Pa stanie na 6 listapada za «zdradu dziaržavie» (art. 356 KK) u Biełarusi asudzili minimum 88 čałaviek, ź ich 13 žančyn. Heta ličba imkliva raście, bo dzieviać miesiacaŭ tamu jana była amal udvaja mienšaja. «Viasna» raspaviadaje, kaho ŭ Biełarusi asudzili pa «zdradnickim» artykule i kamu ź ich pryznačyli maksimalny turemny termin.
Pavodle č. 1 art. 356 Kryminalnaha kodeksa mohuć pryznačyć pakarańnie ad siami da 15 hadoŭ kałonii. A zhodna z častkaj druhoj — až da śmiarotnaha pakarańnia.
U 2023 hodzie ŭ Kryminalny kodeks byli ŭniesieny źmieny.
Ciapier zhodna č. 2 art. 356 Kryminalnaha kodeksa «zdrada dziaržavie, ździejśnienaja słužbovaj asobaj, jakaja zajmaje adkaznaje stanovišča, słužbovaj asobaj, jakaja zajmaje dziaržaŭnuju pasadu, abo asobaj, na jakuju raspaŭsiudžvajecca status vajskoŭca», karajecca pazbaŭleńniem voli na termin ad dziesiaci da dvaccaci hadoŭ sa štrafam abo biez štrafu, abo pažyćciovym pazbaŭleńniem voli, abo śmiarotnym pakarańniem.
U Biełarusi 88 čałaviek asudzili na roznyja terminy až da 25 hadoŭ kałonii.
Kaho sudzili za «zdradu dziaržavie»?
Da vialikich terminaŭ pavodle art. 356 Kryminalnaha kodeksa sudzili niezaležnych žurnalistaŭ, vajskoŭcaŭ, fihurantaŭ spravy «Rabočaha ruchu», śviatara, muzyku, studenta, miedyjamieniedžara, palitykaŭ, biźniesmiena, ajcišnika, kulturnickaha mieniedžara, analityka, byłych siłavikaŭ. Heta niepoŭny pieralik, bo pad jaho pieraśled traplajuć zvyčajnyja ludzi i siemji.
U Biełarusi 10 čałaviek byli asudžanyja zavočna za «zdradu dziaržavie». Heta demakratyčnaja lidarka Śviatłana Cichanoŭskaja i jaje daradca Franak Viačorka, rejkavyja partyzany, byłyja siłaviki Stanisłaŭ Łupanosaŭ, Juryj Machnač, fihuranty «spravy dyviersii ŭ Mačuliščach» i BYPOL i inšyja.
Adznačym, što spravy ab «zdradzie dziaržavie» razhladajucca ŭ zakrytych režymach, tamu abstaviny pieraśledu časam možna daznacca tolki ź dziaržaŭnych i prapahandysckich miedyja i pres-słužbaŭ viedamstvaŭ.
Kaho asudzili ŭ Biełarusi da maksimalnych turemnych terminaŭ?
Da rekordnych 25 hadoŭ źniavoleńni za «zdradu dziaržavie» ŭ Biełarusi asudzili čatyry čałavieki. Heta kiraŭnik «Bajpoł» Alaksandr Azaraŭ, fihurant «spravy dyviersii ŭ Mačuliščach» Vital Jakucik, pradprymalnik i aktyvist Mikałaj Aŭtuchovič i rejkavy partyzan Dzianis Dzikun.
Alaksandra Azarava i Vitala Jakucika zavočna asudzili pa hučnaj «spravy dyviersii ŭ Mačuliščach». Ich abvinavačvańni byli źviazanyja z «teraryzmam».
Mikałaj Aŭtuchovič — adzin ź pieršych asudžanych za «zdradu dziaržavie»
Vieterana afhanskaj vajny, biełaruskaha pradprymalnika i hramadskaha aktyvista Mikałaja Aŭtuchoviča zatrymali ŭ śniežni 2020 hoda. Ułady adrazu abviaścili Aŭtuchoviča arhanizataram i kiraŭnikom «terarystyčnaj hrupoŭki», jakaja dziejničała na terytoryi Hrodzienskaj vobłaści i nibyta padpalvała aŭtamabili i damy supracoŭnikaŭ milicyi. Usiaho pa «spravie Aŭtuchoviča» prachodziać 12 čałaviek.
