Dyrektar biełaruskaj IT-kampanii Gurtam nazvaŭ hałoŭny sakret pośpiechu
Alaksiej Ščurko, zasnavalnik bujnoj i paśpiachovaj IT-kampanii Gurtam, daŭ vialikaje intervju znakamitamu litoŭskamu honščyku rali «Dakar» Bieniedyktasu Vanahasu, dzie raspavioŭ pra svaje chobi, zarobki ŭ kampanii, ciažkaści rełakacyi i pierśpiektyvy ŭłasnaha biznesu za miažoj.
Na jutub-kanale litoŭskaha aŭtahonščyka Bieniedyktasa Vanahasa, viadomaha svaimi vystupami ŭ rali «Dakar» u składzie kamandy Toyota, vyjšła vialikaje intervju z Alaksiejem Ščurko, dyrektaram bujnoj i paśpiachovaj biełaruskaj IT-kampanii Gurtam, jakaja rełakavałasia ŭ Litvu paśla 2020 hoda.
Biełaruskaja IT-kampanija Gurtam (anhlijskaja tranśliteracyja biełaruskaha słova «hurt» u tvornym skłonie) zasnavana ŭ 2002 hodzie Alaksiejem Ščurko i jahonym baćkam Uładzimiram Ščurko. Kampanija stvaryła płatformu dla spadarožnikavaha manitorynhu i internetu rečaŭ Wialon, a taksama płatformu flespi dla paskoranaj raspracoŭki hieałakacyjnych rašeńniaŭ. Da Wialon padklučana bolš za 3,5 miljona mašyn i inšych abjektaŭ u bolš čym 150 krainach śvietu.
Soft Gurtam vykarystoŭvajuć sotni tysiač kampanij i bolš za 4 miljony klijentaŭ pa ŭsim śviecie: ad servisaŭ pa dastaŭcy picy i taksaparkaŭ da naftavych karparacyj i dziaržaŭnych słužbaŭ. Ofisy kampanii adkrytyja ŭ piaci krainach: Litvie, Hruzii, AAE, Arhiencinie, ZŠA.
Gurtam pačaŭ rełakavacca ź Biełarusi ŭ 2020 hodzie i całkam skončyŭ sychod u lutym 2023 hoda. U sakaviku 2022 kampanija prypyniła prodaž svaich praduktaŭ u Rasii, a ŭ śniežni taho ž hoda likvidavała rasijskuju jurydyčnuju asobu.
Alaksiej Ščurko adznačaje, što jahonaja kampanija pry dapamozie ŭłasnych technałohij imkniecca rabić śviet lepšym, ratavać čałaviečyja žyćci i bierahčy ekałohiju. Raspracoŭki Gurtam, kaža Ščurko, dapamahajuć skaračać škodnyja vykidy ŭ atmaśfieru, što pa efiektu ekvivalentna pasadcy kala 100 dreŭ štodzień.
Sam biznesmien nie zajmaje pasadu hienieralnaha dyrektara kampanii, nazyvajučy sabie tolki hałoŭnym raspracoŭščykam Gurtam. Jon tłumačyć heta tym, što nie choča kancentravać uładu ŭ rukach adnaho čałavieka i daviaraje inšym supracoŭnikam.
«Ja prosta chaču stvaryć kampaniju i dazvolić ludziam praciahvać jaje budavać. Ja tolki pakazvaju im pravilny kirunak, a jany vyznačajuć usio astatniaje. Pry hetym ja mianiaju svaje roli: na adnym tydni ja inžynier-raspracoŭščyk, na druhim — mieniedžar, i tolki na trecim — užo dyrektar. Kali ja inžynier, to nie pravodžu naradaŭ u jakaści kiraŭnika kampanii, a razam z astatnimi raspracoŭvaju stratehii, taktyki, i my prosta šmat razmaŭlajem.
