Rasija pradbačyła ŭvarvańnie ŭ Kurskuju vobłaść za niekalki miesiacaŭ. Ale praduchilić jaho nie atrymałasia

Jak śćviardžaje The Guardian, žurnalisty vydańnia sustrelisia z ukrainskaj hrupaj śpiecyjalnaha pryznačeńnia, jakaja aznajomiła ich z dakumientami MUS, FSB i armii Rasii, jakija, pavodle ich słoŭ, byli znojdzieny ŭ budynkach Kurskaj vobłaści. Žurnalisty zmahli prahledzieć ich i sfatahrafavać. The Guardian adznačaje, što dakumienty majuć prykmiety sapraŭdnaści, chacia pravieryć heta vydańnie nie zmahło.

Pa słovach žurnalistaŭ, dakumienty ŭ asnoŭnym pastupili z padraździaleńniaŭ 488-ha hvardziejskaha motastrałkovaha pałka, u pryvatnaści, z druhoj roty 17-ha bataljona. Niekatoryja ź ich ujaŭlajuć saboj drukavanyja zahady, razasłanyja ŭ roznyja padraździaleńni, a inšyja — rukapisnyja žurnały, u jakich fiksujucca padziei i prablemy na kankretnych pazicyjach.

Samyja rannija zapisy datavany kancom 2023 hoda, a samyja apošnija dakumienty — šaściu tydniami da taho, jak Ukraina pačała ŭvarvańnie ŭ Kurskuju vobłaść 6 žniŭnia 2024 hoda.

Paviedamleńni ab padrychtoŭcy ŭkrainskaha napadu

Jak śćviardžajecca ŭ materyjale The Guardian, papiaredžańni ab mahčymaści ŭvarvańnia pastupali za šmat miesiacaŭ da jaho pačatku.

Tak, u adnym z dakumientaŭ ad 4 studzienia 2024 hoda havorycca ab «mahčymaści praryvu dziaržaŭnaj miažy» z boku ŭkrainskich uzbrojenych farmiravańniaŭ i addajecca zahad uzmacnić padrychtoŭku da adbićcia luboha napadu.

19 lutaha 2024 hoda kamandziry padraździaleńniaŭ byli papiaredžany ab płanach Ukrainy «chutka prasunucca z Sumskaj vobłaści na rasijskuju terytoryju na hłybiniu da 80 km, kab stvaryć čatyrochdzionny kalidor da prybyćcia asnoŭnych padraździaleńniaŭ ukrainskaj armii na bronietechnicy».

U siaredzinie sakavika 2024 hoda padraździaleńniam na miažy było zahadana ŭzmacnić abarončyja rubiažy i «arhanizavać dadatkovyja vučeńni dla kamandziraŭ padraździaleńniaŭ i apornych punktaŭ pa pravilnaj arhanizacyi abarony» ŭ ramkach padrychtoŭki da ŭkrainskaj transhraničnaj ataki.

U siaredzinie červienia 2024 hoda źjaviłasia bolš kankretnaje papiaredžańnie ab płanach Ukrainy atakavać «u napramku Junakoŭka-Sudža z metaj uziać Sudžu pad kantrol», što sapraŭdy adbyłosia ŭ žniŭni.

Taksama prahnazavałasia, što Ukraina pasprabuje źniščyć most praz raku Siejm, kab parušyć rasijskija linii zabieśpiačeńnia ŭ hetym rehijonie, što paśla i adbyłosia.

Pavialičyć

U adnym z dakumientaŭ za červień 2024 hoda žurnalisty znajšli skarhu na toje, što rasijskija častki, raźmieščanyja na froncie, «zapoŭnieny ŭ siarednim tolki na 60-70% i składajucca ŭ asnoŭnym z reziervistaŭ sa słaboj padrychtoŭkaj».

Stvareńnie łžyvych pazicyj dla padmanu ŭkrainskaha boku

Žurnalisty adznačajuć, što dakumienty dajuć ujaŭleńnie ab rasijskaj taktycy za apošni hod, u adnym vypadku havorycca ab nieabchodnaści stvareńnia łžyvych akopaŭ i pazicyj, kab zabłytać ukrainskija raźviedvalnyja bieśpiłotniki.

«Nieabchodna stvaryć madeli tankaŭ, broniemašyn i artyleryjskich ustanovak, a taksama maniekieny sałdat, i pieryjadyčna pieramiaščać ich», —

cytujuć žurnalisty adzin z zahadaŭ, u jakim taksama adznačajecca nieabchodnaść adpraŭki na łžyvyja pazicyi niekalkich sałdat, jakija ŭnačy buduć zapalvać vohniščy i chadzić z pachodniami. Akramia hetaha ŭ dakumiencie havorycca pra nieabchodnaść arhanizacyi radyjopieramovaŭ ab iłžyvych pazicyjach u raźliku na toje, što ŭkrainski bok ich pierachopić.

Ale niajasna, ci byli takija pazicyi naohuł stvorany. Členy ŭkrainskaha padraździaleńnia, jakija ździajśniali paloty na raźviedvalnych bieśpiłotnikach u hetym rajonie ŭ apošnija tydni, paviedamili The Guardian, što nie bačyli nijakich dokazaŭ ich isnavańnia.

U sakaviku 2024 hoda ŭ rasijskich dakumientach adznačałasia, što pačaścilisia vypadki, kali ŭkrainskija dyviersijnyja hrupy maskiravalisia dla pracy ŭ tyle Rasii, apranajučy rasijskuju formu. U suviazi z hetym addavaŭsia zahad vykarystoŭvać bajcami rasijskich padraździaleńniaŭ śpiecyjalnych apaznavalnych znakaŭ.

Palitzaniatki jak srodak praduchileńnia samahubstvaŭ

Aŭtary materyjału pišuć, što ŭ aficyjnych dakumientach źmiaščajucca ŭkazańni na surjoznyja prablemy z maralnym ducham na froncie.

«Analiz biahučaj situacyi z samahubstvami pakazvaje, što pytańnie ab hibieli vajennasłužačych u vyniku suicydalnych incydentaŭ zastajecca napružanym»,

— adznačajecca ŭ adnym z dakumientaŭ, u jakim raskazvajecca ab vypadku, jaki adbyŭsia 20 studzienia 2024 hoda, kali sałdat terminovaj słužby zajšoŭ u letniuju pamyvačnuju na pastu achovy i streliŭ sabie ŭ žyvot.

«Padčas rasśledavańnia incydentu vyśvietlena, što pryčynaj samahubstva i śmierci staŭ niervova-psichičny zryŭ, vyklikany praciahłym depresiŭnym stanam u suviazi z prachodžańniem słužby ŭ šerahach rasijskaj armii»,

— havorycca ŭ rukapisnaj spravazdačy ab zdareńni.

Dla praduchileńnia padobnych vypadkaŭ kamandziram padraździaleńniaŭ pradpisana vyjaŭlać vajskoŭcaŭ, «psichična nie hatovych da vykanańnia słužbovych abaviazkaŭ abo schilnych da devijantnych pavodzin, i arhanizoŭvać ich pieravod u vajenna-miedycynskija ŭstanovy».

Dla taho, kab padtrymać maralny duch sałdat, u adnym z dakumientaŭ, nadrukavanym na mašyncy, pradpisvajecca zabiaśpiečyć štodzionnaje aznajamleńnie sałdat z kantentam rasijskich dziaržaŭnych ŚMI, a taksama pravodzić štotydzień hadzinnyja palityčnyja zaniatki.

• 1
• 0
• 8
• 1
• 0
• 0
• 0
• 0