasśledujuć jak daviadzieńnie da suicydu
Śledstva viadzie palicyja pad nahladam prakuratury.
Jak paviedamili «Biełsatu» ŭ akruhovaj prakuratury rajona Praha-Pułnoc, maksimalnaje pakarańnie, praduhledžanaje hetym artykułam, — 5 hadoŭ źniavoleńnia.
Palicyja ad kamientaroŭ admaŭlajecca, pry hetym pres-sakratar akruhovaj prakuratury rajona Praha-Pułnoc Norbert Valiński paviedamiŭ «Biełsatu», što sprava rasśledujecca pavodle artykuła ab daviadzieńni da suicydu.
«Akruhovaja prakuratura ździajśniaje nahlad za rasśledavańniem spravy ab daviadzieńni da samazabojstva šlacham uhavorvańnia abo nadańnia dapamohi, to bok učynku, praduhledžanaha 151-m artykułam Kryminalnaha kodeksu».
Ci majucca ŭ spravie padazravanyja, pradstaŭnik prakuratury nie ŭdakładniŭ.
Zdareńnie adbyłosia 11 vieraśnia ŭ špitali na vulicy Kandratoviča ŭ varšaŭskim rajonie Brudna. Tam 67-hadovy hramadzianin Biełarusi skoknuŭ z akna pałaty na šostym paviersie.
«Nieadkładnyja reanimacyjnyja zachady akazalisia daremnymi. Była kanstatavanaja śmierć mužčyny», — skazaŭ Valiński.
Raniej u lakarni paviedamili «Biełsatu», što biełarusa špitalizavali 6 vieraśnia. Jahony dyjahnaz pradstaŭnik bolnicy raskryć admoviŭsia, ale adznačyŭ, što mužčynu mielisia chutka vypisać:
«Anijakich składanaściaŭ z pacyjentam nie było, jon byŭ u dobrym kantakcie ź piersanałam. My čakali, što jaho vypišuć maksimum praź niekalki dzion. Jahony dyjahnaz nie byŭ ciažkim, i naziraŭsia vyrazny prahres u lačeńni ŭ pravilnym kirunku».
U lakarni taksama padkreślili, što pacyjent pavodziŭsia adekvatna, i ničoha nie pradrakała biady. Dla piersanału bolnicy heta była «vielmi smutnaja i ciažkaja situacyja».
Kamientary