U sieradu-čaćvier biełaruskaja tema stanie pradmietam abmierkavańnia ŭ Jeŭraparłamiencie. Uziać udzieł u im zaprošanyja staršynia Sajuza palakaŭ Biełarusi Anžalika Borys i staršynia Ruchu za Svabodu Alaksandr Milinkievič.
U Bruseli jany adzinadušna vystupili suprać uviadzieńnia sankcyj suprać Biełarusi i za adkrytaść ES da biełaruskaha hramadstva.
«Jość zakliki da ŭviadzieńnia sankcyj. Ale ja jak hramadzianka Biełarusi ad 2005 hodu nikoli nie zaklikała da ich uviadzieńnia. Ja pierakananaja, što treba zabiaśpiečyć adkrytaść Jeŭropy hramadzianam Biełarusi, biełaruskamu hramadstvu ŭ cełym.Kab prostyja hramadzianie mahli lohka atrymać šenhienskuju vizu i pryjechać u Jeŭropu», – zaznačyła Anžalika Borys.
Padobnuju pazicyju zaniaŭ i A.Milinkievič. «ES pavinien prademanstravać, što maje instrumienty ŭpłyvu na dyktatury i aŭtarytarnyja režymy, bo tolki siłaj možna zmusić ułady da krokaŭ u bok demakratyzacyi, — zajaviŭ Milinkievič. — Jakija heta instrumienty? — Usio vielmi prosta.
Biełaruś atrymlivaje padarunki ŭ vyhladzie kredytaŭ, nie stolki ad ES, kolki ad Mižnarodnaha valutnaha fondu. Ale supraca ź mižnarodnymi instytutami pavinna adbyvacca na padstavie pravoŭ čałavieka. Heta pryncypovaja reč, — zajaviŭ Milinkievič,łaŭreat premii imia Sacharava, što prysudžajecca Jeŭraparłamientam.
Ź Milinkievičam i Borys sustreŭsia staršynia Jeŭraparłamienta Ježy Buzak. Paśla sustrečy Buzak, Milinkievič i Borys praviali bryfinh, a potym pačałosia pasiadžeńnie delehacyi Jeŭraparłamenta pa Biełarusi. Ź biełaruskaha boku ŭ sustrečy brali ŭdzieł Milinkievič, Borys i pamočnik Milinkieviča Aleś Łahviniec, a taksama pradstaŭnik biełaruskaha pasolstva, jaki ŭdzielničaŭ u dyskusii.
Anžalika Borys adznačyła, što za stolki hadoŭ u Biełarusi ŭ jaje nie było mahčymaści razmaŭlać z uładami, choć joj taho chaciełasia. A tut heta adbyłosia.
Zapłanavanyja sustrečy Milinkieviča j Borys z usimi najbujniejšymi frakcyjami parłamienta. Borys taksama spatkajecca ź jeŭrakamisaram pa pytańniach palityki susiedstva Štefanam Fiule.
