U Kanhres ZŠA ŭpieršyniu abrali transhiendara

Pa vynikach vybaraŭ u Kanhres stała viadoma, što Saru Makbrajd, jakaja była sienatarka ŭ asamblei štata Dełaver, abrali ŭ Pałatu pradstaŭnikoŭ ZŠA. Jana ŭpeŭniena abyšła svajho apanienta ad Respublikanskaj partyi.

Makbrajd naradziłasia ŭ 1990 hodzie ŭ Uiłminhtanie — samym vialikim pa kolkaści nasielnictva horadzie maleńkaha štata Dełaver. Šlach u palityku pačała ŭ 16 hadoŭ, kali dałučyłasia da vybarčaha štaba Demakratyčnaj partyi ŭ svaim štacie.

U 2008 hodzie jana brała ŭdzieł u kampanii pa vybarach hubiernatara štata, a praz dva hady — u kampanii Bo Bajdena, syna Džo Bajdena, jaki tady bałatavaŭsia na pasadu hienprakurora štata — siamja Bajdenaŭ žyvie ŭ Dełavery.

U presie adznačajecca, što Makbrajd adyhrała važnuju rolu ŭ farmiravańni pohladaŭ prezidenta Džo Bajdena na pytańni LGBTQ. Prezident Bajden napisaŭ pradmovu da miemuaraŭ Makbrajd Tomorrow Will Be Different, jakija vyjšli ŭ 2018 hodzie.

U knizie žančyna apisvaje svoj asabisty šlach, u tym liku sustreču sa svaim mužam, transhiendarnym aktyvistam Endru Krejem, ź jakim jana paznajomiłasia na mierapryjemstvie pa pravach LGBTQ u Biełym domie ŭ 2012 hodzie. Krej pamior ad raku ŭ 2014 hodzie, usiaho praź niekalki dzion paśla ich viasiella.

Viadoma, što svoj kaminh-aŭt jak transhiendarnaj asoby Makbrajd ździejśniła ŭ 2012 hodzie, kali apublikavała artykuł u studenckaj haziecie Amierykanskaha ŭniviersiteta, dzie na toj čas vučyłasia i była staršynioj studenckaj rady. Paźniej hety artykuł pieradrukavali inšyja vydańni, siarod jakich i niekamiercyjnaja arhanizacyja Łedzi Hahi Born This Way Foundation.

U 2012 hodzie MakBrajd prajšła stažyroŭku ŭ Biełym domie. U nastupnym hodzie jana stała štatnaj supracoŭnicaj arhanizacyi Equality Delaware, jakaja zmahajecca za pravy LGBTQ u štacie Dełaver. 

Niekalki hadoŭ Makbrajd pracavała pres-sakratarom u adnoj z najbujniejšych arhanizacyj ZŠA, jakaja stavić svajoj metaj abaronu pravoŭ leśbijanak, homaseksuałaŭ, bisieksuałaŭ i transhiendaraŭ, — Human Rights Campaign.

Praz čatyry hady paśla svajho publičnaha kaminh-aŭtu jak transhiendarnaj asoby Makbrajd stała pieršaj transhiendarnaj asobaj, jakaja vystupiła z pramovaj na nacyjanalnym partyjnym kanhresie ŭ ZŠA. Heta adbyłosia na kanviencyi Demakratyčnaj partyi ŭ 2016 hodzie.

U 2020 hodzie Makbrajd stała pieršaj adkrytaj transhiendarnaj asobaj, abranaj u Sienat štata ZŠA.

Na apošnich vybarach jana pieramahła ŭ baraćbie za miesca ŭ Pałacie pradstaŭnikoŭ Kanhresa ZŠA.

Jak piša BBC, abrańnie Makbrajd adbyłosia ŭ toj momant, kali respublikancy, u tym liku mnohija ź jaje budučych kalehaŭ na Kapitalijskim pahorku, aktyŭna vystupajuć za zakony, jakija zabaraniajuć niepaŭnaletnim dostup da hiendarnych miedycynskich pracedur i krytykujuć udzieł transhiendarnych spartoŭcaŭ u hiendarna raździelenych spabornictvach.

Tamu toje, što Makbrajd zdoleła pieramahčy na kankurentnych vybarach, źviartaje na siabie ŭvahu.

• 6
• 4
• 3
• 6
• 0
• 0
• 1
• 0