Ja pracuju pa pryncypie 50/50. Ale navat padčas majho lidarskaha tydnia ja pryśviačaju naradam tolki try dni na tydzień, a dva dni zaŭsiody pakidaju na pracu ŭ roli zvyčajnaha inžyniera. Chaču ŭ budučyni raźmiarkoŭvać 70% svajho pracoŭnaha času na stvareńnie čahości novaha, a 30% pakinuć na kiravańnie kampanijaj», — dzielicca Alaksiej Ščurko ŭ intervju litoŭskamu honščyku.
Ščurko ličyć, što sakretny inhrydyjent jahonaj paśpiachovaści — pracalubstva i nadańnie svajoj prafiesii vialikaj kolkaści ŭvahi i času. Svaim hałoŭnym chobi mužčyna nazyvaje piłatavańnie samalotaŭ, bo «palot daryć masu emocyj i adčuvańnie svabody».
Biznesmien pieraličvaje try klučavyja krytery efiektyŭnaści Gurtam, jakija kampanija pavinna trymać u pryjarytecie: dachod ad dziejnaści supracoŭnikaŭ, kolkaść inžynieraŭ-raspracoŭščykaŭ i pakazčyki čystaha prybytku.
«U nas jość try vielmi prostyja paramietry. Jany patrebnyja nam dla razumieńnia taho, a ci ŭ pravilnym kirunku my ruchajemsia da našaha bačańnia budučyni kampanii. Pieršy ź ich — dachod ad dziejnaści supracoŭnikaŭ, jaki, pa našym płanie, pavinien składać 200 tysiač dalaraŭ (655 tysiač rubloŭ) u hod na adnaho čałavieka. Taki dachod dazvalaje nam vypłočvać ludziam vysokija zarobki, na jakija my zvyčajna vydatkoŭvajem kala 60% ad ahulnaha koštu ŭsich našych apieracyj.
Druhi paramietr — heta kolkaść inžynieraŭ-raspracoŭščykaŭ u štacie Gurtam. Dla prybytkovaha i efiektyŭnaha isnavańnia ŭ jakaści technałahičnaj kampanii inžynierami pavinny być 40% ad našaha ahulnaha štatu supracoŭnikaŭ. My hetych pakazčykaŭ jašče nie dasiahnuli, bo ŭ nas pakul tolki 30%.
A treci kryter ujaŭlaje saboj uzrovień čystaha prybytku kampanii. Jon pavinien składać ad 25 da 30% ad ahulnaha dachodu i nie być mienšym za 20%. Kali my nastolki prybytkovyja, to zmožam rabić usio, što zachočam, bo heta pakazčyk našaj svabody. Da taho ž, vysoki prybytak daje vydatnuju mahčymaść padziakavać supracoŭnikam, kab jany mahli adčuć siabie častkaj kampanii i zrazumieć, što jany nie tolki stvarajuć košt kampanii, ale i mohuć skarystacca jaje pładami», — adznačaje Ščurko.
Taksama pradprymalnik upeŭnieny, što kampanii treba aktyŭna ŭkaraniać i raźvivać sistemy štučnaha intelektu, «bo jany stvarajuć novy rynak pracy i pazbaŭlajuć čałavieka ad ruciny, dajučy jamu mahčymaść pryśviačać svoj čas bolš prasunutaj dziejnaści, dzie važnyja čałaviečyja rašeńni».
Samym składanym pryniatym rašeńniem padčas kiravańnia kampanijaj Ščurko nazyvaje rašeńnie ab rełakacyi ź Biełarusi ŭ Litvu ŭ 2020 hodzie. Potym kampanija razarvała ŭsie suviazi z Rasijaj z-za vajny va Ukrainie, što, kaža biznesmien, taksama stała ciažkim udaram, bo na rasijski rynak prychodziłasia kala 20% ad ahulnaj mižnarodnaj vyručki Gurtam.
«Adnak, niahledziačy na ciažkaści, my zdoleli zachavać 70-80% našych supracoŭnikaŭ i ŭrešcie va ŭsioj hetaj situacyi zastalisia ŭ vyjhryšy», — padkreślivaje Ščurko.
U Viciebsku zatrymali minskaha błohiera-prykalista Bulbanews, u jakoha 600 tysiač padpisčykaŭ u instahramie1
Kamientary
Hanarymsia!