Va Ukrainie samymi niebiaśpiečnymi dla voraha apieratarami dronaŭ stali hiejmiery

Jak piša The Wall Street Journal, kali ŭ minułych vojnach kulamiotčyki i snajpiery adyhryvali vielmi važnuju rolu na poli boju, to ciapier klučavymi hulcami źjaŭlajucca apieratary dronaŭ, zdolnyja nanosić trapnyja i mahutnyja ŭdary pa vorahu. Dron z vybuchoŭkaj moža mieć siłu hranaty, trapnaść snajpiera i dalnaść artyleryjskaha harmatnaha ahniu, što robić jaho nadzvyčaj efiektyŭnaj zbrojaj.

Va Ukrainie takija drony stvarajuć «miortvuju zonu» pierad linijaj frontu, jakaja strymlivaje nastup bujnoj rasijskaj armii, nie dajučy joj złamać abaronu. Choć rasijskija siły značna bolšyja i lepš abstalavanyja, ich nastupleńnie prasoŭvajecca vielmi pavolna, bieź istotnych praryvaŭ.

Tradycyjny vobraz elitnaha sałdata, jakoha my časta bačym u filmach — muskulisty i fizična zahartavany hieroj, — stavić pad sumnieńnie zdolnaści sučasnaj moładzi, jakaja šmat času pravodzić pierad ekranami, być hetak ža efiektyŭnaj na poli boju. Adnak dla kiravańnia bajavymi dronami patrabujucca zusim inšyja navyki — chutkaje myśleńnie, vydatnaja kaardynacyja i spryt u rukach, — što bolš asacyjujecca z kampjutarnymi hulniami, a nie z tradycyjnym bojem.

Ukrainskaja armija, sutyknuŭšysia ź niedachopam artyleryjskich bojeprypasaŭ, usio bolš raźličvaje na apierataraŭ dronaŭ, jakija stali klučavoj siłaj u strymlivańni rasijskich nastupleńniaŭ. Ukraina stała pieršaj krainaj, jakaja intehravała padraździaleńni bieśpiłotnikaŭ u bolšaść bryhad svaich uzbrojenych sił. Tam apieratary dronaŭ pracujuć jak niezaležnaja tvorčaja subkultura, kirujučy ŭłasnymi technałahičnymi centrami i zajmajučysia vytvorčaściu vybuchovych pryład.

Jak adznačaje vydańnie, niahledziačy na toje, što Rasija moža padniać u nieba vialikuju kolkaść svaich bieśpiłotnikaŭ, va Ukrainy jość pieravaha ŭ kvalifikavanych piłotach i technicy. Dla 20-hadovaha piłota zabojstva na dalokaj adlehłaści moža padacca realistyčnaj videahulnioj biez taho fizičnaha i emacyjnaha napružańnia, jakoje supravadžaje akopny boj.

Startapy stali ruchavikami inavacyj

Ukraina atrymała pieravahu ŭ kanflikcie z Rasijaj dziakujučy inavacyjnamu vykarystańniu nievialikich bieśpiłotnikaŭ. Niekatoryja kamandy, jak, naprykład, Clear Eyes, u štabie jakoj na ŭschodzie Dnieprapiatroŭskaj vobłaści pabyvali žurnalisty vydańnia, pačynali jak hrupy hramadzianskich entuzijastaŭ, jakija vykarystoŭvali kamiercyjnyja drony dla adsočvańnia ruchaŭ rasijskich vojskaŭ.

Siarod bieśpiłotnikaŭ, što vykarystoŭvajuć ukrainskija vajskoŭcy, jość nievialikija i chutkija FPV-drony, jakija kirujucca apierataram z dapamohaj akularaŭ, kudy pieradajecca videa z kamiery na dronie. Takija aparaty majuć dyjamietr kala 7-10 calaŭ, dalnaść da 19 kiłamietraŭ i mohuć nieści vybuchoŭku da 4 kiłahramaŭ, jakaja spracoŭvaje pry ŭdary.

Akramia takich dronaŭ, ukraincy raspracavali bolš bujnyja aparaty, viadomyja jak «Baba Jaha», jakija mohuć nieści i skidvać čatyry 9-kiłahramovyja bomby, a zatym viarnucca na bazu dla pierazaradki.

Pavialičyć

Ukrainskija zavody vyrablajuć dziasiatki tysiač FPV-dronaŭ štomiesiac pa košcie kala $500 za adzinku. Arhanizacyi, jakija stajać za hetymi dronami, pracujuć jak vysokatechnałahičnyja startapy, dzie važnyja inavacyi, łahistyka i zładžanaja vajennaja taktyka.

