Źlity mierkavany sakretny pratakoł sustrečy Trampa i Zialenskaha

Z pryčyny iranskaj chakierskaj ataki, jakaja pryviała da ŭciečki vielizarnaha mnostva zakrytych dakumientaŭ ź siervieraŭ Respublikanskaj partyi ZŠA i pieradvybarčaha štaba Donalda Trampa, u internecie apynuŭsia sakretny pratakoł ź niadaŭniaj sustrečy Donalda Trampa i prezidenta Ukrainy Uładzimira Zialenskaha ŭ Ńju-Jorku.

Dakumient razam ź inšymi kanfidencyjnymi danymi byŭ apublikavany na sajcie supierkamiteta palityčnych dziejańniaŭ American Muckrakers PAC, źviazany z Demakratyčnaj partyjaj ZŠA. Kamitet u svaju čarhu atrymaŭ hetyja danyja ŭ elektronnym vyhladzie ad praŭradavaj iranskaj hrupoŭki APT42, jakaja, pavodle amierykanskaj vyviedki, pajšła na heta z ułasnaj inicyjatyvy, kab nie dapuścić pieramohi Trampa na budučych prezidenckich vybarach u ZŠA.

U toj ža čas pradstaŭniki pieradvybarčaha štaba Trampa asudzili dziejańni chakieraŭ, abvinavaciŭšy ich u «metanakiravanym umiašańni ŭ vybary 2024 hoda i sprobie pasiejać chaos u demakratyčnym pracesie ZŠA».

Pra matyvy Irana škodzić intaresam Trampa, a taksama pra inšyja źlivy ź siervieraŭ jahonaha pieradvybarčaha štabu «Naša Niva» pisała raniej: 

Rasija i Iran dziejničajuć u ZŠA suprać adzin adnaho. Pra heta śviedčać sakretnyja dakumienty

Fajł z sakretnym pratakołam sustrečy Trampa i Zialenskaha byŭ znojdzieny ŭ pierachoplenym elektronnym liście člena Respublikanskaj partyi ZŠA Ryčarda Hreneła, adnaho z hałoŭnych daradcaŭ Trampa pa źniešniaj palitycy. U samim dakumiencie pieraličvajucca imiony pieramoŭcaŭ z abodvuch kamand, a taksama paznačany miesca i čas praviadzieńnia sustrečy, jakija całkam supadajuć z paviedamleńniami ab joj u suśvietnych ŚMI i anonsam sustrečy ad samoha Trampa, zroblenym im zahadzia.

U tekście adznačajecca, što sustreča pačałasia z dypłamatyčnych pryvitańniaŭ pierad kamierami ŭ prysutnaści prykładna 20 žurnalistaŭ, jakija zadali pieramoŭcam niekalki pytańniaŭ ab čakańniach ad sustrečy. Paśla hetaha ŚMI pakinuli pamiaškańnie i pačalisia sapraŭdnyja pieramovy.

Pavialičyć

Voś, što, kali vieryć pratakołu, abmiarkoŭvali Tramp i Zialenski.

1. Zialenski pačaŭ sustreču z prośby ab mahutnym pakiecie vajskovaj dapamohi ad ZŠA, padkreśliŭšy, što tolki z padobnaj dapamohaj Ukraina zmoža vyjhrać u vajnie. Jon zajaviŭ Trampu, što Ukraina bahataja na redkija karysnyja vykapni, takija jak «minierały, lityj i ŭran», što moža potym spatrebicca Złučanym Štatam. 
2. Zialenski adznačyŭ, što Rasija i Kitaj taksama zacikaŭlenyja atrymać hetyja redkija resursy va Ukrainie. Pry hetym, pa słovach Zialenskaha, jon byŭ ździŭleny, kali lidar Kitaja Si Czińpin zajaviŭ jamu ab tym, što «Kitaj vieryć u terytaryjalnuju cełasnaść Ukrainy i nie budzie pastaŭlać zbroju Rasii».
3. Ukrainski prezident vykazaŭ Trampu zaniepakojenaść tym faktam, što, niahledziačy na aficyjnyja zajavy, «zachodnija kampanii praciahvajuć pastaŭlać zbroju Rasii».

