Rasija patrabuje ad kampanii Google dva ŭndecyljony rubloŭ. Čakajcie, kolki?!
Rasijskija dziaržaŭnyja telekanały praz sud patrabujuć ad karparacyi Google sumu, jakuju nie vyvučajuć u škole. Što adbyvajecca?
Rasijskaja prapahanda suprać Google
Historyja sudovych ciažbaŭ rasijskich prapahandysckich ŚMI z Google ciahniecca jašče z 2020 hoda. Usia sprava ŭ YouTube, jaki naležyć karparacyi. U 2020-m z-za sankcyj ZŠA płatforma zabłakavała kanały «Caŕhrada» pravasłaŭnaha aliharcha Kanstancina Małafiejeva i RIA FAN, jakoje ŭvachodziła ŭ miedyjaimpieryju Jaŭhiena Pryhožyna.
«Caŕhrad» padaŭ u maskoŭski sud na amierykanski, irłandski i rasijski Google – i vyjhraŭ. Sud pastanaviŭ adnavić dostup da kanała pad pahrozaj prahresiŭnaha štrafu.
Z pačatkam poŭnamaštabnaj vajny YouTube vydaliŭ uvohule ŭsie kanały rasijskich dziaržSMI. Paśla čaho Google sutyknuŭsia z kalektyŭnaj pozvaj ad 17 telekanałaŭ, siarod jakich «Rasija», NTV, «Pieršy kanał» i inšyja. Akramia taho, za prapahandystaŭ upisalisia čynoŭniki. Fiederalnaja antymanapolnaja słužba aštrafavała Google na 20 młn dołaraŭ, a zatym padvoiła sumu za niavypłatu. Karparacyju abvinavacili ŭ złoŭžyvańni daminujučym stanoviščam z-za błakiroŭki kanałaŭ dziaržSMI.
Google navat vypłaciŭ častku sumy pa pazovie da «Caŕhrada». A letam 2022 hoda rasijskaja dačka kampanii padała na bankructva z-za doŭhu ŭ 196 młn dołaraŭ pry sumie aktyvaŭ usiaho ŭ 36 młn.
Rasijskija dziaržkanały paśla hetaha pajšli jašče dalej: padali pazovy ŭ sudy Turcyi, Vienhryi, Ispanii, PAR i inšych krain, patrabujučy ad kampanii vykanać rašeńni, vyniesienyja sudami ŭ Rasii.
U červieni 2024 hoda sud PAR navat zadavoliŭ taki pazoŭ i nakłaŭ aryšt na majomaść Google u krainie. Google u adkaz padaŭ iski ŭ sudy ZŠA i Vialikabrytanii z patrabavańniem zabaranić rasijskim kanałam padavać u sudy za miežami Rasii.
Sprava, u jakoj šmat nuloŭ. Što takoje ŭndecyljon?
Napiaredadni RBK paviedamiŭ, što rasijski sud ustanaviŭ dla Google sumu štrafu pa iskach telekanałaŭ. Jana składaje dva ŭndecyljony rasijskich rubloŭ. Akramia taho, sud abaviazaŭ adnavić dostup da kanałaŭ na YouTube ciaham dzieviaci miesiacaŭ. Kali hetaha nie adbudziecca, kožny dzień praterminoŭki budzie pavialičvać štraf na 100 tysiač rubloŭ (krychu bolš za tysiaču dołaraŭ). Nijakich abmiežavańniaŭ na sumu vynikovaha štrafu niama.
Ale što takoje ŭndecyljon? Takich likaŭ u škole nie prachodziać, vyvučajuć ich va ŭniviersitetach chiba što matematyki, fiziki i astranomy. Undecyljon — heta adzinka z 36 nulami. Dla paraŭnańnia, u zvykłym nam tryljonie ŭsiaho 12 nuloŭ.
Ci mahčyma ŭvohule vypłacić taki štraf? Viadoma, nie. Navat kali Google raptam zachacieŭ by — u jaho b heta nie atrymałasia. Jak i ŭ luboj inšaj kampanii ci dziaržavy. Ci navat usioj płaniety. Dva undecyljony rasijskich rubloŭ — heta prykładna 20 decyljonaŭ dołaraŭ. Decyljon — heta adzinka z 33 nulami.
Pa danych na 2024 hod, kapitalizacyja kampanii Google składaje amal 2,1 tryljona dołaraŭ. Roźnica pamiž hetymi značeńniami nie paddajecca ŭjaŭleńniu. Darečy, hłabalny VUP, pavodle prahnozu MVF, u 2024 składzie 110 tryljonaŭ dołaraŭ — heta ŭ 181 kvintyljon (10 u stupieni 18) mienš za sumu štrafu. A VUP ZŠA, naprykład, składaje 29 tryljonaŭ.
Darečy, moža tak zdarycca, što hety štraf vyraście da liku z nazvaj … huhał. Heta dziesiać u sotaj stupieni. Dziŭna, što «kreatyŭny» rasijski sud adrazu nie pryznačyŭ karparacyi Google štraf z takoj sumaj.
Ciapier rasijskija ŚMI paviedamlajuć, što Google naohuł moža być zabłakavany ŭ Rasii — pakolki vypłacić štraf niemahčyma.
Kamientary