Polskija banki nie adkryli rachunkaŭ biełaruscy z padarožnym dakumientam
Biełaruska Dzina try hady žyvie ŭ Polščy, maje mižnarodnuju abaronu. Niadaŭna ŭ žančyny skončyŭsia termin dziejańnia biełaruskaha pašpartu i jana atrymała polski padarožny dakumient. Ź im Dzina pajšła adkryvać rachunak i sutyknułasia z admovaj u troch bankach. «Biełsat» raźbiraŭsia, čamu.
Palityka bankaŭ
Na praciahu troch hadoŭ Dzina karystałasia rachunkam u banku PKO. Ciapier biełaruska vyrašyła nabyć kvateru ŭ Polščy, a dziela hetaha treba pakłaści hrošy na bankaŭski rachunak. Rabić heta ŭ PKO žančyna paličyła niemetazhodnym, tamu što, ź jaje słovaŭ, u hetym banku pry zaličeńni na rachunak najaŭnych srodkaŭ, zdymajecca 0,5% ad sumy.
«Heta šmat, kali ty kładzieš niemaleńkuju sumu, tamu dla mianie heta stała pryncypovym pytańniem», — kaža Dzina.
Žančyna pajšła ŭ banki, dzie ŭvohule ŭ takoj situacyi nie zdymajuć nijakich adsotkaŭ — i paŭsiul atrymała admovy.
«Ja była ŭ troch adździaleńniach banku Millenium, u dvuch — Santander i ŭ adnym — MBank. Ni ŭ adnym nie adkryli. Była nadzieja, što ŭ Santander usio ž adkryjuć, ale tam urešcie skazali, što navat kali b i adkryli, to adrazu zabłakavali b. Jak tolki ŭ banku bačyli moj padarožny dakumient, adrazu kazali, što nie adkryjuć. Navat moj dazvoł na žycharstva ich nie cikaviŭ. Kazali — u nas takija palityka, adkryvajem tolki z pašpartam. Mnie raili iści ŭ PKO, ale, jak ja ŭžo kazała, jon mnie nie padychodzić», — raspaviadaje naša surazmoŭca.
Raniej situacyi, u jakoj padarožny dakumient staŭ by admovaj dla niejkich apieracyjaŭ, u Dziny nie ŭźnikała. Biełaruska pieražyvała, što nie zmoža ź im kupić i aformić aŭtamabil, navat źviarnułasia z hetym pytańniem va Upraŭleńnie pa spravach zamiežnikaŭ — tam zapeŭnili, što prablemy nie budzie, mašynu kuplać možna.
My ž zapytali va Upraŭleńni, ci moža polski bank admović u adkryćci rachunku čałavieku, u jakoha zamiest nacyjanalnaha pašpartu — padarožny dakumient i dazvoł na žycharstva ŭ Polščy.
«Hetyja pytańni nie znachodziacca ŭ śfiery kampietencyi Upraŭleńnia pa spravach zamiežnikaŭ. Mahčyma, u hetaj spravie varta źviazacca z Kamisijaj finansavaha nahladu», — adkazali nam va Upraŭleńni.
Prymajecca tolki Ženieŭski padarožny dakumient
My taksama napisali zapyty ŭ try banki, dzie Dzina atrymała admovy, i zapytalisia — na jakoj padstavie nie adkryli rachunki i što rabić biełarusam, u jakich skončylisia pašparty, a jany nie mohuć pajechać za novymi ŭ Biełaruś?
Adkaz pakul pryjšoŭ tolki z mBank:
«Kab adkryć rachunak u mBank, zamiežnik musić mieć: zamiežny pašpart i adzin z troch dakumientaŭ, jaki dazvalaje pražyvańnie ŭ Polščy: dazvoł na žycharstva (kartu pobytu), paśviedčańnie rehistracyi hramadzianina Jeŭraźviazu ŭ Polščy, dakumient, jaki paćviardžaje prava na stałaje znachodžańnie ŭ krainie ci Ženieŭski padarožny dakumient razam z dazvołam na žycharstva».
Polski padarožny dakumient u situacyi, kali skončyŭsia nacyjanalny pašpart, mBank na siońniašni dzień prymaje, kali asoba źjaŭlajecca pastajannym klijentam hetaha banka.
«My pracujem nad tym, kab nieŭzabavie była mahčymaść adkryćcia taksama pieršaha rachunku ŭ našym banku z polskim padarožnym dakumientam», — zaznačajecca ŭ adkazie.
Jak tolki my atrymajem tłumačeńni ź inšych dvuch bankaŭ — Santander i Millenium, my ich taksama apublikujem.
Dzina — nie pieršaja biełaruska, jakaja sutyknułasia z admovaj u adkryćci rachunku ŭ polskim banku. Takimi situacyjami viadomy Santander, jaki nie adkryvaŭ i navat błakavaŭ užo adkrytyja rachunki prosta na toj padstavie, što klijent — hramadzianin Biełarusi.
Bank PKO, jaki ličycca samym łajalnym da biełarusaŭ, niadaŭna źmianiŭ praviły adkryćcia rachunku — ciapier dla hetaha patrebny pracoŭny kantrakt u Polščy.
Kamientary