4. Tramp spytaŭ u Zialenskaha «pra ciapierašniuju situacyju z submarynami ŭ porcie Adesy». Zialenski adkazaŭ, što «padvodnyja łodki ŭsio jašče znachodziacca ŭ Adesie».

Važnaja zaŭvaha: z-za niedastatkovaha kantekstu niezrazumieła, pra jakija i, hałoŭnaje, pra čyje submaryny išła havorka ŭ hutarcy pamiž Trampam i Zialenskim. Aficyjna va Ukrainie ciapier niama dziejnych padłodak, bo adzinaja ŭkrainskaja padłodka «Zaparožža» była zachoplena Rasijaj u 2014 hodzie padčas rasijskaj anieksii Kryma.

Akramia hetaha, Zialenski i Tramp abmierkavali pastaŭki źniščalnikaŭ Ukrainie i pierśpiektyvu ŭstupleńnia Ukrainy ŭ NATA, a taksama zakranuli temu Budapiešckaha miemarandumu. Zialenski adznačyŭ, što ŭ ramkach miemarandumu «Ukraina addała jadziernuju zbroju za harantyi miru i što Rasija, ZŠA i navat Kitaj dali harantyi, što jany abaroniać Ukrainu ad luboha varožaha ŭvarvańnia».

Aŭtar pratakołu ŭ hetym momancie ŭ dužkach paznačyŭ, što «Zialenski pamyłkova śćviardžaje, što hety dakumient davaŭ Ukrainie nibyta absalutnyja harantyi biaśpieki, chacia nasamreč miemarandum zabiaśpiečvaŭ tolki miakkija abaviazacielstvy pa zabieśpiačeńni miru pa pravie dałučeńnia Ukrainy da Damovy ab nieraspaŭsiudžvańni jadziernaj zbroi». 

Pavialičyć

Sam Zialenski na niadaŭnim samicie ES u Bruseli adznačyŭ, što abmiarkoŭvaŭ z Trampam pytańnie ŭstupleńnie Ukrainy ŭ NATA i Budapiešcki miemarandum, pavodle jakoha Ukraina ŭ minułym admoviłasia ad jadziernaj zbroi ŭ abmien na harantyi ad krain-padpisantaŭ miemaranduma padtrymlivać terytaryjalnuju cełasnaść i suvierenitet niezaležnaj Ukrainy ŭ mižnarodna pryznanych miežach 1991 hoda.

«Ukraina mieła Budapiešcki miemarandum. U im udzielničali jadziernyja dziaržavy. Siarod ich, biezumoŭna, byli Złučanyja Štaty Amieryki, Kitaj, Rasija, Francyja. I kali Rasija parušyła hety dakumient, paciarpieła tolki Ukraina, inšyja jadziernyja krainy nie paciarpieli. Ukraina addała jadziernuju zbroju i siońnia vajuje. Paśla hetaha padobnym dakumientam davieru niama.

U razmovie z Donaldam Trampam ja jamu skazaŭ: jaki ž u nas vychad? Albo Ukraina budzie mieć jadziernuju zbroju, i tady heta budzie dla nas abarona, albo my pavinny dałučycca da niejkaha aljansu. Akramia NATA, my pakul nie viedajem dziejučych aljansaŭ. Krainy NATA siońnia nie vajujuć. U krainach NATA ludzi žyvyja… Tamu my vybirajem NATA, a nie jadziernuju zbroju. My vybirajem NATA. I, jak mnie zdajecca, mianie pačuŭ Donald Tramp. Jon skazaŭ: u vas spraviadlivyja arhumienty», — padkreśliŭ Zialenski.

Taksama jon dadaŭ, što Tramp padčas sustrečy daŭ vielmi pramuju infarmacyju, što jon budzie padtrymlivać Ukrainu.

• 13
• 0
• 1
• 3
• 1
• 0
• 0
• 0