Mikałaja asudzili pa č. 3 art. 285 KK (stvareńnie złačynnaj arhanizacyi i ŭdzieł u joj); č. 2 art. 357 KK (zamach na zachop dziaržaŭnaj ułady niekanstytucyjnym šlacham); č. 1 art. 356 Kryminalnaha kodeksa (zdrada dziaržavie); č. 3 art.130 KK (raspalvańnie inšaj sacyjalnaj varožaści abo varažniečy); č. 3 art. 361 KK (zakliki da mier abmiežavalnaha charaktaru (sankcyj), inšych dziejańniaŭ, nakiravanych na pryčynieńnie škody nacyjanalnaj biaśpiecy Respubliki Biełaruś); č. 1 art. 290-2 KK (zamach na ŭciahvańnie ŭ terarystyčnuju dziejnaść); č. 3 art. 289 KK (akt teraryzmu i padrychtoŭka da jaho); č. 4 art. 295 KK (niezakonnyja dziejańni ŭ dačynieńni da ahniastrelnaj zbroi, bojeprypasaŭ, vybuchovych rečyvaŭ i vybuchovych pryład, u tym liku padrychtoŭka da takich dziejańniaŭ); č. 3 art. 333-1 KK (niezakonnaje pieramiaščeńnie praz mytnuju miažu JEAES i dziaržaŭnuju miažu Respubliki Biełaruś ahniastrelnaj zbroi, kamplekty bojeprypasaŭ da jaho, vybuchovych rečyvaŭ, vybuchovych pryład); č.1 art. 295-3 KK (niezakonnyja dziejańni ŭ dačynieńni da pradmietaŭ, dziejańnie jakich zasnavana na vykarystańni haručych rečyvaŭ).
Hrodzienski abłasny sud 17 kastryčnika 2022 hoda ahučyŭ prysud — 25 hadoŭ kałonii va ŭmovach strohaha režymu.
Svoj termin palitviazień pakul adbyvaje ŭ turmie № 1.
«Rejkavy partyzan»
Žychara Śvietłahorska Dzianisa Dzikuna zatrymali 4 sakavika 2022 hoda za padpał 28 lutaha na stancyi Žerdź-Astankavičy relejnaj šafy sihnalizacyi, centralizacyi i błakavańnia (SCB), u vyniku čaho śviatłafory i strełačnyja pieravody na hetym učastku byli pryviedzienyja ŭ niepracoŭny stan.
Dzianisu vystavili abvinavačańni pavodle šerahu artykułaŭ Kryminalnaha kodeksa Respubliki Biełaruś: art. 361-1 (udzieł u ekstremisckim farmavańni); art. 289 (akt teraryzmu, ździejśnieny ŭ składzie arhanizavanaj hrupy, jaki paciahnuŭ ciažkija nastupstvy, što stvarajuć pahrozu hibieli ludziej i pryčynieńnie im cialesnych paškodžańniaŭ); č. 2, č. 4 art. 309 (naŭmysnaje pryviadzieńnie ŭ nieprydatnaść šlachoŭ znosin, jakoje paciahnuŭ ciažkija nastupstvy, a taksama stvaryła pahrozu krušeńnia, avaryi i hibieli ludziej); art. 356 (zdrada dziaržavie). Jašče da suda Dzianisa ŭklučyli ŭ «śpis terarystaŭ».
27 śniežnia 2022 hoda ahučyli prysud: Dzianisa Dzikuna asudzili da 23 hadoŭ kałonii va ŭmovach uzmocnienaha režymu. U horackaj kałonii № 9 Dzianisa adrazu źmiaścili ŭ štrafny izalatar. Paśla zakančeńnia terminu jaho pieraviali ŭ atrad, ale potym znoŭ adpraŭlali ŭ ŠIZA niekalki razoŭ. U červieni 2023 hoda palitviaźnia źmiaścili ŭ pamiaškańnie kamiernaha typu. Ź im nie było suviazi niekalki miesiacaŭ.
25 sakavika 2024 hoda ŭ Horkach Dzianisa pačali sudzić pavodle č. 2 art. 411 KK (złosnaje niepadparadkavańnie patrabavańniam administracyi kałonii). Jamu dadali jašče dva hady źniavoleńnia. Ciapier palitviazień u kałonii strohaha režymu ŭ Navasadach.
Kamientary