Pradstaŭnik abvinavačańnia zapatrabavaŭ dla viciebskaha apazicyjaniera Aleha Surhana pakarańnie ŭ vyhladzie troch hadoŭ pazbaŭleńnia voli ŭ kałonii strohaha režymu.
Pra heta paviedamiła viciebski kaardynatar arhkamiteta pa stvareńni partyi «Biełaruskaja chryścijanskaja demakratyja» Taćciana Sieviaryniec.
Sud nad Surhanam pačaŭsia ŭ Viciebsku 9 lutaha. Jon abvinavačvajecca va ŭčynieńni złačynstva, praduhledžanaha art. 364 Kryminalnaha kodeksa (nasille abo pahroza hvałtu ŭ dačynieńni da supracoŭnika orhanaŭ unutranych spraŭ). Maksimalnaje pakarańnie — pazbaŭleńnie voli na termin da šaści hadoŭ. Surhan znachodziŭsia pad padpiskaj ab niavyjeździe, adnak viečaram 27 studzienia jon byŭ zatrymany i źmieščany ŭ śledčy izalatar.
Jak paviedamiła Sieviaryniec, padčas sprečak na sudzie prakuror zajaviŭ, što Surhana varta pakarać pazbaŭleńniem voli ŭ kałonii strohaha režymu, bo jon dvojčy byŭ asudžany za kryminalnyja złačynstvy — kišennyja kradziažy. Aprača taho, milicyjanier Siarhiej Dudkievič, jakoha Surhan nibyta ŭkusiŭ za palec, źmianiŭ svaje iskavyja patrabavańni — zaraz jon patrabuje kampiensacyi maralnaha ŭronu nie ŭ 1 młn rubloŭ, jak raniej, a ŭ 10 młn.
Jon abhruntavaŭ heta tym, što paśla incydentu z Surhanam jon byŭ vymušany pierajści na bolš nizkuju pasadu z bolš nizkaj apłataj.
Abarona Surhana nastojvaje na jaho nievinavataści na toj padstavie, što pakazańni supracoŭnikaŭ milicyi razychodziacca z pakazańniami inšych śviedak.
Rašeńnie pa spravie Aleha Surhana budzie vyniesiena 19 lutaha.
Incydent, u suviazi ź jakim prachodzić sudovy razbor, adbyŭsia 3 vieraśnia 2009 hoda. Jak paviedamiła Taćciana Sieviaryniec, Aleha Surhana i jaho małodšaha brata Tarasa zatrymali na prypynku hramadskaha transpartu kala Viciebskaha mieduniviersiteta, na budynku jakoha ŭ toj momant niechta vyviesiŭ bieł-čyrvona-bieły ściah. U pratakole, składzienym u Kastryčnikim RUUS Viciebska, Surhana abvinavacili ŭ vyviešvańni ściaha, adnak paźniej hety pratakoł niekudy prapaŭ, a zamiest jaho źjaviŭsia inšy: nibyta, Surhan znachodziŭsia ŭ hramadskim miescy ŭ pjanym vyhladzie, niecenzurna łajaŭsia i pry zatrymańni ŭkusiŭ milicyjaniera za palec.