«Panios takuju łuchtu, što navat ja ździviŭsia». Kizim prakamientavaŭ zajavy Łukašenki

Kizim adreahavaŭ na zajavu Łukašenki, što toj idzie na vybary. 

«Vidavočna, što ŭ siomy raz jon vyjdzie «pieramožcam». Mahčyma, heta tyčyłasia b vyklučna biełaruskaha hramadstva, kali b Biełaruś nie stała saŭdzielnikam rasijskaj uzbrojenaj ahresii suprać Ukrainy i nie stvaryła mihracyjny kryzis na miežach ź ES.

Mienavita padčas jaho ciapierašniaj kadencyi Biełaruś, jakaja ličyłasia bolš-mienš niejtralnaj krainaj u centry Jeŭropy, stała krynicaj pahroz, pierš za ŭsio dla susiedziaŭ, krainaj-suahresaram, krainaj, z terytoryi jakoj razdajucca jadziernyja pahrozy, a taksama krainaj ź ciažka pradkazalnaj i niesamastojnaj źniešniaj palitykaj, absalutna zaležnaj ad kapryzaŭ Kramla», — napisaŭ Kizim.

Jon dadaje, što z intervju VVS možna zrazumieć, čaho čakać Ukrainie ad siomaha łukašenkaŭskaha terminu. 

«Nie lublu cytavać, ale ž «Heta ja jašče pa minimumie ŭciahnuty ŭ hety kanflikt. A možna skazać naohuł nie ŭciahnuty»… Praŭda, vielmi padobna na pucinskaje «My jašče nie pačynali», — piša Kizim. — Jašče cikaviej byli jaho tłumačeńni adnosna napadu Rasii z terytoryi Biełarusi ŭ lutym 2022 hoda. Nu viartalisia sabie rasijskija vojski da siabie z vučeńniaŭ na poŭdni Biełarusi, a potym raz…. i paviarnuli na Kijeŭ… Ale niejak [Łukašenka] nie tłumačyć, čamu adnačasova palacieli rakiety i bomby pa ŭkrainskaj terytoryi ź biełaruskich aeradromaŭ i čamu heta ŭvarvańnie praciahvałasia nie adzin miesiac. Choć nie, tłumačyć: «Spytajcie ŭ Zialenskaha» (???). Narmalna», — źviartaje ŭvahu na supiarečnaści Kizim.

Jon kaža, što znachodziačysia ŭ toj čas u Minsku, čuŭ «blajańni jahniat» (abo ich maŭčańnie), jakimi tłumačyli tamtejšyja dypłamaty i čynoŭniki vidavočny fakt rasijskaj ahresii i jaje padtrymki biełaruskimi ŭładami».

«Prynamsi, da taho, jak ich rulavomu nie padrychtavali adpaviednyja tezisy, jakija jon da hetaha času vykarystoŭvaje padčas padobnych intervju. Łukašenka, dumaju ŭsie zaŭvažyli, naohuł mała što mianiaje ŭ svaich acenkach i tłumačeńniach (jakija jamu «ŭpichnuli» ŭ hałavu KDB i SVR), chiba što ŭ bok nahniatańnia i dadavańnia «žudasnych» prykładaŭ. Tak, u adkaz Rozenbierhu na pytańnie, čamu toj nie padtrymaŭ Ukrainu, jon znoŭ panios takuju łuchtu, što navat ja ździviŭsia… Pryčynaj nazyvajucca i sankcyi, i zachop vahonaŭ, i aryšt aŭtamabilaŭ z kiroŭcami (jakich jon nibyta vyzvaliŭ, pravioŭšy śpiecapieracyju), i pieciarych zabitych biełarusaŭ, cieły jakich «rasčlanili, kab my nie zrazumieli jak jany zahinuli», — piša dypłamat. 

Jon źviartaje ŭvahu, što pieršyja sankcyi suprać Biełarusi ŭ adkaz za jaje saŭdzieł u rasijskaj ahresii Ukraina ŭviała tolki ŭ listapadzie 2022.

«Vahony» i «aŭto» byli ŭžo paśla pačatku ahresii i, u hetym kantekście, mabyć stali apraŭdanaj reakcyjaj z ukrainskaha boku «da lepšych časoŭ».

Apieracyja «pa vyzvaleńni» — heta było banalnaje vykarystańnie situacyi z abmienam ukrainskich kiroŭcaŭ, jakija viartalisia z Rasii praz Brest, na rasijskich, jakija jechali ŭ Rasiju. Biełaruś patrabavała dadać svaich kiroŭcaŭ (ich i tak płanavali addać paźniej), u śpisy rasiejcaŭ. Ale samym cikavym u «tłumačeńniach» vyhladaje pavieličeńnie kolkaści biełarusaŭ, jakich «rasčlanili». U papiarednich intervju, ja ŭzhadvaju, havorka išła pra dvuch, a ciapier užo pra piacioch. Što budzie dalej?

Kažu heta biez asablivaha sarkazmu, a tym bolš samazadavalnieńnia. Moj kamientar, pierš za ŭsio, dla taho, kab zrazumieć, čaho čakać nie tolki biełarusam, ale i nam, ukraincam, i inšym krainam našaha rehijonu ad znachodžańnia va ŭładzie hetaha čałavieka jašče nastupnyja piać hadoŭ», — napisaŭ Kizim.

• 10
• 0
• 1
• 2
• 0
• 1
• 0
• 0