U paradak dnia mini‑siesii Jeŭraparłamienta, jakaja adbudziecca ŭ Brusieli 25 lutaha, płanujecca ŭklučyć debaty pa situacyi ŭ Biełarusi.
Jak paviedamili ŭ pres‑słužbie parłamienta ES, čakajecca, što rezalucyja pa Biełarusi budzie razhledžana ŭ miežach plenarnaj siesii 8—11 sakavika ŭ Strasburhu.
U ramkach mini‑siesii šerah sustreč 23—25 lutaha praviaduć u Jeŭraparłamiencie staršynia nie pryznanaha ŭładami Sajuza palakaŭ na Biełarusi (SPB) Anžalika Borys i lider ruchu »Za Svabodu» Alaksandr Milinkievič. Zapłanavana jaho sustreča sa staršynioj Jeŭraparłamienta Ježy Buziekam.
Jak raniej paviedamlałasia, 25—27 lutaha Minsk naviedaje misija Jeŭraparłamienta ŭ składzie čatyroch čałaviek. Viadoma, što jaje ŭznačalić bałharski deputat, kiraŭnik delehacyi Jeŭraparłamienta ŭ Jeŭranieście Kryścijan Vihienin. Taksama ŭ skład misii ŭvojduć finski deputat, kiraŭnik padkamiteta pa pravach čałavieka Chajdzi Chaŭtała i polski deputat, kiraŭnik delehacyi pa suviaziach ź Biełaruśsiu Jacek Pratasievič.
22 lutaha ministry zamiežnych spraŭ krain ES vykazali zakłapočanaść situacyjaj z pravami čałavieka ŭ Biełarusi, u asablivaści ŭ suviazi z padziejami vakoł Sajuza palakaŭ na Biełarusi.
Kanflikt u SPB abvastryŭsia z‑za situacyi vakoł Doma polskaha ŭ Iviancy (Vałožynski rajon Minskaj vobłaści). Na jaho pretendujuć dva kryły SPB — aficyjnaje, pryznanaje biełaruskimi ŭładami, i nieaficyjnaje, jakoje padtrymlivaje kiraŭnictva Polščy. 17 lutaha sud Vałožynskaha rajona abaviazaŭ dyrektara Doma polskaha Teresu Sobal vyzvalić budynak i pieradać jaho kiraŭnictvu miascovaj arhanizacyi zarehistravanaha SPB.
15 i 17 lutaha było zatrymana i asudžana niekalki dziesiatkaŭ aktyvistaŭ nieaficyjnaha sajuza.