Kamadziram Clear Eyes źjaŭlajecca 37-hadovy ŭładalnik markietynhavaha ahienctva, a jaho namieśnik raniej pracavaŭ chimikam u sielskaj haspadarcy. Ciapier jon adkazvaje za vyrab vybuchoŭki. Mužčyna avałodaŭ hetym majsterstvam dziakujučy YouTube, a zatym zmoh zavierbavać adnaho bajavoha inžyniera i 55-hadovaha byłoha šachciora, jaki vykarystoŭvaŭ dynamit u svajoj paŭsiadzionnaj pracy.

Vytvorčaść bombaŭ kamanda Clear Eyes arhanizavała ŭ niekalkich viaskovych chatach na poŭnačy Charkaŭskaj vobłaści. Tam ža znachodziacca i ich technałahičny centr.

Apieratary dronaŭ na piarednim fłanhu

Ukrainskija piłoty ŭdarnych dronaŭ vyjšli na pieršy płan u kancy minułaha hoda, kali zapasy artyleryjskich bojeprypasaŭ skančalisia, a pastaŭki ad ZŠA zatrymlivalisia. Ukrainskaja armija, sutyknuŭšysia ź pieravahaj rasijskich vojskaŭ, patrabavała novych rašeńniaŭ.

Siarod tych, chto prystupiŭ da vykanańnia bajavych zadańniaŭ, byŭ piłot z pazyŭnym «Fiermier» — 27-hadovy były mieniedžar restarana. Jon pačaŭ svaju słužbu jak piłot-raźviedčyk, ale z časam pierajšoŭ da ŭdarnych dronaŭ. Pa słovach mužčyny, čym bolš vorahaŭ jon źniščyć, tym chutčej zmoža viarnucca dadomu.

Paśla taho jak vosieńniu minułaha hoda Rasija pačała sproby prarvacca kala Aŭdziejeŭki, kamanda Clear Eyes atrymała zadańnie abaraniać vioski na zachadzie ad horada. Ich metaj było stvaryć zonu paražeńnia hłybinioj u paŭtara kiłamietra, kab abaranić ukrainskuju piachotu ŭ akopach na pieradavoj ad atak rasijskich vojskaŭ.

U adnosna spakojnyja pieryjady apieratary dronaŭ palavali na pryjarytetnyja mety, takija jak braniatechnika i srodki dla dalokaha nazirańnia. «Fiermier» zhadvaje, što za adzin dzień źniščyŭ try tanki, schavanyja ŭ lesie. Padčas rejdu USU ŭ Kurskuju vobłaść FPV-drony nanosili ŭdary pa pierapravach, sprabujučy izalavać tam tysiačy rasijskich sałdat.

Udary bieśpiłotnikaŭ časta zapisvajucca na videa, jakija zatym stanoviacca papularnymi ŭ sacsietkach i aktyŭna vykarystoŭvajucca vałanciorami dla zboru hrošaj na novyja drony.

Pavialičyć

Paśla niaŭdač u nastupie z vykarystańniem braniatechniki rasijskaja armija źmianiła taktyku i ciapier adpraŭlaje nievialikija hrupy piachoty, pierad jakoj staić zadača pierasiekčy niejtralnuju zonu, usiejanuju zharełaj technikaj i razburanymi budynkami, i pastaracca vyžyć da prybyćcia padmacavańnia.

Takaja taktyka pryvodzić da taho, što piłoty ŭkrainskich dronaŭ usio čaściej nacelvajucca na asobnych sałdat, što stvaraje novy vid bitvy, u jakoj čałaviek supraćstaić mašynie.

Pa słovach «Fiermiera», ciapier za dzień jon vykarystoŭvaje ŭdvaja bolš dronaŭ zamiest raniejšych 20. Bolšaść z hetych aparataŭ abstalavany askołačnymi bojeprypasami, pryznačanymi dla paražeńnia piachoty, a nie mahutnymi vybuchovymi zaradami, jakija zvyčajna vykarystoŭvajucca dla źniščeńnia braniatechniki.

Jak piša vydańnie, huk nabližeńnia FPV-drona, jaki nahadvaje hudzieńnie vialikaha kamara, naroŭni sa śvistam artyleryjskich snaradaŭ staŭ adnym z samych strašnych na poli boju dla piechacincaŭ. Na radyjopierachopach ukrainskija sałdaty časam čujuć, jak vorah nazyvaje darohi praź niejtralnuju zonu, usypanyja ciełami zahinułych, «darohami śmierci».

• 14
• 0
• 0
• 0
• 0
• 0
• 1
• 0